7 એપ્રિલ જીતેશ જોષી પાલનપુર બનાસકાંઠા
વડગામમાં સેવાનું અમૃત: ઝૂપડપટ્ટીની ૧૧ કન્યાઓના હસ્તે ‘પાણીની પરબ’નો શુભારંભ
ભીષણ ગરમીમાં માનવતા મહેકી ઉઠી છે. બનાસકાંઠા જિલ્લાના વડગામ ખાતે જન સેવા ચેરિટેબલ ટ્રસ્ટ સંચાલિત મહારાણા પ્રતાપ સેવા ગ્રુપ દ્વારા સતત ૫માં વર્ષે સેવાકીય પરંપરા જાળવી રાખતા, વડગામ બસ સ્ટેન્ડ પર મુસાફરો અને જનતા માટે ઠંડા પાણીની પરબ શરૂ કરવામાં આવી છે.બાલિકાઓના હસ્તે ઉદ્ઘાટન અને સન્માન
આ વર્ષે કાર્યક્રમની વિશેષતા એ રહી કે, કોઈ રાજકીય નેતા કે મહાનુભાવના બદલે, સમાજના છેવાડાના સ્તર એટલે કે ઝૂપડપટ્ટી વિસ્તારમાં રહીને અભ્યાસ કરતી ૧૧ નાની બાળાઓના વરદ હસ્તે આ પરબનું ઉદ્ઘાટન કરાવવામાં આવ્યું હતું. સંસ્થા દ્વારા આ દીકરીઓનું તિલક કરી શાસ્ત્રોક્ત વિધિથી સન્માન કરવામાં આવ્યું હતું અને પ્રોત્સાહન રૂપે તેમને સુંદર ભેટ (ગિફ્ટ) પણ આપવામાં આવી હતી.સેવાનો ઉમદા હેતુ.વડગામમાં ઉનાળાની કાળઝાળ ગરમીમાં બહાર ગામથી આવતા મુસાફરો અને સ્થાનિક રાહદારીઓને પીવાનું ઠંડુ પાણી મળી રહે તેવા શુદ્ધ આશયથી આ વ્યવસ્થા કરવામાં આવી છે. મહારાણા પ્રતાપ સેવા ગ્રુપ છેલ્લા પાંચ વર્ષથી આ પ્રવૃત્તિ કરી રહ્યું છે, જેની સ્થાનિકો દ્વારા ખૂબ પ્રશંસા કરવામાં આવી રહી છે.
”સમાજની દીકરીઓ જ્યારે કોઈ શુભ કાર્યની શરૂઆત કરે ત્યારે તેમાં ઈશ્વરનો આશીર્વાદ ભળે છે. ઝૂપડપટ્ટીમાં ભણતી આ દીકરીઓને સન્માન આપીને અમે સાચા અર્થમાં સેવાનો સંતોષ અનુભવ્યો છે.” – આયોજક સમિતિ, જન સેવા ચેરિટેબલ ટ્રસ્ટ.આ પ્રસંગે ટ્રસ્ટના સભ્યો, સ્થાનિક આગેવાનો અને મોટી સંખ્યામાં નગરજનો ઉપસ્થિત રહ્યા હતા.
