MORBI:મોરબીના લીલાપર આવાસ યોજનાના હોલમાંથી કિંમતી એલ્યુમિનિયમ ટ્યુબલાઈટનો મોટો જથ્થો ગાયબ; ચોરીની શંકા સાથે કોંગ્રેસની તપાસની માંગ
MORBI: મોરબીના લીલાપર આવાસ યોજનાના હોલમાંથી કિંમતી એલ્યુમિનિયમ ટ્યુબલાઈટનો મોટો જથ્થો ગાયબ; ચોરીની શંકા સાથે કોંગ્રેસની તપાસની માંગ
મોરબી શહેરના લીલાપર આવાસ યોજનામાં આવેલ હોલમાંથી સરકારી કિંમતી એલ્યુમિનિયમ ટ્યુબલાઈટનો મોટો જથ્થો શંકાસ્પદ રીતે ગાયબ થઈ ગયો હોવાનો ગંભીર આક્ષેપ મોરબી શહેર કોંગ્રેસ સમિતિના પ્રમુખ પુષ્પરાજસિંહ જાડેજા દ્વારા કરવામાં આવ્યો છે. આ બાબતે તેમણે મોરબી મહાનગરપાલિકાના કમિશનરને લેખિત રજૂઆત કરી તાકીદે તપાસ કરવાની માંગ કરી છે.
મહાનગરપાલિકાના કમિશનરને પાઠવેલા પત્રમાં શહેર કોંગ્રેસ પ્રમુખ પુષ્પરાજસિંહ જાડેજાએ જણાવ્યું છે કે, લીલાપર આવાસ યોજનાના હોલમાં એલ્યુમિનિયમ બોક્સવાળી ટ્યુબલાઈટોનો મોટો જથ્થો રાખવામાં આવ્યો હતો. તારીખ ૨૮ સપ્ટેમ્બર ૨૦૨૨ના રોજ આ જથ્થો ત્યાં જ પડ્યો હોવાના પુરાવા રૂપે સ્થાનિક નાગરિકોએ ફોટોગ્રાફ્સ લીધા હતા.
તાજેતરમાં આ ફોટોગ્રાફ્સ સામે આવ્યા બાદ, એક જનપ્રતિનિધિ તરીકે પુષ્પરાજસિંહ જાડેજાએ રૂબરૂ સ્થળ મુલાકાત લીધી હતી. આ મુલાકાત દરમિયાન હોલમાં એક પણ ટ્યુબલાઈટ જોવા મળી ન હતી.
“એલ્યુમિનિયમ એક કિંમતી ધાતુ છે. આવાસ યોજનાના હોલમાં રાખવામાં આવેલી કિંમતી એલ્યુમિનિયમ ટ્યુબલાઈટોનો આખો જથ્થો ગાયબ થઈ જવો એ પ્રાથમિક દ્રષ્ટિએ ચોરી થઈ હોવાની આશંકા જન્માવે છે.”— પુષ્પરાજસિંહ જાડેજા (પ્રમુખ, મોરબી શહેર કોંગ્રેસ)
કોંગ્રેસની મુખ્ય માંગણીઓ:પત્ર દ્વારા તંત્ર સમક્ષ નીચે મુજબના સવાલો ઉઠાવી કાર્યવાહીની માંગ કરવામાં આવી છે:સ્થળાંતર કે ચોરી? શું આ ટ્યુબલાઈટોનો જથ્થો મહાનગરપાલિકા દ્વારા અન્ય કોઈ સુરક્ષિત જગ્યાએ ખસેડવામાં આવ્યો છે કે પછી તેને ભંગારમાં વેચી દેવામાં આવ્યો છે? તેની સ્પષ્ટતા કરવામાં આવે.
લોકેશન જાહેર કરો: જો પાલિકા હસ્તક આ જથ્થો લેવામાં આવ્યો હોય, તો તે હાલ કઈ જગ્યાએ સ્ટોર કરાયો છે તેની વિગતો જાહેર થાય.
કાયદેસરની કાર્યવાહી: જો આ કિંમતી જથ્થાની ચોરી થઈ હોવાનું તપાસમાં બહાર આવે, તો જવાબદારો સામે તાત્કાલિક ધોરણે કાયદેસરની પોલીસ ફરિયાદ દાખલ કરી કડક પગલાં લેવામાં આવે.
હવે જોવાનું એ રહેશે કે આ ગંભીર રજૂઆત બાદ મોરબી મહાનગરપાલિકાના તંત્ર દ્વારા આ મામલે શું તપાસ હાથ ધરવામાં આવે છે અને ગાયબ થયેલી ટ્યુબલાઈટોનો ભેદ ઉકેલાય છે કે નહીં.
