વાત્સલ્યમ સમાચાર
મદન વૈષ્ણવ
હાલમાં થોડા દિવસમાં ડાંગ દરબારનો ભાતિગળ મેળો યોજાનાર છે ત્યારે પરંપરાગત ડાંગ દરબાર ગ્રાઉન્ડમાં જ આ મનોરંજન મેળાનું આયોજન થાય છે તે જ સ્થળ પર કાયમી આ મેળાનું આયોજન કરવામાં આવે તેવી માંગ સાથે આહવા નગરના વેપારીઓએ ડાંગ જિલ્લા કલેકટરને આવેદનપત્ર પાઠવ્યુ હતુ.ડાંગ દરબારનો ભાતીગળ મેળો ડાંગ જિલ્લાની શાન છે. જેમાં દર વર્ષે ગુજરાત રાજયના મહામહીમ રાજયપાલનાં હસ્તે ડાંગ દરબારનો શુભારંભ કરાવી ડાંગનાં પાંચેય રાજવીઓને સાલીયાણુ આપવામાં આવે છે.અને લોકોનાં મનોરંજન માટે મેળાનો પ્રારંભ કરવામાં આવે છે. આ પ્રથા બ્રિટીશકાળથી પરંપરાગત ચાલતી આવેલ છે. જે ડાંગ જિલ્લામાં તમામ રહેતા લોકો માટે એક ગૌરવ અને સન્માન આપનારી છે.વર્ષો વર્ષથી પરંપરાગત ડાંગ દરબારનો મનોરંજન મેળો તાલુકા સ્કુલની બાજુમાં આવેલ આહવા નગરનાં મધ્ય કેન્દ્ર સમાન ગ્રાઉન્ડમાં તમામ નાની – મોટી મનોરંજનની રાઈડસો લગાડવામાં આવે છે.અને ડાંગ જીલ્લાના તમામ લોકો મનોરંજનનો ઉત્સાહ પુર્વક આનંદ માણતા આવેલા છે.અને આ ગ્રાઉન્ડના આજુબાજુના પરીસરમાં નાના મોટા તમામ વેપારીઓ પોતાનો વેપાર કરી ગુજરાન ચલાવતા આવેલા છે.હાલ ડાંગ -2025નું આયોજન કરવાની શરૂઆત થયેલ છે.જેમાં વહીવટી તંત્ર દ્વારા ડાંગ દરબારનાં મનોરંજનની પ્રવૃતિઓ નાની મોટી રાઈડસો માટે એક નવા ગ્રાઉન્ડની જગ્યાએ ખસેડવાની ચર્ચા-વિચારણા તેમજ આયોજન ચાલી રહેલ છે.ત્યારે વર્ષોથી અને પરંપરાગત રીતે ચાલી આવેલ મેળો જે ગ્રાઉન્ડમાં ભરાય છે. તે ગ્રાઉન્ડ ગામના મધ્ય કેન્દ્રમાં આવેલ હોય તમામ લોકો તેમજ વેપારીઓ માટે સલામતી તેમજ હીતાવહ છે. અને તમામ વેપારીઓ આ મનોરંજન પ્લોટની આજુબાજુમાં વર્ષોથી વેપાર ધંધો કરી પોતાનો ધંધો ચલાવતા આવેલ છે.ડાંગ દરબાર મેળામાં લોકો મનોરંજન પ્રવૃતિઓનો આનંદ માણી નાની મોટી ખરીદીઓ કરતા હોય છે અને જનમેદની પણ આજ વિસ્તારમાં વધુ હોય છે અને જેના પર વેપારીઓનો ધંધો અવલંબિત છે.આહવા નગરનાં વેપારીઓ આખા વર્ષ દરમ્યાન આ મેળાની રાહ જોઈ તમામ વેપારીઓ પોતાના ધંધાનો માલ-સામાનની ખરીદી કરતા હોય છે. અને મેળાનાં વેપાર ધંધાથી વેપારીઓની આર્થિક પરિસ્થિતી સુધરે છે.જો આ ડાંગ દરબાર મેળાનુ સ્થળ કોઈપણ કારણોસર બદલવામાં આવે તો વેપાર કરતા તમામ વેપારીઓને મેળા થકી ઉભી થતી આવકમાં ભારે આર્થિક નુકશાન ભોગવવાનો વારો આવશે.તેમજ વેપારીઓનો તમામ ધંધો આ મનોરંજન રાઈડસના વિસ્તાર પર અવલંબિત છે.જેથી વર્ષોથી ચાલી આવેલ મેળાનુ સ્થળ એજ સ્થળે રાખવામા આવે તેમજ વધુમાં વર્ષોથી ચાલી આવેલ આ મેળામાં મનોરંજન રાઈડસ ચલાવનાર તમામ વેપારી તથા સંચાલકો તમામ સલામતીને નિયમોનુ પાલન કરતા હોય આજ દિન સુધી કોઈપણ અકસ્માત કે જાનહાની થયેલ નથી.તેમજ ભવિષ્યમાં પણ કોઈ બનાવ ન બને તેની તમામ પ્રકારની ઝીણવટ પુર્વકની કાળજી અને તકેદારી રાખવામાં આવશે તેવી બાહેંધરી આહવા નગરના વેપારીઓ દ્વારા આપવામાં આવી હતી અને પરંપરાગત ડાંગ દરબાર ગ્રાઉન્ડમાં જ ડાંગ દરબાર નાં મેળાનું આયોજન કરવામાં આવે તેવી માંગ સાથે વેપારીઓએ જિલ્લા કલેકટરને લેખિતમાં રજૂઆત કરી હતી.અત્રે ઉલ્લેખનીય છે કે ડાંગ દરબારનું મુખ્ય આકર્ષણ એવુ મનોરંજન સ્થળ જો મૂળ જગ્યાએથી ખસેડીને અન્ય જગ્યાએ સ્થળાંતરીત કરવામાં આવશે તો આવનાર દિવસોમાં ડાંગની ઓળખ અને અસ્મિતા સાથે જોડાયેલ ડાંગ દરબારનાં અસ્તિત્વ સામે ખતરો મંડરાશેનું બુધ્ધિજીવો માની રહ્યા છે.આજે ડાંગની ઓળખ સમાન ડાંગ દરબારનાં મનોરંજનનું સ્થળ અન્ય જગ્યાએ ખસેડવાની તજવીજ હાથ ધરવામાં આવી રહી છે.તો કાલ ઉઠી ડાંગ જિલ્લાનું વહીવટી તંત્ર ડાંગ દરબારને જ ભૂંસી ન નાખે તેવી પણ ચર્ચાએ જોર પકડયુ છે.ત્યારે આ મુદ્દે રાજય સરકાર યોગ્ય નિરાકરણ લાવે તે જરૂરી બની ગયુ છે..
