MORBI:મોરબી શનાળા ગામ પાસે ફ્લાયઓવર અથવા સ્પીડબ્રેકરની માંગ સાથે તંત્રને પાઠવ્યું આવેદન
MORBI:મોરબી શનાળા ગામ પાસે ફ્લાયઓવર અથવા સ્પીડબ્રેકરની માંગ સાથે તંત્રને પાઠવ્યું આવેદન
મોરબી: મોરબી શહેરના છેવાડે આવેલા અને મહાનગરપાલિકાના વોર્ડમાં સમાવિષ્ટ શક્ત સનાળા ગામ વચ્ચેથી પસાર થતા રાજકોટ-મોરબી સ્ટેટ હાઇવે પર સર્જાતા અકસ્માતના ભયને ધ્યાને રાખીને સ્થાનિકો દ્વારા ઉચ્ચ કક્ષાએ રજૂઆત કરવામાં આવી છે.મોરબી જિલ્લા ભાજપ કિસાન મોરચાના પૂર્વ ઉપપ્રમુખ અજય ઝાલરીયા દ્વારા જિલ્લા કલેક્ટર, મ્યુનિસિપલ કમિશનર અને મુખ્યમંત્રીને સંબોધીને આવેદનપત્ર પાઠવી લોક સુરક્ષા કાજે યોગ્ય વ્યવસ્થા કરવા માંગ કરી છે.
શક્ત સનાળા ગામની અંદાજિત ૧૦,૦૦૦થી વધુની વસ્તી હાલ બે ભાગમાં વહેંચાયેલી છે, જેની મધ્યમાંથી વ્યસ્ત રાજકોટ-મોરબી સ્ટેટ હાઇવે પસાર થાય છે. શનાળા-૧ થી શનાળા-૨ વચ્ચે અવરજવર કરવા માટે ગ્રામજનોએ ફરજિયાતપણે આ હાઇવે ક્રોસ કરવો પડે છે.
રોજિંદી હાડમારી: સામાજિક, શૈક્ષણિક, ધાર્મિક અને પશુપાલન જેવા કામો માટે ગ્રામજનો, વૃદ્ધો અને નાના બાળકોએ સતત ધમધમતા ટ્રાફિક વચ્ચેથી પસાર થવું પડે છે.
અકસ્માતનો ભય: હાઇવે પર વાહનોની ગતિ વધુ હોવાથી અહીં ગમે ત્યારે મોટી દુર્ઘટના સર્જાવાની ભીતિ સેવાઈ રહી છે.સાર્વજનિક હિત અને સુરક્ષાને ધ્યાનમાં રાખીને આવેદનપત્રમાં મુખ્ય બે વિકલ્પો રજૂ કરવામાં આવ્યા છે: પાટીદાર સમાજની વાડીથી દરિયાલાલ શોપિંગ સેન્ટર સુધી ફ્લાયઓવર બ્રિજનું નિર્માણ કરવામાં આવે. જો બ્રિજ શક્ય ન હોય તો તાત્કાલિક ધોરણે RTO માન્ય મજબૂત સ્પીડબ્રેકર (ગતિરોધક) મુકવામાં આવે જેથી વાહનોની ગતિ પર લગામ લગાવી શકાય.તંત્રને આક્રમક રજૂઆત સ્થાનિક આગેવાનોએ જણાવ્યું હતું કે, “અમે શાસન અને પ્રશાસનના વરિષ્ઠ અધિકારીઓને નમ્ર અરજ કરી છે કે કોઈ અનિચ્છનીય ઘટના બને તે પહેલાં જાગીને યોગ્ય પગલાં લેવામાં આવે. ૧૦,૦૦૦ લોકોની સુરક્ષાનો પ્રશ્ન હોવાથી આ બાબતે વહેલી તકે નવનિર્માણ કાર્ય શરૂ થાય તે જરૂરી છે.”હવે જોવાનું એ રહે છે કે મોરબી વહીવટી તંત્ર અને ગુજરાત સરકાર આ જનહિતની માંગણી પર કેટલી ઝડપથી અમલવારી કરે છે.
