વેલંજા:- હજીરા મેન બ્રાન્ચ કઠોળ સેક્શન સબ ડિવિઝન કિમ હેઠળ આવતી કિમ મેન કેનાલની બિસ્માર હાલત અંગે છેલ્લા કેટલાક સમયથી સ્થાનિકો દ્વારા રજૂઆતો કરવામાં આવી રહી હતી. કેનાલની સ્થિતિ અંગે વાત્સલ્ય સમાચાર દ્વારા પણ અહેવાલ પ્રસિદ્ધ કરી સંબંધિત તંત્રનું ધ્યાન દોરવામાં આવ્યું હતું. અનેક લોકોની લેખિત રજૂઆતો અને અહેવાલ બાદ આખરે તંત્ર દ્વારા સ્થળ પર કામગીરી હાથ ધરવામાં આવી અને બિસ્માર બનેલા ભાગનું સમારકામ પૂર્ણ કરવામાં આવ્યું છે.
સમારકામની કામગીરી પૂર્ણ થતાં હાલ સ્થળની સ્થિતિમાં સુધારો જોવા મળી રહ્યો છે. તંત્ર દ્વારા રજૂઆતોને ધ્યાનમાં લઈ કામગીરી કરવામાં આવી તે બાબત આવકારદાયક છે. જોકે, સમારકામ પૂર્ણ થયા બાદ પણ સ્થાનિકોમાં કેટલાક પ્રશ્નો ચર્ચાનો વિષય બન્યા છે.
સ્થાનિકોમાં એવી ચર્ચા છે કે આ જ સ્થળે આશરે છ મહિના અગાઉ પણ બિસ્માર સ્થિતિ સર્જાઈ હતી અને તે સમયે પણ સમારકામ કરવામાં આવ્યું હતું. જો અગાઉ પણ સમારકામ કરવામાં આવ્યું હતું તો આટલા ટૂંકા સમયગાળામાં ફરીથી સમારકામ કરવાની જરૂર કેમ ઊભી થઈ? અગાઉની કામગીરીની ટકાઉપણું અને જાળવણી અંગે યોગ્ય નિરીક્ષણ થયું હતું કે કેમ તે અંગે લોકોમાં સ્વાભાવિક પ્રશ્નો ઉઠી રહ્યા છે.
અહીં કોઈ વ્યક્તિ કે અધિકારી સામે આક્ષેપ કરવાનો હેતુ નથી, પરંતુ જાહેર હિતના પ્રશ્ન તરીકે અગાઉ કરવામાં આવેલી કામગીરી અને હાલના સમારકામની ગુણવત્તા અંગે યોગ્ય નિરીક્ષણ થાય તે જરૂરી છે. હાલનું સમારકામ લાંબા સમય સુધી ટકી રહે અને ફરીથી થોડા જ સમયમાં આવી સ્થિતિ ઊભી ન થાય તે સ્થાનિકોની મુખ્ય અપેક્ષા છે.
દરમિયાન, કેનાલના બંને કાંઠે ઘાસ અને ઝાડી-ઝાંખર હજુ પણ યથાવત્ જોવા મળી રહ્યા છે. સમારકામ સાથે કેનાલની આસપાસની સફાઈ અને જાળવણી પણ કરવામાં આવે તો સમગ્ર વિસ્તાર વધુ સ્વચ્છ, વ્યવસ્થિત અને સુરક્ષિત બની શકે છે. તેથી સંબંધિત તંત્ર દ્વારા કેનાલની બંને બાજુ ઊગી ગયેલા ઘાસ અને ઝાડી-ઝાંખરની પણ તાત્કાલિક સફાઈ કરવામાં આવે તેવી સ્થાનિકોની માંગ છે.
કેનાલનું સમારકામ કરવું જરૂરી છે, પરંતુ તેની સાથે નિયમિત જાળવણી કરવી પણ એટલી જ મહત્વપૂર્ણ છે. અગાઉના અનુભવને ધ્યાનમાં રાખીને હવે કરવામાં આવેલા સમારકામનું સમયાંતરે નિરીક્ષણ કરવામાં આવે તો ફરીથી સમાન સમસ્યા ઊભી થતી અટકાવી શકાય.
સ્થાનિકોનું કહેવું છે કે સમસ્યા અંગે રજૂઆતો બાદ તંત્ર દ્વારા કામગીરી કરવામાં આવી છે તે સારી બાબત છે, પરંતુ હવે સમારકામની સાથે જાળવણી અને સફાઈની કામગીરી પણ સતત ચાલુ રહે તે જરૂરી છે. જેથી કેનાલની હાલની સુધારેલી સ્થિતિ લાંબા સમય સુધી જળવાઈ રહે.
આ અહેવાલનો હેતુ કોઈ વ્યક્તિ કે અધિકારી સામે આક્ષેપ કરવાનો નથી, પરંતુ સ્થાનિકોની રજૂઆત અને જાહેર હિતના પ્રશ્નને સંબંધિત તંત્ર સુધી પહોંચાડવાનો છે. અગાઉના સમારકામ તથા હાલની કામગીરી અંગે તંત્ર તરફથી કોઈ સત્તાવાર સ્પષ્ટતા મળે તો તેને પણ સમાચાર સાથે યોગ્ય રીતે પ્રસિદ્ધ કરી શકાય.
રિપોર્ટર કલ્પેશ ધામેલીયા કામરેજ સુરત
