MORBI:મોરબીમાં ડ્રગ્સ અને ગેરકાયદે ખનન સામે લેવાશે મક્કમ પગલાં: નવા આઈજીએ ટ્રાફિક અને ક્રાઈમની કરી સમીક્ષા
MORBI:મોરબીમાં ડ્રગ્સ અને ગેરકાયદે ખનન સામે લેવાશે મક્કમ પગલાં: નવા આઈજીએ ટ્રાફિક અને ક્રાઈમની કરી સમીક્ષા
કચ્છ રેન્જનો નવો નકશો, મોરબીની જૂની મૂંઝવણ? ફરિયાદ માટે હવે રાજકોટ નહીં, કચ્છનો રસ્તો!
મોરબી જિલ્લાનો કચ્છ બોર્ડર રેન્જમાં સમાવેશ થયા બાદ રેન્જ આઈજી ચિરાગ કોરડીયાની પ્રથમ મુલાકાતે પોલીસ તંત્રમાં નવા સંકલન અને નવી કાર્યપદ્ધતિની શરૂઆતનો સંકેત આપ્યો છે. જોકે આ વહીવટી ફેરફાર વચ્ચે એક મહત્વનો પ્રશ્ન સામાન્ય નાગરિકોમાં ચર્ચાનો વિષય બન્યો છે કે જો કોઈ વ્યક્તિને રેન્જ આઈજી કક્ષાએ રજૂઆત કે ફરિયાદ કરવી હોય તો હવે તેને રાજકોટના બદલે કચ્છ સુધી જવું પડશે?
અગાઉ મોરબી રાજકોટ રેન્જ હેઠળ આવતો હોવાથી ઉચ્ચ પોલીસ અધિકારીઓ સુધી પહોંચવું પ્રમાણમાં સરળ માનવામાં આવતું હતું. રાજકોટ મોરબીથી નજીક હોવાથી અરજદારો, સામાજિક આગેવાનો અથવા ફરિયાદીઓ માટે વ્યક્તિગત રજૂઆત કરવી વધુ અનુકૂળ હતી. હવે કચ્છ બોર્ડર રેન્જમાં સમાવેશ થતાં રેન્જ કક્ષાની કચેરી સુધી પહોંચવા માટે લાંબું અંતર કાપવું પડી શકે છે, જેના કારણે કેટલાક નાગરિકોમાં અસંતોષની લાગણી પણ જોવા મળી રહી છે.ખાસ કરીને ગ્રામ્ય વિસ્તારના લોકો માટે આ મુદ્દો વધુ મહત્વનો બની શકે છે. કારણ કે સામાન્ય નાગરિક ઘણી વખત જિલ્લા કક્ષાએ ઉકેલ ન આવતાં રેન્જ આઈજી સમક્ષ સીધી રજૂઆત કરવા માંગતા હોય છે. આવા સંજોગોમાં વધેલું અંતર સમય અને ખર્ચ બંનેમાં વધારો કરી શકે છે. પ્રજાહિતની દ્રષ્ટિએ જોવામાં આવે તો આ એક વ્યવહારુ પડકાર છે જેને અવગણી શકાય તેમ નથી.
બીજી તરફ પોલીસ અને સરકારના દૃષ્ટિકોણથી જોવામાં આવે તો નવી રેન્જ વ્યવસ્થાનો મુખ્ય હેતુ વહીવટી કાર્યક્ષમતા વધારવાનો છે. કચ્છ, મોરબી અને સરહદી સુરક્ષાથી સંબંધિત વિસ્તારોને એક જ રેન્જ હેઠળ લાવવાથી માહિતીની આપ-લે, ઇન્ટેલિજન્સ સંકલન અને કાયદો-વ્યવસ્થાની દેખરેખ વધુ અસરકારક બની શકે છે. ખાસ કરીને ઔદ્યોગિક અને વ્યૂહાત્મક રીતે મહત્વના મોરબી જિલ્લામાં ઝડપી પોલીસ સંકલન માટે આ ફેરફાર લાંબા ગાળે લાભદાયી સાબિત થઈ શકે છે.
આ સાથે કોઈપણ નાગરિક વિના સંકોચે કોઈ ગુપ્ત માહિતી આપવા અથવા મદદ માટે આઈજી ચિરાગ કોરડીયાના સીધા મોબાઈલ નંબર પર સંપર્ક કરી શકે છે:આઈજીનો સીધો સંપર્ક કરી શકશો મો. : 99784 08571 ઉપર..
