વાત્સલ્યમ્ સમાચાર,
પૂજા ઠક્કર – મુંદરા કચ્છ.
કચ્છના વહીવટી તંત્રમાં મોટો ફેરફાર: કચ્છ કલેક્ટર અને ગાંધીધામ મ્યુનિસિપલ કમિશનરની બદલી
મુંદરા, બુધવાર, ૧૩ મે ૨૦૨૬:
ગુજરાત સરકારના સામાન્ય વહીવટ વિભાગ દ્વારા આજે રાજ્યના ૭૨ IAS અધિકારીઓની સામુહિક બદલીના આદેશો જારી કરી વહીવટી માળખામાં વ્યાપક ફેરબદલ કરવામાં આવ્યા છે જેની સીધી અસર કચ્છ જિલ્લાના વહીવટી તંત્ર પર જોવા મળી છે. કચ્છ-ભુજ કલેક્ટર તરીકે કાર્યરત ૨૦૧૦ બેચના સિનિયર IAS અધિકારી શ્રી આનંદ બાબુલાલ પટેલની બદલી ગાંધીનગર ખાતે સ્કૂલ કમિશનર તરીકે કરવામાં આવી છે. વધારામાં તેઓ કમિશનર, પીએમ-પોષણ યોજના (મિડ-ડે-મીલ) અને નિયામક, GCERT (ગાંધીનગર) તરીકેનો પણ કાર્યભાર સંભાળશે. તેમના સ્થાને હવે કચ્છના નવા કલેક્ટર તરીકે જૂનાગઢથી બદલી થઈને આવતા ૨૦૧૪ બેચના અધિકારી શ્રી અનિલકુમાર રામજીભાઈ રાણાવસીયા પદભાર સંભાળશે. શ્રી રાણાવસીયા ૨૦૧૪ બેચના ગુજરાત કેડરના IAS અધિકારી છે અને B.Tech. ની ડિગ્રી ધરાવે છે અને અગાઉ અમદાવાદમાં પણ મહત્વની સેવાઓ આપી ચૂક્યા છે. વિદાય લેતા કલેક્ટર શ્રી આનંદ પટેલે તેમના કાર્યકાળ દરમિયાન જિલ્લાના કર્મચારીઓના માનસિક સ્વાસ્થ્ય માટે વિશેષ પહેલ કરી હતી જેને કારણે તેઓ લોકપ્રિય બન્યા હતા.
જિલ્લામાં અન્ય એક મહત્વના ફેરફારમાં ગાંધીધામ મ્યુનિસિપલ કોર્પોરેશનના કમિશનર શ્રી મનીષ ગુરવાણીની બદલી નવસારીના કલેક્ટર તરીકે કરવામાં આવી છે. ૨૦૧૭ બેચના આ અધિકારી તેમના કડક વહીવટ અને ગાંધીધામમાં ગેરકાયદેસર દબાણો દૂર કરવાની ઝુંબેશ માટે ખૂબ જ ચર્ચામાં રહ્યા હતા. સરકાર દ્વારા તેમને ‘શ્રેષ્ઠ ડીડીઓ (DDO)’ નો એવોર્ડ પણ એનાયત કરવામાં આવ્યો છે. તેમના સ્થાને હવે વડોદરા શહેરી વિકાસ સત્તામંડળ (VUDA) ના ચીફ એક્ઝિક્યુટિવ ઓફિસર શ્રી બી. ડી. દવેરાની ગાંધીધામના નવા મ્યુનિસિપલ કમિશનર તરીકે નિમણૂક કરવામાં આવી છે. શ્રી દવેરા ૨૦૨૧ બેચના IAS અધિકારી છે અને ભૌતિકશાસ્ત્રમાં સ્નાતકની પદવી ધરાવે છે. આમ નવા કલેક્ટર અને નવા મ્યુનિસિપલ કમિશનરની નિમણૂક સાથે કચ્છ જિલ્લાના વહીવટી તંત્રમાં થયેલા આ ફેરફારોથી સરહદી જિલ્લાના વિકાસ કાર્યોને નવી ઉર્જા અને વેગ મળશે તેવી આશા છે.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
