આંતરરાષ્ટ્રીય સહકાર વર્ષની ઉજવણી અંતર્ગત અમદાવાદના ધાર્મિક સ્થળોએ સાફસફાઈ અભિયાન
રિપોર્ટર
હિતેન્દ્ર ગોસાઈ
અમદાવાદ
અમદાવાદ: સંયુક્ત રાષ્ટ્ર દ્વારા વર્ષ 2025ને ‘આંતરરાષ્ટ્રીય સહકાર વર્ષ’ તરીકે જાહેર કરાયું છે, જે વડાપ્રધાન નરેન્દ્રભાઈ મોદી અને કેન્દ્રીય ગૃહ અને સહકાર મંત્રી અમિત શાહ દ્વારા પ્રસ્તાવિત ‘સહકારથી સમૃદ્ધિ’ના સંકલ્પને વૈશ્વિક માન્યતા આપતું પગલું છે.
આ જાહેરાતના અનુસંધાને, ગુજરાત રાજ્ય સ્થાપના દિવસ નિમિત્તે તારીખ 1 મે, 2025ના રોજ જિલ્લા રજિસ્ટ્રાર, સહકારી મંડળીઓ અમદાવાદ (શહેર)ની કચેરી દ્વારા શહેરના વિવિધ ધાર્મિક સ્થળોએ સવારે 8:00થી 10:00 કલાક દરમિયાન વિશાળ સ્વચ્છતા અભિયાનનું આયોજન કરવામાં આવ્યું.
આ સફાઈ અભિયાનના અંતર્ગત ઇસ્કોન મંદિર, પ્રેરણાતીર્થ દેરાસર, લક્ષ્મીમાતાજીનું મંદિર, હીરામણિ સ્કૂલ, વૈષ્ણોદેવી સ્કૂલ, લાંભા બળિયાદેવનું મંદિર તથા થલતેજ મહાદેવજીના મંદિર સહિત અનેક સ્થળોએ સાફસફાઈ કરવામાં આવી.
શહેરના વેજલપુર ક્ષેત્રના ધારાસભ્ય અમિત ઠાકર ઇસ્કોન મંદિર ખાતે યોજાયેલા કાર્યક્રમમાં વ્યક્તિગત ઉપસ્થિતિ સાથે જોડાયા અને ઝાડૂ હાથમાં લઈ સફાઈ કાર્યમાં સહભાગી બન્યા.
આ અભિયાનમાં સહકારી મંડળીના સભ્યો, વિવિધ સંસ્થાઓ સાથે જોડાયેલા નાગરિકો અને સ્થાનિક લોકોએ ઉત્સાહપૂર્વક ભાગ લીધો હતો. કાર્યક્રમનો મુખ્ય ઉદ્દેશ સમાજમાં સહકારની ભાવનાનું સંવર્ધન અને મહાત્મા ગાંધી દ્વારા આપવામાં આવેલ ‘સ્વચ્છતા એ જ સેવા’ના સિદ્ધાંતને લોકચેતનામાં પરિવર્તિત કરવો રહ્યો.
સ્વચ્છતા અને સહકારના સિદ્ધાંતો પર આધારિત આ અભિયાન માટે જિલ્લા કચેરીએ સફળ સંકલન અને વિસ્તૃત ભાગીદારી દ્વારા લોકસભાગ ધરાવતો ઉદાહરણ પૂરું પાડ્યું.