ચાર્જ સંભાળતાની સાથે જ એક્શન મોડમાં આવેલા આઈજીએ મોરબીના ઉચ્ચ પોલીસ અધિકારીઓ સાથે એક મહત્વની બેઠક યોજી હતી અને સ્પષ્ટ કર્યું હતું કે રાજકોટ રેન્જની માફક જ બોર્ડર રેન્જની કામગીરી પણ અહીં પુરી ગંભીરતાથી ચાલુ રહેશે.
છેલ્લા 6 મહિનાના ક્રાઈમ અને ટ્રાફિક સમસ્યા પર મંથન બેઠક અંગે વિગતો આપતા આઈજી ચિરાગ કોરડીયાએ જણાવ્યું હતું કે, મોરબી જિલ્લામાં છેલ્લા 4 થી 6 મહિનામાં બનેલી ગુનાહિત પ્રવૃત્તિઓની વિસ્તૃત સમીક્ષા કરવામાં આવી છે. આ ઉપરાંત:સ્થાનિક પ્રશ્નો અને કાયદો-વ્યવસ્થાની સ્થિતિ પર ચર્ચા થઈ. લોકોને સતાવતી મુખ્ય ટ્રાફિક સમસ્યા અંગે ઊંડાણપૂર્વક મંથન કરાયું.આગામી દિવસોમાં આ તમામ પ્રશ્નોના કાયમી નિરાકરણ માટે ચોક્કસ પ્લાનિંગ કરવામાં આવશે.ડ્રગ્સ અને ખનીજ માફિયાઓ સામે કડક કાર્યવાહીની ચેતવણી :મોરબીમાં ગેરકાયદેસર પ્રવૃત્તિઓ કરનારાઓ સામે લાલ આંખ કરતા આઈજીએ જણાવ્યું કે, ડ્રગ્સના દૂષણને જડમૂળથી ઉખાડી ફેંકવા માટે પોલીસ ટીમ પૂરી મક્કમતાથી કામ કરી રહી છે.
યુવાનોને અપીલ: કોલેજના યુવા મિત્રો કે સમાજના આગેવાનોને ક્યાંય પણ ડ્રગ્સને લગતું દૂષણ જોવા મળે તો તાત્કાલિક પોલીસને જાણ કરે, જેના પર ત્વરિત એક્શન લેવાશે. આ ઉપરાંત જિલ્લામાં સક્રિય ખનીજ માફિયાઓ સામે ચાલી રહેલી કડક કામગીરીને વધુ વેગવંતી બનાવવામાં આવશે.જનતાની સુવિધા માટે આઈજીએ જાહેર કર્યો પોતાનો પર્સનલ મોબાઈલ નંબર :મોરબી પોલીસ અને એસપીની કામગીરીને બિરદાવતા આઈજીએ જણાવ્યું કે, ગુના ડિટેક્શન અને કાયદો જાળવવામાં સ્થાનિક પોલીસ પ્રશંસનીય કામ કરી રહી છે. પોલીસ અને જનતા વચ્ચેનો સેતુ મજબૂત કરવા માટે આઈજીએ નાગરિકોને સીધો સંવાદ કરવા અપીલ કરી છે.પ્રશ્ન એ નથી કે નવી રેન્જ યોગ્ય છે કે નહીં, પરંતુ એ છે કે નાગરિકોની પહોંચ કેવી રીતે સરળ બનાવવામાં આવશે. જો ઓનલાઈન ફરિયાદ પ્રણાલી, વિડિયો કોન્ફરન્સ દ્વારા જનસુનાવણી અથવા સમયાંતરે મોરબી ખાતે રેન્જ કક્ષાના કેમ્પો યોજવામાં આવે તો અંતરના કારણે ઉભી થતી મુશ્કેલીઓ ઘણી હદ સુધી ઘટાડી શકાય છે.રેન્જ આઈજીની પ્રથમ મુલાકાતે પોલીસ તંત્રને નવા માળખા સાથે તાલમેલ સાધવાનો સંદેશ આપ્યો છે. હવે આગામી સમયમાં પ્રજાની સુવિધા અને વહીવટી કાર્યક્ષમતા વચ્ચે સંતુલન કેવી રીતે જળવાય છે તેના પર સૌની નજર રહેશે. મોરબીના નાગરિકો માટે ખરેખર સફળતા ત્યારે ગણાશે જ્યારે નવી રેન્જ વ્યવસ્થાથી સુરક્ષા મજબૂત બનવાની સાથે તેમની રજૂઆતો પણ સરળતાથી ઉચ્ચ અધિકારીઓ સુધી પહોંચી શકશે તે હવે જોવાનું રહ્યું..
