MORBI:મોરબી ખોટા દસ્તાવેજો બનાવી ખેડૂત બનનાર અને પ્રોહિબિશનના ગુનામાં ફરાર આરોપી ઝડપાયો
MORBI:મોરબી ખોટા દસ્તાવેજો બનાવી ખેડૂત બનનાર અને પ્રોહિબિશનના ગુનામાં ફરાર આરોપી ઝડપાયો
મોરબી સીટી ‘એ’ ડિવિઝન પોલીસ સ્ટેશનના સર્વેલન્સ સ્ટાફને એક મોટી સફળતા મળી છે. પોલીસે છેલ્લા આઠ મહિનાથી પોલીસને થાપ આપી નાસતા ફરતા અને નકલી દસ્તાવેજોના આધારે ખેડૂતનું ખોટું નામ ધારણ કરનાર તેમજ પ્રોહિબિશન (દારૂબંધી)ના ગુનામાં છેલ્લા ત્રણ મહિનાથી વોન્ટેડ આરોપીને ઝડપી પાડી કાયદેસરની કાર્યવાહી હાથ ધરી છે.
મોરબીના ભક્તિનગર સર્કલ પાસે રાફડાની વાડીમાં રહેતા બાબુભાઈ તળશીભાઈ ચાવડાએ મોરબી સીટી ‘એ’ ડિવિઝન પોલીસ સ્ટેશનમાં એક ફરિયાદ નોંધાવી હતી. ફરિયાદ અનુસાર, આરોપીઓએ તેમના પિતાજીના નામના ખોટા અને બનાવટી સરકારી ઓળખપત્રો (જેમ કે આધારકાર્ડ અને પાનકાર્ડ) તેમજ નકલી વારસાઈ પેઢી આંબો તૈયાર કર્યો હતો. આ નકલી દસ્તાવેજોના આધારે આરોપીઓએ ખોટા ખેડૂત ખાતેદાર તરીકે ઓળખ ઊભી કરી, અન્ય સાથીદારો સાથે મળીને આ નકલી આંબો સાચા તરીકે ઉપયોગમાં લીધો હતો અને છેતરપિંડી આચરી હતી. આ અંગે પોલીસે ગુનો નોંધી તપાસ શરૂ કરી હતી.
આ ગુનામાં સંડોવાયેલો આરોપી દર્શીતભાઈ પ્રવીણભાઈ મેવાડા (ઉંમર વર્ષ ૩૦), જે હાલ મોરબીના શનાળા રોડ પર આવેલા ગુજરાત હાઉસિંગ બોર્ડ, ગરબી ચોક, ત્રણ માળિયામાં રહે છે (મૂળ રહેવાસી: હરીપર, તાલુકો: લાલપુર, જીલ્લો: જામનગર), છેલ્લા આઠ મહિનાથી પોલીસ પકડથી દૂર નાસતો ફરતો હતો. આ ઉપરાંત, તે મોરબી સીટી ‘એ’ ડિવિઝન પોલીસ સ્ટેશનમાં જ નોંધાયેલા એક પ્રોહિબિશનના ગુનામાં પણ છેલ્લા ત્રણ મહિનાથી વોન્ટેડ હતો.
દરમિયાન, મોરબી સીટી ‘એ’ ડિવિઝન પોલીસના સર્વેલન્સ સ્ટાફને ચોક્કસ બાતમી મળી હતી કે આ બંને ગુનામાં નાસતો ફરતો આરોપી મોરબીમાં જ હાજર છે. બાતમીના આધારે પોલીસે ત્વરિત કાર્યવાહી કરીને આરોપી દર્શીત મેવાડાને દબોચી લીધો હતો અને તેની સામે આગળની કાયદેસરની કાર્યવાહી શરૂ કરી છે.
