નવસારી મહાનગરપાલિકા દ્વારા ખાનગી પ્લોટમાં ગંદગીના મામલે ૧૮ મિલકત ધારકોને નોટિસ ફટકારવામાં આવી…
વાત્સલ્યમ સમાચાર
મદન વૈષ્ણવ
નવસારી મહાનગરપાલિકાના સોલીડ વેસ્ટ મેનેજમેન્ટ વિભાગ દ્વારા શહેરના જાહેર સ્વાસ્થ્યની જાળવણી માટે કડક કાર્યવાહી હાથ ધરવામાં આવી છે. શહેરના વિવિધ વિસ્તારોમાં આવેલી ખાનગી માલિકીની ખુલ્લી જગ્યાઓ અને પ્લોટમાં લાંબા સમયથી સફાઈ ન થતી હોવાને કારણે ગંદકીના ગંજ ખડકાયા હોવાનું તંત્રના ધ્યાન પર આવ્યું છે. આ પરિસ્થિતિને ગંભીરતાથી લઈને મનપા દ્વારા પ્રાથમિક તબક્કે કુલ ૧૮ જેટલા મિલકત ધારકોને સત્તાવાર નોટિસ ફટકારી સફાઈ કરવાના કડક આદેશો આપવામાં આવ્યા છે.
મહાનગરપાલિકા દ્વારા કરવામાં આવેલી આ કાર્યવાહી પાછળનો મુખ્ય ઉદ્દેશ્ય મચ્છરજન્ય અને ગંદકીથી ફેલાતા રોગોને અટકાવવાનો છે. ખુલ્લા પ્લોટમાં કચરો અને જંગલી ઘાસ ઉગી નીકળવાને કારણે ત્યાં મચ્છરોનો ઉપદ્રવ વધે છે, જે આસપાસના રહીશો માટે ડેન્ગ્યુ, મેલેરિયા અને ચિકનગુનિયા જેવા જીવલેણ રોગોનું જોખમ ઊભું કરે છે. અન્ય નાગરિકોના સ્વાસ્થ્ય સાથે ચેડાં કરનાર બેજવાબદાર મિલકત ધારકો સામે તંત્ર હવે કોઈ પણ પ્રકારની નરમ નીતિ અપનાવવા માંગતું નથી.
અત્રે ઉલ્લેખનીય છે કે, નોટિસ ફટકારવામાં આવેલી મિલકતોની યાદીમાં વિવિધ વિસ્તારોના ધારકોનો સમાવેશ થાય છે. આ તમામ મિલકત ધારકોને ચોક્કસ સમયમર્યાદા આપવામાં આવી છે, જે દરમિયાન તેઓએ પોતાની જગ્યા પરથી કચરો અને ગંદકી દૂર કરી સફાઈ કરાવવાની રહેશે. જો આ સમયગાળામાં સફાઈ કામગીરી કરવામાં નહીં આવે, તો નવસારી મહાનગરપાલિકા દ્વારા ભારે દંડનીય કાર્યવાહી હાથ ધરવામાં આવશે.
નવસારી મહાનગરપાલિકા શહેરના તમામ નાગરિકોને અપીલ કરે છે કે, માત્ર સાર્વજનિક રસ્તાઓ જ નહીં પરંતુ પોતાની માલિકીની મિલકતોની સફાઈ રાખવી એ પણ દરેકની નૈતિક જવાબદારી છે. ‘સ્વચ્છ નવસારી, સ્વસ્થ નવસારી’ના અભિયાનમાં સહભાગી થઈ ગંદકી ફેલાતી અટકાવવા સહયોગ આપવા વિનંતી કરવામાં આવી છે. આગામી દિવસોમાં સોલીડ વેસ્ટ વિભાગ દ્વારા અન્ય વિસ્તારોમાં પણ આ પ્રકારે સર્વે કરી કડક પગલાં લેવાનું જારી રાખવામાં આવશે.
