નિરોણા ગ્રામ પંચાયત મધ્યે બંધારણ દિવસની ભવ્ય ઉજવણી કરવામાં આવી.
ભારત રત્ન ડૉ બાબાસાહેબ આંબેડકરની પ્રતિમાને હારારોપણ કરાયુ.
વાત્સલ્યમ્ સમાચાર.
રિપોર્ટ :- રમેશ મહેશ્વરી – નખત્રાણા કચ્છ.
નખત્રાણા,તા- ૨૬ નવેમ્બર : ભારતના બંધારણ દિવસ નિમિત્તે નિરોણા ગ્રામ પંચાયત દ્વારા પંચાયત મધ્યે ભવ્ય ઉજવણી કાર્યક્રમનું આયોજન કરવામાં આવ્યું હતુ. કાર્યક્રમની શરૂઆત ભારત રત્ન ડૉ. બાબાસાહેબ આંબેડકરની પ્રતિમાને પુષ્પાંજલિ તેમજ હારારોપણ અર્પણ કરીને કરવામાં આવી.કાર્યક્રમમાં નિરોણા ગ્રામ પંચાયતના યુવા સરપંચ એન. ટી. આહીર, તલાટી ધ્રુવીબેન, નિરોણા હાઈસ્કૂલના આચાર્ય વિષ્ણુભાઈ ચૌધરી, વરિષ્ઠ શિક્ષક અલ્પેશભાઈ જાની સહિત ગામના આગેવાનો ઉપસ્થિત રહ્યા.
સંબોધનમાં સરપંચ શ્રી એન. ટી. આહીરે જણાવ્યું હતું કે “ભારતીય સંવિધાન માત્ર કાનૂની દસ્તાવેજ નહીં, પરંતુ દેશના દરેક નાગરિક માટે માર્ગદર્શક ગ્રંથ છે.” તેમણે ઉમેર્યું કે “લોકતંત્રને મજબૂત બનાવવા નાગરિકોએ હક્કો સાથે ફરજોનું નિષ્ઠાપૂર્વક પાલન કરવું પણ એટલુ જ જરૂરી છે.” આ અવસરે સંવિધાનમાં સમાવાયેલ મૂળભૂત અધિકારો અને ફરજો અંગે ગ્રામજનોને માહિતગાર કરવામાં આવ્યા.અંતમાં સરપંચ એન. ટી. આહીરે કાર્યક્રમને સફળ બનાવવા બદલ ઉપસ્થિત ગ્રામજનો અને કર્મચારીઓનો આભાર વ્યક્ત કર્યો.
