MORBI:મોરબીવાસીઓ માટે ખુશખબર: ઓનલાઈન ટેક્સ ભરપાઈ પર હવે મળશે કુલ ૧૨% વળતર
મોરબી: મોરબી મહાનગરપાલિકા દ્વારા નાણાકીય વર્ષ ૨૦૨૬-૨૭ માટે મિલકતવેરામાં મોટી રાહત જાહેર કરવામાં આવી છે. ડિજિટલ ટ્રાન્ઝેક્શનને પ્રોત્સાહન આપવા અને નાગરિકોને સુવિધા પૂરી પાડવા માટે પાલિકાએ ઓનલાઈન ટેક્સ ભરનારને વધારાનું ૨% રીબેટ આપવાનો નિર્ણય કર્યો છે.
મહાનગરપાલિકા દ્વારા મિલકતધારકો માટે બે પ્રકારની વળતર યોજના અમલમાં મૂકવામાં આવી છે:
ઓફલાઈન પેમેન્ટ (૧૦% વળતર): જો તમે મહાનગરપાલિકાની કચેરીએ રૂબરૂ જઈને ટેક્સ ભરો છો, તો ચાલુ વર્ષના મિલકતવેરા પર ૧૦% રીબેટ મળશે.
ઓનલાઈન પેમેન્ટ (૧૨% વળતર): જો તમે પાલિકાની વેબસાઈટ અથવા મોબાઈલ એપ્લિકેશન દ્વારા ટેક્સ ભરો છો, તો તમને ૧૨% રીબેટનો લાભ મળશે.
૧. રૂબરૂ: મહાનગરપાલિકાની મુખ્ય ઓફિસ તેમજ શહેરના કુલ ૧૧ વોર્ડ ઓફિસ ખાતે સવારે ૧૦:૩૦ થી સાંજે ૫:૦૦ કલાક સુધી ટેક્સ સ્વીકારવામાં આવશે.
૨. વેબસાઈટ: નાગરિકો https://mmegujarat.in/ પોર્ટલ પર જઈને ઓનલાઈન પેમેન્ટ કરી શકે છે.
૩. મોબાઈલ એપ: પ્લે સ્ટોર પરથી ‘Morbi Municipal Corporation’ સર્ચ કરી ઓફિશિયલ લોગોવાળી એપ્લિકેશન ડાઉનલોડ કરી શકાય છે. જેમાં પ્રોપર્ટી ટેક્સ અને વ્યવસાય વેરો સરળતાથી ભરી શકાશે.
મહત્વની નોંધ: મહાનગરપાલિકા દ્વારા નાગરિકોની સુવિધા માટે QR કોડની વ્યવસ્થા પણ કરવામાં આવી છે. વધુમાં વધુ મિલકતધારકો આ રીબેટ યોજનાનો લાભ લે અને સમયસર વેરો ભરી શહેરના વિકાસમાં સહભાગી બને તેવી અપીલ મોરબી મહાનગરપાલિકા દ્વારા કરવામાં આવી છે.
શહેરના જવાબદાર નાગરિક બનો, સમયસર ટેક્સ ભરો અને વળતર મેળવો!
