નવસારી રેલવે વિસ્તારમાં ટ્રાફિક સમસ્યા નિવારણ માટે આંતરાષ્ટ્રીય હિન્દુ પરિષદ દ્વારા પોલીસવડાને રજૂઆત
વાત્સલ્યમ સમાચાર
મદન વૈષ્ણવ
નવસારી, તા. ૨૧ : નવસારી શહેરના ગુપ્તા હોટલ બહાર ગેરકાયદેસર પાર્કિંગ અને રોંગ સાઇડ વાહન વ્યવહારથી લોકો પરેશાન થયા છે.
નવસારી રેલવે સ્ટેશન (પૂર્વ) વિસ્તારમાં આવેલ ગુપ્તા હોટલ બહાર રોડ પર અંદાજે ૨૦ ફૂટ સુધી થતા ગેરકાયદેસર પાર્કિંગને કારણે ટ્રાફિક વ્યવસ્થા સંપૂર્ણ ખોરવાઈ રહી હોવાની ફરિયાદો ઉઠી રહી છે। સ્થાનિકો અને વાહનચાલકોના જણાવ્યા મુજબ અહીં ટ્રાફિક નિયમોના ખુલ્લેઆમ ભંગ થતો હોવા છતાં જવાબદાર તંત્ર તરફથી અસરકારક કાર્યવાહી થતી નથી।
આ સમગ્ર ટ્રાફિક સમસ્યા અંગે આંતરાષ્ટ્રીય હિન્દુ પરિષદના નવસારી જિલ્લાના અધ્યક્ષ રાકેશભાઈ શર્માએ નવસારી જિલ્લા પોલીસવડાને લેખિત રજૂઆત કરી તાત્કાલિક કાર્યવાહી કરવાની માંગ ઉઠાવી છે।
રેલવે ટિકિટ બારી (પૂર્વ) તરફથી આવતા ૨, ૩ અને ૪ વ્હીલર વાહનોને નિયમ મુજબ RJD મોલ પાસેથી U-ટર્ન લઈ આગળ જવું જોઈએ, પરંતુ ઘણા વાહનચાલકો નિયમોને અવગણીને સીધા જ રોંગ સાઇડમાં ગુપ્તા હોટલ પાસેથી સાંઢકુવા અને ફુવારા તરફ જતા જોવા મળે છે। પરિણામે કાયદેસર લેનમાં જતા વાહનચાલકોને ભારે મુશ્કેલીઓનો સામનો કરવો પડે છે।
એક તરફ રોડ પરનું ગેરકાયદેસર પાર્કિંગ અને બીજી તરફ રોંગ સાઇડ વાહન વ્યવહારને કારણે વિસ્તારમાં વારંવાર ટ્રાફિક જામ સર્જાય છે। ઘણી વખત વાહનચાલકો વચ્ચે બોલાચાલી, માથાકૂટ અને ઝઘડાની પરિસ્થિતિ પણ ઊભી થાય છે, જેના કારણે સામાન્ય નાગરિકો ભારે પરેશાન બની રહ્યા છે।
રાકેશભાઈ શર્માએ રજૂઆતમાં ઉલ્લેખ કર્યો છે કે નવસારી શહેરમાં કેટલીક હોટલો મોડી રાત્રે ૨ થી ૩ વાગ્યા સુધી ખુલ્લી રહેતી હોવાથી માથાભારે તત્વોની અવરજવર વધી રહી છે। મોડીરાત્રિના સમયે નાના કારણોસર પણ ઝઘડા અને કાયદો-વ્યવસ્થાની સમસ્યાઓ સર્જાતી હોવાના આક્ષેપો થઈ રહ્યા છે, જેના કારણે સામાન્ય નાગરિકોમાં અસુરક્ષાની લાગણી વ્યાપી રહી છે।
તેમણે માંગ કરી છે કે જેમ અગાઉ રાત્રે ૧૧ વાગ્યા બાદ હોટલો બંધ કરવાની વ્યવસ્થા અમલમાં હતી, તે નિયમ ફરી કડકાઈથી અમલમાં મુકવામાં આવે। સાથે જ ટ્રાફિક વિભાગ, પોલીસ તંત્ર અને પાલિકા દ્વારા ગુપ્તા હોટલ વિસ્તાર પાસેનું ગેરકાયદેસર પાર્કિંગ તાત્કાલિક દૂર કરવામાં આવે, રોંગ સાઇડ વાહનચાલકો સામે કડક કાર્યવાહી કરવામાં આવે તેમજ વિસ્તારમાં નિયમિત પોલીસ પેટ્રોલિંગ વધારવામાં આવે જેથી ટ્રાફિક અને કાયદો-વ્યવસ્થાની સ્થિતિ સુધરી શકે।
