MORBI:મોરબી ગ્રાહક સુરક્ષા મંડળની વડાપ્રધાનને રજૂઆત: ‘અલગ સૌરાષ્ટ્ર રાજ્ય’ બનાવવાની ઉઠી માંગ
MORBI:મોરબી ગ્રાહક સુરક્ષા મંડળની વડાપ્રધાનને રજૂઆત: ‘અલગ સૌરાષ્ટ્ર રાજ્ય’ બનાવવાની ઉઠી માંગ
ગુજરાતના વિકાસમાં મહત્વપૂર્ણ યોગદાન આપતા સૌરાષ્ટ્ર વિસ્તારને એક ‘અલગ સૌરાષ્ટ્ર રાજ્ય’ નો દરજ્જો આપવામાં આવે તેવી જોરદાર માંગ ઉઠી છે. મોરબી શહેર/જિલ્લા ગ્રાહક સુરક્ષા મંડળ દ્વારા ભારતના વડાપ્રધાન નરેન્દ્ર મોદીને આ અંગે એક પત્ર લખીને વિસ્તૃત રજૂઆત કરવામાં આવી છે.
મંડળના પ્રમુખ/મંત્રી દ્વારા લખાયેલા આ પત્રમાં જણાવવામાં આવ્યું છે કે, ભારતના વિકાસની સાથે હવે સમય આવી ગયો છે કે સૌરાષ્ટ્રને અલગ રાજ્ય બનાવવામાં આવે. જો સૌરાષ્ટ્ર અલગ રાજ્ય બને, તો વર્તમાન પાટનગર ગાંધીનગર પરથી વહીવટી ભારણ ઘણું હળવું થઈ જશે. ભૂતકાળમાં ઉચ્છંગરાય ઢેબરના સમયમાં પણ અલગ સૌરાષ્ટ્ર રાજ્ય અસ્તિત્વમાં હતું, તેનો ઉલ્લેખ કરતા પત્રમાં જણાવાયું છે કે નાનું રાજ્ય હોવાને કારણે વહીવટ અને વ્યવસ્થા ખૂબ જ સારો અને સુદ્રઢ બની રહેશે.
પત્રમાં સૌરાષ્ટ્રની આર્થિક સક્ષમતાના ઉદાહરણો આપતા જણાવવામાં આવ્યું છે કે:મોરબીનો સિરામિક ઉદ્યોગ: મોરબીનો સિરામિક ઉદ્યોગ વાર્ષિક આશરે રૂ. ૧૦,૦૦૦ કરોડથી વધુનો ટેક્સ ભરે છે.
અન્ય શહેરોનું યોગદાન: રાજકોટ, જામનગર, ભાવનગર, પોરબંદર અને ધોરાજી જેવા નાના-મોટા શહેરોમાં અસંખ્ય ઉદ્યોગો ધમધમી રહ્યા છે, જેઓ ખૂબ મોટો ટેક્સ ભરીને દેશના અર્થતંત્રમાં મહત્વનો ફાળો આપી રહ્યા છે અને પગભર છે.
અલગ રાજ્ય બનવાથી સૌરાષ્ટ્રના રાજકીય, ઉદ્યોગ, કારીગરો, વિદ્યાર્થીઓ તેમજ શિક્ષણને લગતા સ્થાનિક પ્રશ્નોનો ખૂબ જ ઝડપથી નિકાલ લાવી શકાશે. આનાથી સમય, શક્તિ અને આર્થિક સ્થિતિમાં મોટો સુધારો થશે. વડાપ્રધાને અગાઉ નાના-નાના તાલુકા અને જિલ્લાઓ બનાવીને પ્રજાને મોટી રાહત આપી છે, ત્યારે હવે અલગ સૌરાષ્ટ્ર રાજ્ય બનાવીને આ વિસ્તારના વિકાસને નવી ઊંચાઈએ લઈ જવામાં આવે તેવી આશા વ્યક્ત કરવામાં આવી છે.
આ પત્રની નકલ ગુજરાતના મુખ્યમંત્રી, તમામ સાંસદો અને તમામ ધારાસભ્યોને પણ યોગ્ય કાર્યવાહી અર્થે મોકલવામાં આવી છે. સૌરાષ્ટ્રવાસીઓની આ જૂની ઈચ્છા વડાપ્રધાન પૂરી કરશે તેવી મંડળ અને જનતાને પૂરી ખાતરી છે.
