MORBI:મોંઘવારી સામે મહિલા કોંગ્રેસનો અવાજ મોરબીમાં વિરોધ પ્રદર્શન
મોરબી : પ્રદેશ કોંગ્રેસ પ્રમુખ ગીતાબેન પટેલના આદેશ અને માર્ગદર્શન હેઠળ મોરબી શહેર કોંગ્રેસ સમિતિ દ્વારા મોંઘવારીના મુદ્દે વિરોધ કાર્યક્રમ યોજાયો હતો. શહેર કોંગ્રેસ પ્રમુખ કલ્પનાબેન પરમારના નેતૃત્વમાં મહિલા કોંગ્રેસ ની કાર્યકર બહેનોએ ઉપસ્થિત રહી મોંઘવારી સામે પોતાનો વિરોધ નોંધાવ્યો હતો. કાર્યક્રમ દરમિયાન મહિલાઓએ રોજિંદા જીવન સાથે સીધી રીતે જોડાયેલા ખાદ્ય ચીજવસ્તુઓ, રસોડાના ખર્ચ, ઘરગથ્થુ જરૂરિયાતો સહિત વધતી મોંઘવારી અંગે સરકાર સામે નારાજગી વ્યક્ત કરી હતી. મહિલાઓના હાથમાં વિવિધ સૂત્રો અને પ્લેકાર્ડ સાથે વિરોધ નોંધાવવામાં આવ્યો હતો.
મહિલાઓના રસોડાથી રસ્તા સુધી પહોંચ્યો મોંઘવારીનો મુદ્દો
મોંઘવારીનો સૌથી સીધો પ્રભાવ પરિવારના બજેટ અને ખાસ કરીને ગૃહિણીઓના રસોડા પર પડે છે. દૈનિક જીવનમાં જરૂરી વસ્તુઓના ભાવમાં વધારો થતાં ઘરનું બજેટ સંભાળવાની જવાબદારી વધુ પડકારજનક બની રહી હોવાનો સૂર મહિલા કાર્યકરોમાં જોવા મળ્યો હતો.કલ્પનાબેન પરમારના નેતૃત્વ હેઠળ મહિલા કાર્યકર બહેનોએ એકજૂથ થઈને મોંઘવારી સામે અવાજ ઉઠાવી સરકારનું ધ્યાન લોકોની રોજિંદી મુશ્કેલીઓ તરફ દોરવાનો પ્રયાસ કર્યો હતો.આ વિરોધ કાર્યક્રમ માત્ર રાજકીય વિરોધ પૂરતો ન રહેતાં સામાન્ય પરિવારના ઘરખર્ચ, મહિલાઓની જવાબદારી અને પરિવારના આર્થિક આયોજન સાથે જોડાયેલા પ્રશ્નોને વાચા આપતો કાર્યક્રમ બની રહ્યો હતો. મહિલા કોંગ્રેસની ટીમે મોંઘવારીના મુદ્દે જનહિતમાં અવાજ વધુ મજબૂત બનાવવાનો સંકલ્પ વ્યક્ત કર્યો હતો.
