MORBI:મોરબી: મેસરીયા પ્રાથમિક આરોગ્ય કેન્દ્ર દ્વારા ‘મેલેરિયા વિરોધી માસ’ અંતર્ગત વિવિધ જાગૃતિ કાર્યક્રમો યોજાયો
MORBI:મોરબી: મેસરીયા પ્રાથમિક આરોગ્ય કેન્દ્ર દ્વારા ‘મેલેરિયા વિરોધી માસ’ અંતર્ગત વિવિધ જાગૃતિ કાર્યક્રમો યોજાયો
જૂન માસને ‘મેલેરિયા વિરોધી માસ’ તરીકે ઉજવવાના ભાગરૂપે મોરબી જિલ્લાના પ્રાથમિક આરોગ્ય કેન્દ્ર (PHC) મેસરીયા દ્વારા ગ્રામ્ય વિસ્તારો અને શાળાઓમાં વિવિધ જાગૃતિ કાર્યક્રમોનું સફળ આયોજન કરવામાં આવ્યું હતું. આ કાર્યક્રમો દ્વારા ગ્રામજનો અને વિદ્યાર્થીઓને મેલેરિયા રોગ અને તેનાથી બચવાના ઉપાયો અંગે વિસ્તૃત માહિતગાર કરવામાં આવ્યા હતા.
ઉચ્ચ અધિકારીઓના માર્ગદર્શન હેઠળ સફળ આયોજન
આ સમગ્ર જાગૃતિ અભિયાન મોરબી જિલ્લા આરોગ્ય અધિકારી ડૉ. પી. કે. શ્રીવાસ્તવ, જિલ્લા મેલેરિયા અધિકારી ડૉ. વી. કે. કારોલીયા તથા તાલુકા હેલ્થ ઓફિસર ડૉ. આરિફ શેરસિયાના માર્ગદર્શન હેઠળ યોજાયું હતું. કાર્યક્રમોને સફળ બનાવવા માટે પ્રાથમિક આરોગ્ય કેન્દ્ર મેસરીયાના મેડિકલ ઓફિસર ડૉ. કિશન કણસાગરા તેમજ સુપરવાઇઝર રોહિતભાઈ રંગપરાના નેતૃત્વમાં આરોગ્ય વિભાગની ટીમે નિષ્ઠાપૂર્વક કામગીરી બજાવી હતી.
આરોગ્ય વિભાગની ટીમ દ્વારા મેસરીયા PHC હેઠળ આવતા વિવિધ ગામોની મુલાકાત લેવામાં આવી હતી. જેમાં મેલેરિયા નિર્મૂલન માટે ‘શું કરવું અને શું ન કરવું’ તેની વિગતવાર સમજણ આપવામાં આવી હતી.
પ્રાયોગિક નિદર્શન: મચ્છરોના પ્રજનનને અટકાવવા માટે પોરા અને ગપ્પી માછલીનું જીવંત નિદર્શન કરાવવામાં આવ્યું હતું.
સાહિત્ય વિતરણ: ગ્રામજનોને જાગૃતિ ફેલાવતી માર્ગદર્શક પત્રિકાઓ (પામ્ફલેટ્સ) નું વિતરણ કરાયું હતું.
શાળાઓમાં કાર્યક્રમ: વિદ્યાર્થીઓને મેલેરિયા થવાના કારણો, તેના લક્ષણો, બચાવના ઉપાયો અને વ્યક્તિગત તેમજ આસપાસની સ્વચ્છતાનું મહત્વ સમજાવવામાં આવ્યું હતું.
મેલેરિયાથી બચવા આરોગ્ય ટીમની મહત્વની અપીલ આરોગ્ય અધિકારીઓએ જણાવ્યું હતું કે, મેલેરિયા એ માદા એનોફિલીસ મચ્છર કરડવાથી ફેલાય છે. આ મચ્છરો સામાન્ય રીતે ચોખ્ખા અને સ્થિર પાણીમાં ઈંડા મૂકે છે અને સાંજ તેમજ રાત્રિના સમયે વધુ સક્રિય હોય છે.
શરીર ઢંકાય તેવા લાંબી બાંયના કપડાં પહેરવા.,ઘરમાં પાણીના પાત્રોને હવાચુસ્ત રીતે ઢાંકીને રાખવા અને તેની નિયમિત સફાઈ કરવી.,ચોમાસા પહેલાં ઘરની આસપાસના નકામા ટાયર, ડબ્બા કે ભંગારનો યોગ્ય નિકાલ કરવો જેથી પાણી ભરાઈ ન રહે.રાત્રે સૂતી વખતે દવાયુક્ત મચ્છરદાની, મચ્છર વિરોધી ક્રીમ અથવા લીમડાના ધુમાડાનો ઉપયોગ કરવો.
આરોગ્ય તંત્ર દ્વારા સ્પષ્ટ કરવામાં આવ્યું છે કે તમામ સરકારી દવાખાનાઓમાં મેલેરિયાનું નિદાન (ટેસ્ટિંગ) અને સંપૂર્ણ સારવાર તદ્દન વિનામૂલ્યે ઉપલબ્ધ છે. ‘મેલેરિયા મુક્ત સમાજ’ ના લક્ષ્યને સાકાર કરવા માટે આરોગ્ય વિભાગે જનસહભાગિતાને અત્યંત મહત્વપૂર્ણ ગણાવીને તમામ નાગરિકોને સહયોગ આપવા અપીલ કરી છે.
