તા.૦૫.૦૭.૨૦૨૬
વાત્સલ્યમ્ સમાચાર
અજય સાંસી દાહોદ
Zalod:દાહોદ જિલ્લાના ઝાલોદમાં ‘લૂટેરી દુલ્હન’ ગેંગનો મોટો ખેલ: લગ્નના નામે યુવક પાસેથી ₹૨.૪૦ લાખ પડાવી નવવધૂ ફરાર 
દાહોદ જિલ્લાના ઝાલોદ તાલુકામાં લગ્નના નામે છેતરપિંડી કરતી એક શાતિર ‘લૂટેરી દુલ્હન’ ગેંગનો પર્દાફાશ થયો છે.લગ્નના પવિત્ર બંધનનો સહારો લઈને ભોળા પરિવારોને શિકાર બનાવતી આ ગેંગે ઝાલોદના એક યુવકને પોતાના જાળમાં ફસાવી ₹૨.૪૦ લાખની મોટી રકમ પડાવી લીધી હોવાની ચોંકાવનારી ઘટના સામે આવી છે. નકલી લગ્ન કરાવીને માત્ર બે જ દિવસમાં દુલ્હન રોકડ રકમ સાથે રફુચક્કર થઈ જતાં સમગ્ર પંથકમાં ભારે ચકચાર મચી ગઈ છે.દલાલોની જાળમાં ફસાયો પરિવાર મળતી માહિતી મુજબ, ભોગ બનનાર યુવકનો પરિવાર લાંબા સમયથી લગ્ન માટે કન્યાની શોધમાં હતો. આ દરમિયાન લગ્ન કરાવી આપતા વચેટિયા (દલાલો) આ પરિવારના સંપર્કમાં આવ્યા હતા. દલાલોએ યુવકના પરિવારને લગ્નની લાલચ આપી પૂર્વયોજિત કાવતરાના ભાગરૂપે કન્યા પક્ષ વતી ₹૨.૪૦ લાખની માંગણી કરી હતી. પરિવારના સભ્યોએ દલાલો પર વિશ્વાસ મૂકીને આ રકમ ચૂકવી દીધી હતી.નકલી લગ્ન અને પૂર્વયોજિત ચાલ સામે પક્ષે રહેલી ગેંગે પરિવારનો વિશ્વાસ જીતવા માટે અસલી દેખાતા આધારકાર્ડ સહિતના ઓળખપત્રો પણ બતાવ્યા હતા, જે કાવતરાનો એક ભાગ હોવાનું મનાય છે. ત્યારબાદ શાસ્ત્રોક્ત વિધિ અને ફુલહાર પહેરાવીને ધામધૂમથી લગ્ન પણ કરાવી દેવામાં આવ્યા હતા. લગ્ન સંપન્ન થતાં જ પરિવારમાં ખુશીનો માહોલ હતો, પરંતુ તેઓ એ વાતથી તદ્દન અજાણ હતા કે તેઓ એક મોટી છેતરપિંડીનો ભોગ બની ચૂક્યા છે.‘કાકાના અકસ્માત’નું બહાનું અને ફરારલગ્નના માત્ર બે જ દિવસ સુખરૂપ વિત્યા બાદ, નવવધૂએ અચાનક એક ડ્રામા શરૂ કર્યો હતો. તેણે સાસરી પક્ષને જણાવ્યું કે તેના કાકાનો ગંભીર અકસ્માત થયો છે અને તેણે તાત્કાલિક પિયર જવું પડશે. ચિંતાતુર સાસરી પક્ષે તેને પિયર જવા માટે મંજૂરી આપી હતી. જોકે, દુલ્હન સ્થાનિક બસ સ્ટેન્ડ પર પહોંચતા જ પિયર જવાને બદલે ત્યાં પહેલાથી જ વાહનની રાહ જોઈને ઉભેલા એક અજાણ્યા શખ્સ સાથે બાઇક કે ગાડી પર બેસીને રફુચક્કર થઈ ગઈ હતી.ઝાલોદ પોલીસ એક્શનમાં: વધુ ભોગ બનનારા સામે આવવાની આશંકાદુલ્હન અચાનક ગાયબ થઈ જતાં અને દલાલોના ફોન બંધ આવતા પરિવારને પોતાની સાથે થયેલી છેતરપિંડીનો અહેસાસ થયો હતો. આ અંગે તુરંત જ ઝાલોદ પોલીસ સ્ટેશનમાં ફરિયાદ નોંધાવવામાં આવી છે. ઝાલોદ પોલીસે ગુનો નોંધીને ફરાર થયેલી લૂટેરી દુલ્હન, તેને ભગાડી જનાર અજાણ્યા શખ્સ અને આ લગ્ન કરાવનાર દલાલોની ટોળકીને પકડવા માટે ચક્રો ગતિમાન કર્યા છે. લગ્નના નામે આ રીતે છેતરપિંડી કરતી ગેંગ સક્રિય હોવાથી પોલીસે સ્થાનિક લોકોને કોઈપણ અજાણી વ્યક્તિ કે દલાલો પર આંધળો વિશ્વાસ ન કરવા અને લગ્ન પહેલા કન્યા પક્ષની પૂરેપૂરી ચકાસણી કરવા ચેતવણી આપી છે. પોલીસ સૂત્રોના જણાવ્યા અનુસાર, આ એક બહુ મોટી સંગઠિત ગેંગ હોઈ શકે છે. આગામી દિવસોમાં તપાસ દરમિયાન આ વિસ્તારના અન્ય કેટલાય ભોળા પરિવારો પણ આ ગેંગનો ભોગ બન્યા હોવાના ચોંકાવનારા ખુલાસા સામે આવી શકે છે
