MORBI:મોરબી જલારામ ધામ ખાતે 59મો નેત્રમણી કેમ્પ યોજાયો; 112 દર્દીઓના રાજકોટ ખાતે ફ્રી ઓપરેશન કરાશે
MORBI:મોરબી જલારામ ધામ ખાતે 59મો નેત્રમણી કેમ્પ યોજાયો; 112 દર્દીઓના રાજકોટ ખાતે ફ્રી ઓપરેશન કરાશે
મોરબીના જલારામ ધામ ખાતે શ્રી રણછોડદાસજી બાપુ ચેરિટેબલ હોસ્પિટલ-રાજકોટ, શ્રી જલારામ ધામ-મોરબી તેમજ આંતરરાષ્ટ્રીય હિન્દુ પરિષદના સંયુક્ત ઉપક્રમે દર માસની 4 તારીખે યોજાતા નિઃશુલ્ક નેત્રમણી-નેત્રયજ્ઞ કેમ્પ અંતર્ગત તાજેતરમાં 4 ઓગસ્ટના રોજ કેમ્પનું આયોજન કરવામાં આવ્યું હતું. આ કેમ્પ સ્વ. રણછોડભાઈ જીવરાજભાઈ કૈલા (હ. રવજીભાઈ કૈલા-ઘુંટુ) પરિવારના આર્થિક સહયોગથી યોજાયો હતો, જેમાં કુલ 260 દર્દીઓએ લાભ લીધો હતો.
કેમ્પ દરમિયાન નિષ્ણાત આંખના તબીબો દ્વારા તમામ દર્દીઓની ગહન તપાસ કરવામાં આવી હતી. તપાસ બાદ મોતિયાબિંદુના ઓપરેશનની જરૂરિયાત ધરાવતા 112 દર્દીઓને નિઃશુલ્ક નેત્રમણી ઓપરેશન માટે રાજકોટ સ્થિત હોસ્પિટલ ખાતે મોકલવામાં આવ્યા હતા. દર્દીઓ માટે જવા-આવવાની બસ વ્યવસ્થા, રહેવા-જમવાની સુવિધા, ઓપરેશન, ચશ્મા, દવાઓ તથા ટીપાં સહિતની તમામ સેવાઓ હોસ્પિટલ દ્વારા સંપૂર્ણપણે વિનામૂલ્યે પૂરી પાડવામાં આવશે.
અત્યાર સુધીની સેવાકીય સફર:
આયોજકો તરફથી મળતી માહિતી મુજબ, મોરબીના જલારામ ધામ ખાતે અત્યાર સુધીમાં આવા કુલ 59 સફળ નેત્રમણી કેમ્પ યોજાઈ ચૂક્યા છે. જેમાં કુલ 16,419 લોકોની આંખોનું નિઃશુલ્ક નિદાન કરવામાં આવ્યું છે અને 7,401થી વધુ દર્દીઓના સફળતાપૂર્વક વિનામૂલ્યે નેત્રમણીના ઓપરેશન કરવામાં આવ્યા છે.
આ કેમ્પને સફળ બનાવવા માટે શ્રી જલારામ સેવા મંડળ, જલારામ ધામ મહિલા મંડળ, તથા આંતરરાષ્ટ્રીય હિન્દુ પરિષદના આગેવાનો અને સ્વયંસેવકોએ ભારે જહેમત ઉઠાવી હતી. સંસ્થા દ્વારા જણાવવામાં આવ્યું છે કે દર મહિનાની 4 તારીખે આ નિઃશુલ્ક કેમ્પનું આયોજન સતત ચાલુ રહેશે. કેમ્પમાં તપાસ અર્થે આવતા દર્દીઓને પોતાનું ઓળખકાર્ડ સાથે લાવવા અપીલ કરવામાં આવી છે.
