વાત્સલ્યમ સમાચાર
મદન વૈષ્ણવ
સંયુક્ત રાષ્ટ્ર સંઘ દ્વારા ઘોષિત વિશ્વ આદિવાસી અધિકાર દિવસ નિમિત્તે ડાંગ જિલ્લામાં કલેકટર કચેરી સામે શેરડી કામદારો વન અધિકાર હેઠળનાં પડતર પ્રશ્નો અંગે એક દિવસીય પ્રતીક ધરણા પ્રદર્શન કરવામાં આવશે તેવી સંગઠન દ્વારા જાહેરાત કરવામાં આવેલ છે.સંયુક્ત રાષ્ટ્ર સંઘ દ્વારા ગયા ત્રણ દાયકા દરમિયાન વિશ્વમાં વસવાટ કરતા આદિવાસી સમાજની ઓળખ અને અધિકાર ટકાવી રાખવા બાબતે તેની જનરલ સભામાં બે અલગ અલગ મહત્વના ઠરાવો પસાર કરવામાં આવેલ હતા.જેમાં (૧) સને ૧૯૯૪માં મળેલ સભા દરમિયાન ૯મી ઓગષ્ટ આંતરરાષ્ટ્રીય આદિવાસી દિવસ તરીકે ઘોષિત કરવામાં આવેલ અને તેની ઉજવણી વિશ્વભરમાં વસતા આદિવાસી સમાજના સંગઠન અને સંસ્થાઓ તરફથી હાલનાં ચાલુ વર્ષે પણ કરવામાં આવેલ હતી અને (૨) સને ૨૦૦૭માં સંયુક્ત રાષ્ટ્ર સંઘ ધ્વારા તેના જનરલ સભામાં ૧૩મી સપ્ટેમ્બરને વિશ્વ આદિવાસી અધિકાર દિવસ તરીકે ઘોષિત કરવામાં આવેલ અને તેનો મુખ્ય હેતુ વિશ્વમાં રહેતા આદિવાસી સમાજ આર્થિક, સામાજિક, રાજકીય, સાંસ્કૃતિક અને તેની કુદરતી સંપતિ પરનો અધિકારનો દિવસ તરીકે જાહેર કરેલ છે.આ ઠરાવો પર ભારત સરકારે પણ હસ્તાક્ષર કરેલ છે.જે સંદર્ભે તા. ૧૨મી સપ્ટેમ્બર ૨૦૨૫નાં રોજ આહવા કલેકટર કચેરી સામે કેટલાક મુદ્દાઓને ધ્યાનમાં રાખીને ૧ દિવસીય પ્રતિક ધરણા કાર્યક્રમનું આયોજન કરવામાં આવેલ છે.તેમાં ઉપસ્થિત રહેવા ડાંગ વિશ્વ આદિવાસી અધિકાર દિવસની ઉજવણી સમિતિ દ્વારા અપીલ કરવામાં આવેલ છે.ત્યારે ગુજરાતનાં પાંચમા અનુસૂચિત વિસ્તારમાં આવેલ ખાસ કરીને ગુજરાતના ડાંગ અને તાપી જિલ્લામાંથી દક્ષિણ ગુજરાતમાં આવેલ ૧૪ સુગર ફેક્ટરીમાં શેરડી કાપવા મજુરી અર્થે આશરે ૨૦૦૦૦૦/- જેટલા આદિવાસી ભાઈઓ બહેનો સ્થળાંતર થાય છે. અને ગુજરાતમાં મજૂર અધિકાર મંચના મજૂરોની આર્થિક, સામાજિક સ્થિતિમાં બદલાવ થાય તે માટે સતત પ્રયાસ અને લડત આપતા આવેલ છે.અને તેના ફળ સ્વરૂપે ગુજરાત સરકારના લેબર, સ્કીલ ડેવલપમેન્ટ અને એમ્પલોઈમેન્ટ ડીપાર્ટમેન્ટ, ગાંધીનગર ધ્વારા તા.૨૭મી માર્ચ, ૨૦૨૩ના રોજ નોટીફિકેશન બહાર પાડી તમામ સુગર ફેકટરીને જાણ કરવામાં આવેલ કે તમામ મજૂરોને ટન દીઠ રૂા.૪૭૬/- ફરજીયાત ચૂકવવા તથા વન અધિકાર કાયદો 2006 હેઠળના વર્ષોથી વ્યક્તિગત અને સામૂહિક હક બાબતે પડતર પ્રશ્નો અંગે તથા કામદારોના તથા આદિવાસી સમાજના વ્યક્તિગત હક દાવાઓના પડતર પ્રશ્નો તથા સામૂહિક હક દાવાઓના પડતર પ્રશ્નો અંગે રજૂઆત અને માંગણી સ્વીકારવામાં આવે તે હેતુથી વિશ્વ આદિવાસી અધિકાર દિવસની ઉજવણી સમિતિ દ્વારા આ પ્રતીક ધરણાનું આયોજન કરવામાં આવેલ છે.ત્યારે આદિવાસી સમાજના આ સમસ્યા બાબતે વખતોવખત જિલ્લા કક્ષા સમિતિ અને રાજ્યકક્ષાએ રજૂઆત કરેલ હોવા છતાં કાયદાનું ઉલંઘન કરીને સમસ્યાનું નિરાકરણ ન કરીને સામૂહિક અધિકારોથી વંચિત રાખવામાં આવેલ હોય તેવા અનેક સળગતા મુદ્દાઓ સાથે આ જાહેરાત વિશ્વ આદિવાસી અધિકાર દિવસની ઉજવણી સમિતિ ડાંગ દ્વારા કરવામાં આવેલ છે..
