વિજાપુર ગવાડા પ્રાથમિક શાળા ખાતે પર્યાવરણીય જાગૃતિ માટે E-STEM હેન્ડ્સ-ઓન વર્કશોપનું આયોજન
વાત્સલ્યમ સમાચાર
સૈયદજી બુખારી વિજાપુર
વિજાપુર ગવાડા ગામે પ્રાથમિક શાળા ખાતે વિક્રમ એ. સારાભાઇ કોમ્યુનિટી સાયન્સ સેન્ટર (VASCSC), NAAEE, અને Pratt & Whitney ના સહયોગથી ગુજરાતની મર્યાદિત સગવડ ધરાવતી શાળાઓના વિદ્યાર્થીઓમાં પર્યાવરણને લગતા મુદ્દાઓ પ્રત્યે જાગૃતિ લાવવા માટે એક વિશેષ E-STEM (Science, Technology, Engineering and Maths for Environment) હેન્ડ્સ-ઓન વર્કશોપનું આયોજન કરવામાં આવ્યું હતું.આ કાર્યક્રમ અંતર્ગત ગવાડા પ્રાથમિક કન્યા શાળાને વર્કશોપ માટે વિવિધ શૈક્ષણિક સામગ્રી પૂરી પાડવામાં આવી હતી, જેમાં મોનોક્યુલર, આબોહવામાં પરિવર્તન અને ફળાઉ નર્સરી પુસ્તક, વિજ્ઞાન દ્રષ્ટિના ૬ અંક, ગણિત અને રસાયણ વિજ્ઞાનના ૧૨-૧૨ પ્રદર્શન ચાર્ટ, અને ૫૦ ઇકોલોજીકલ પિરામિડનો સમાવેશ થાય છે.આ મળેલા મટીરિયલનો ઉપયોગ કરીને શાળામાં ધોરણ ૬ થી ૮ ની તમામ વિદ્યાર્થીનીઓ માટે વિવિધ એક્ટિવિટીઓનું આયોજન કરવામાં આવ્યું હતું. વિદ્યાર્થીનીઓએ ઉત્સાહભેર આ વર્કશોપમાં ભાગ લીધો હતો.
આ E-STEM વર્કશોપનો મુખ્ય ઉદ્દેશ વિદ્યાર્થીઓને પર્યાવરણીય પડકારોનો સામનો કરવા માટે સક્રિય બનવા સશક્ત બનાવવા માટે અનુભવ-આધારિત અને વ્યવહારુ જ્ઞાન પ્રદાન કરવાનો છે. ઇન્ટરેક્ટિવ પ્રવૃત્તિઓમાં સામેલ થવાથી વિદ્યાર્થીઓમાં અભ્યાસક્રમ-આધારિત STEM વિભાવનાઓ તેમજ રાષ્ટ્રીય શિક્ષણ નીતિ (NEP 2020) ને અનુરૂપ સમજણનો વિકાસ થશે.આ વર્કશોપ દ્વારા વિદ્યાર્થીઓમાં પર્યાવરણીય સંરક્ષણ અને ટકાઉ વિકાસ પ્રત્યેની જવાબદારીની ભાવના વધુ મજબૂત બની છે.
