અમદાવાદ ગ્રામ્યની શાળાઓમાં EVM અંગે જાગૃતિ અભિયાન તેજ, ૩૫,૦૦૦થી વધુ લોકોને મતદાન પ્રક્રિયાનું માર્ગદર્શન
રિપોર્ટર
હિતેન્દ્ર ગોસાઈ
અમદાવાદ
અમદાવાદ ગ્રામ્ય જિલ્લામાં આવનારી તા. ૨૬ એપ્રિલના સ્થાનિક સ્વરાજ્યની ચૂંટણીઓને ધ્યાનમાં રાખીને મતદાર જાગૃતિ અભિયાન હવે નિર્ણાયક તબક્કામાં પહોંચી ગયું છે. જિલ્લા શિક્ષણાધિકારી કચેરીના માર્ગદર્શન હેઠળ SVAP (State Voters Awareness Programme) અંતર્ગત શાળાઓમાં વિવિધ કાર્યક્રમો યોજાઈ રહ્યા છે, જેમાં તાજેતરમાં ઈલેક્ટોરલ લીટરસી ક્લબ દ્વારા EVM અને મતદાન પ્રક્રિયા અંગે વિશેષ માર્ગદર્શન આપવામાં આવ્યું હતું.
જિલ્લાની આશરે ૬૨૦ માધ્યમિક અને ઉચ્ચતર માધ્યમિક શાળાઓમાં આયોજિત આ ટેકનિકલ જાગૃતિ કાર્યક્રમનો મુખ્ય હેતુ ઈલેક્ટ્રોનિક વોટિંગ મશીન (EVM) વિશે લોકોના મનમાં રહેલી શંકાઓ દૂર કરવાનો અને મતદાન પ્રક્રિયા પ્રત્યે વિશ્વાસ વધારવાનો હતો. આ કાર્યક્રમમાં અંદાજે ૩૫,૦૯૦ જેટલા વિદ્યાર્થીઓ, વાલીઓ અને શિક્ષકોએ સક્રિય રીતે ભાગ લીધો હતો.
કાર્યક્રમ દરમિયાન પ્રાયોગિક નિદર્શન દ્વારા EVM મશીનની કાર્યપદ્ધતિ સમજાવવામાં આવી હતી, જેમાં મતદાન કેવી રીતે થાય છે, મતની સુરક્ષા કેવી રીતે જળવાઈ રહે છે અને સમગ્ર પ્રક્રિયા કેવી રીતે પારદર્શક રીતે પૂર્ણ થાય છે તે અંગે વિગતવાર માહિતી આપવામાં આવી હતી. ટેકનોલોજીના ઉપયોગથી મતદાન પ્રક્રિયા વધુ સરળ, ઝડપી અને વિશ્વસનીય બને છે તે બાબત પર ખાસ ભાર મૂકવામાં આવ્યો હતો.
વિદ્યાર્થીઓએ આ માહિતીને સમજ્યા બાદ પોતાના પરિવારજનો અને સમાજમાં અન્ય નાગરિકોને પણ સાચી અને સ્પષ્ટ માહિતી પહોંચાડવાનો સંકલ્પ વ્યક્ત કર્યો હતો. આ અભિયાન દ્વારા યુવા પેઢી માત્ર શીખવા પૂરતી મર્યાદિત રહી નથી, પરંતુ તે મતદાન જાગૃતિના દૂત તરીકે પણ કાર્ય કરી રહી છે.
આ ઉપરાંત શાળાઓમાં ચર્ચાસત્રો, પ્રશ્નોત્તરી કાર્યક્રમો અને પ્રદર્શન દ્વારા પણ વિદ્યાર્થીઓમાં જાગૃતિ લાવવામાં આવી હતી. શિક્ષણ વિભાગ દ્વારા આ કાર્યક્રમોનું આયોજન કરીને નાગરિકોમાં મતદાન પ્રત્યે વિશ્વાસ વધારવા સાથે સાથે ગેરસમજ દૂર કરવાનો પ્રયાસ કરવામાં આવ્યો છે.
સમગ્ર જિલ્લામાં ચાલી રહેલા આ અભિયાનથી લોકશાહીના પાયા મજબૂત બનાવવા માટે મહત્વપૂર્ણ યોગદાન મળી રહ્યું છે. આગામી દિવસોમાં પણ મતદાન જાગૃતિ માટે વિવિધ કાર્યક્રમો યોજાશે, જેના કારણે વધુમાં વધુ નાગરિકો મતદાન પ્રક્રિયામાં ભાગ લેશે તેવી આશા વ્યક્ત કરવામાં આવી છે.
