MORBI:મોરબી ડોર-ટુ-ડોર વેસ્ટ કલેક્શનના ટ્રેક્ટરમાં બાળમજૂરી કરાવતા કોન્ટ્રાક્ટર સામે ગુનો દાખલ; ૧૩ વર્ષના બાળકને મુક્ત કરાવાયો
MORBI:મોરબી ડોર-ટુ-ડોર વેસ્ટ કલેક્શનના ટ્રેક્ટરમાં બાળમજૂરી કરાવતા કોન્ટ્રાક્ટર સામે ગુનો દાખલ; ૧૩ વર્ષના બાળકને મુક્ત કરાવાયો
મોરબી ખાતે જિલ્લા ચાઇલ્ડ લેબર ટાસ્ક ફોર્સ અને મદદનીશ શ્રમ આયુક્તની કચેરી દ્વારા હાથ ધરવામાં આવેલા સંયુક્ત ચેકિંગ રેડ દરમિયાન બાળમજૂરી કરાવવાનો એક ચોંકાવનારો કિસ્સો પ્રકાશમાં આવ્યો છે. મોરબી મહાનગરપાલિકાના ડોર-ટુ-ડોર કચરા સંગ્રહના કામમાં ૧૩ વર્ષના બાળ શ્રમયોગી પાસે કામ કરાવવામાં આવતું હોવાનું ખુલતા ચકચાર મચી ગઈ છે.
તપાસ અને બાળકનો છુટકારો
મળેલી માહિતી અનુસાર, પરસોત્તમ ચોક અને રવાપર રોડ વિસ્તારમાં મોરબી મહાનગરપાલિકા હેઠળ ચાલી રહેલા ડોર-ટુ-ડોર વેસ્ટ કલેક્શનના ટ્રેક્ટર (રજીસ્ટર નંબર: MP-45-AC-4214)ની ટીમે અચાનક તપાસ કરી હતી. આ તપાસ દરમિયાન ટ્રેક્ટરમાં હેલ્પર તરીકે કામ કરી રહેલો અંકિત નીનામા નામનો સગીર બાળ શ્રમયોગી મળી આવ્યો હતો.
બાળકની ઉંમરની ખાતરી કરવા માટે તેને સિવિલ હોસ્પિટલ ખાતે લઈ જઈ મેડિકલ તપાસ કરાવવામાં આવી હતી, જેમાં તેની ઉંમર માત્ર ૧૩ વર્ષ હોવાનું સામે આવ્યું હતું. ત્યારબાદ બાળકને બાળમજૂરીમાંથી મુક્ત કરાવી સમાજ સુરક્ષા અધિકારીના પ્રતિનિધિને સુરક્ષિત સોંપવામાં આવ્યો હતો.
કોન્ટ્રાક્ટર સામે કાયદેસરની કાર્યવાહી આ મામલે સરકારી શ્રમ અધિકારી મિતેશકુમાર પરસોત્તમભાઈ જોષીની ફરિયાદના આધારે મોરબી મહાનગરપાલિકાના ડોર-ટુ-ડોર વેસ્ટ કલેક્શનનો કોન્ટ્રાક્ટ ધરાવતી **‘શ્રીજી એજન્સીઝ’**ના પ્રોપ્રાઇટર રમેશચંદ્ર ખીમાભાઈ ઝોરા (રહે. અમદાવાદ) વિરુદ્ધ એ ડિવિઝન પોલીસ સ્ટેશનમાં ગુનો નોંધવામાં આવ્યો છે.
આરોપી સામે ૧૪ વર્ષથી ઓછી વયના બાળક પાસે મજૂરી કરાવવા બદલ ‘બાળ અને તરુણ કામદાર (પ્રતિબંધ અને નિયમન) એક્ટ’ની કલમ ૩ અને ૧૪ હેઠળ ધોરણસરની કાર્યવાહી હાથ ધરવામાં આવી છે. કડક પગલાંનું કારણ કોન્ટ્રાક્ટની શરતો મુજબ કોઈપણ સંજોગોમાં બાળમજૂરી ના કરાવવાની સ્પષ્ટ જવાબદારી એજન્સીની હતી. એજન્સી દ્વારા આ શરતોનું સીધું ઉલ્લંઘન કરવામાં આવ્યું હોવાથી શ્રમ વિભાગ અને પોલીસ દ્વારા આ કડક કાર્યવાહી કરવામાં આવી છે.
