GUJARAT:રાજકોટ પ્રાથમિક શિક્ષકોનો પગાર રાજ્ય કક્ષાએથી સીધો ઓનલાઈન ખાતામાં જમા કરવા શૈક્ષિક મહાસંઘની રજૂઆત
GUJARAT:રાજકોટ પ્રાથમિક શિક્ષકોનો પગાર રાજ્ય કક્ષાએથી સીધો ઓનલાઈન ખાતામાં જમા કરવા શૈક્ષિક મહાસંઘની રજૂઆત
રાજ્યની સરકારી પ્રાથમિક શાળાઓમાં ફરજ બજાવતા અંદાજે ૧.૮ લાખ જેટલા શિક્ષકોના પગારની ચુકવણીમાં થતો વિલંબ અટકાવવા માટે અખિલ ભારતીય રાષ્ટ્રીય શૈક્ષિક મહાસંઘ, ગુજરાત દ્વારા સરકારમાં એક મહત્વની અને ન્યાયિક રજૂઆત કરવામાં આવી છે. મહાસંઘની માંગણી છે કે પ્રાથમિક શિક્ષકોનો પગાર પણ માધ્યમિક અને ઉચ્ચતર માધ્યમિક શિક્ષકોની જેમ જ રાજ્ય કક્ષાએથી સીધો ઓનલાઈન ખાતામાં જમા કરવામાં આવે.
હાલની વહીવટી પ્રક્રિયાના કારણે પગારમાં ૮ થી ૧૦ દિવસનો વિલંબ
સંગઠન દ્વારા જણાવવામાં આવ્યું છે કે, હાલની વ્યવસ્થા મુજબ રાજ્ય કક્ષાએથી જિલ્લાઓને પગાર ગ્રાન્ટ ફાળવવામાં આવે છે. ત્યારબાદ જિલ્લાકક્ષાની વહીવટી પ્રક્રિયા પૂર્ણ થઈને તાલુકા કક્ષાએ ગ્રાન્ટ જાય છે અને અંતે શિક્ષકોના ખાતામાં પગાર જમા થાય છે. આ લાંબી અને જટિલ પ્રક્રિયા પૂર્ણ થવામાં અંદાજે ૮ થી ૧૦ દિવસ જેટલો સમય લાગી જાય છે. ડિજિટલ યુગમાં પણ આ પ્રકારની વિલંબિત નીતિના કારણે શિક્ષકોને દર મહિને આર્થિક સંકડામણનો સામનો કરવો પડે છે.
મોડા પગારથી શિક્ષકોના સિવિલ (CIBIL) સ્કોર પર નકારાત્મક અસર
પગાર સમયસર ન થવાને કારણે શિક્ષકોને પડતી મુશ્કેલીઓ અંગે રજૂઆતમાં જણાવાયું છે કે:
મોટાભાગના શિક્ષકો હોમ લોન, વ્હીકલ લોન કે પર્સનલ લોન ધરાવે છે. પગાર મોડો થતાં બેંકના EMI (હપ્તા) સમયસર ભરી શકાતા નથી, જેના લીધે બેંકો દ્વારા દંડ અને વધારાનું વ્યાજ વસૂલવામાં આવે છે.
સમયસર હપ્તા ન ચૂકવાતા શિક્ષકોના CIBIL સ્કોર પર નકારાત્મક અસર પડે છે, જે ભવિષ્યની આર્થિક જરૂરિયાતો માટે નુકસાનકારક છે.
આ ઉપરાંત, પરિવારનો માસિક ખર્ચ, બાળકોની શિક્ષણ ફી, તબીબી સારવાર અને દૈનિક જીવનની જરૂરિયાતો સંતોષવામાં પણ શિક્ષકોને ભારે મુશ્કેલી વેઠવી પડે છે.
“જ્યારે રાજ્યની માધ્યમિક અને ઉચ્ચતર માધ્યમિક શાળાઓના શિક્ષકોનો પગાર ઓનલાઈન પદ્ધતિથી સમયસર જમા થતો હોય, ત્યારે પ્રાથમિક શાળાના શિક્ષકો માટે પણ આવી જ સમાન અને પારદર્શક વ્યવસ્થા અમલમાં આવે તે ખૂબ જરૂરી છે.”
– રાષ્ટ્રીય શૈક્ષિક મહાસંઘ, ગુજરાત
રાજકોટ જિલ્લા સંગઠને માંગને આવકારી
અખિલ ભારતીય રાષ્ટ્રીય શૈક્ષિક મહાસંઘ, જિલ્લા રાજકોટના સહમંત્રી શ્રી નયનભાઇ વ્યાસ અને શ્રી આશિષભાઈ ભોલવાડ દ્વારા પ્રાંત ટીમની આ રજૂઆતને જોરદાર સમર્થન આપવામાં આવ્યું છે. તેમણે જણાવ્યું હતું કે, રાજ્યના ૧.૮ લાખ પ્રાથમિક શિક્ષક મિત્રોના હિતમાં મહાસંઘ દ્વારા આ ખૂબ જ પ્રશંસનીય અને સમયસરની માંગણી કરવામાં આવી છે. સંગઠન હંમેશા ‘શિક્ષા, શિક્ષક અને સમાજ’ના હિતમાં સતત પ્રયત્નશીલ રહે છે અને આશા છે કે સરકાર ડિજિટલ ઇન્ડિયાના અભિગમ હેઠળ આ બાબતે સકારાત્મક અને ઝડપી નિર્ણય લેશે.
