આંતરરાષ્ટ્રીય યોગ દિવસ નિમિત્તે કોટેશ્વર (મોટેરા) ગાર્ડનમાં યોગોત્સવ યોજાયો
રિપોર્ટર
હિતેન્દ્ર ગોસાઈ
અમદાવાદ
આંતરરાષ્ટ્રીય યોગ દિવસ નિમિત્તે અમદાવાદના કોટેશ્વર (મોટેરા) ગાર્ડનમાં યોગ કાર્યક્રમનું આયોજન કરવામાં આવ્યું હતું. પ્રકૃતિની મધુર વચ્ચે આયોજિત આ કાર્યક્રમમાં સ્થાનિક નાગરિકોએ ઉત્સાહપૂર્વક ભાગ લઈ યોગ અને ધ્યાનના મહત્ત્વને અનુભવું હતું. યોગ દિવસની ઉજવણી પ્રસંગે આરોગ્યપ્રદ જીવનશૈલી, માનસિક શાંતિ અને સકારાત્મક જીવનદૃષ્ટિનો સંદેશ પણ આપવામાં આવ્યો હતો.
કાર્યક્રમ દરમિયાન ઉપસ્થિત યોગપ્રેમીઓએ વિવિધ યોગાસનો, પ્રાણાયામ અને ધ્યાનની પ્રક્રિયાઓમાં સહભાગી બની શરીર અને મનને તંદુરસ્ત રાખવા માટે યોગની આવશ્યકતા પર ભાર મૂક્યો હતો. યોગ નિષ્ણાતોએ જણાવ્યું હતું કે નિયમિત યોગ અને મેડિટેશનથી શરીરની લવચીકતા વધે છે, મનને શાંતિ મળે છે, તણાવમાં ઘટાડો થાય છે અને દૈનિક જીવનમાં કાર્યક્ષમતા તથા એકાગ્રતા બંનેમાં વધારો થાય છે. આજની ભાગદોડભરી જીવનશૈલીમાં યોગ માત્ર વ્યાયામ નથી, પરંતુ સ્વસ્થ અને સંતુલિત જીવન જીવવાનો અસરકારક માર્ગ છે.
કોટેશ્વર (મોટેરા) ગાર્ડનમાં લાંબા સમયથી યોગ પ્રવૃત્તિઓ સાથે સંકળાયેલા રશ્મિકાબેન પંડ્યા અને તેમની ટીમ દ્વારા અહીં રોજ સવાર અને સાંજ નિયમિત યોગ સત્રો યોજવામાં આવે છે. આ સત્રોમાં આશરે 25થી 30 જેટલા નાગરિકો સતત જોડાઈ યોગાભ્યાસ કરે છે. યોગ દિવસના અવસરે યોજાયેલા વિશેષ કાર્યક્રમમાં પણ સહભાગીઓએ ઉત્સાહપૂર્વક હાજરી આપી યોગને દૈનિક જીવનનો અભિન્ન ભાગ બનાવવાનો સંકલ્પ વ્યક્ત કર્યો હતો.
આ પ્રસંગે યોગના આરોગ્યલક્ષી લાભો અંગે પણ માર્ગદર્શન આપવામાં આવ્યું હતું. નિષ્ણાતોના જણાવ્યા મુજબ યોગ દ્વારા અનેક સામાન્ય શારીરિક તકલીફોમાં રાહત મળી શકે છે, શ્વાસપ્રક્રિયા મજબૂત બને છે, ઊંઘની ગુણવત્તા સુધરે છે અને મનમાં સકારાત્મકતા વિકસે છે. ખાસ કરીને ધ્યાન અને પ્રાણાયામ માનસિક તાણ ઘટાડવામાં અને આંતરિક શાંતિ પ્રાપ્ત કરવામાં મહત્વપૂર્ણ ભૂમિકા ભજવે છે.
કાર્યક્રમમાં ઉપસ્થિત નાગરિકોએ જણાવ્યું હતું કે યોગ શરીર અને મન બંનેને સક્રિય રાખે છે અને જીવનમાં નિયમિતતા, સંયમ તથા સ્ફૂર્તિ લાવે છે. યોગ દિવસની ઉજવણી માત્ર એક દિવસ પૂરતી મર્યાદિત ન રહે, પરંતુ લોકો રોજિંદા જીવનમાં યોગ અપનાવે તેવા હેતુ સાથે આ કાર્યક્રમનું આયોજન કરવામાં આવ્યું હતું.
આંતરરાષ્ટ્રીય યોગ દિવસની આ ઉજવણી દ્વારા કોટેશ્વર (મોટેરા) વિસ્તારમાં આરોગ્ય જાગૃતિનો સકારાત્મક સંદેશ પ્રસરી ગયો હતો. ગાર્ડનમાં યોજાયેલ આ યોગોત્સવે લોકોને સ્વસ્થ જીવનશૈલી તરફ પ્રેરિત કર્યા હતા અને યોગને જનઆંદોલનરૂપે સ્વીકારવાની ભાવના વધુ મજબૂત બનાવી હતી.
