ન્યુઝીલેન્ડના ટાપુ પર ગુરુવારે રિક્ટર સ્કેલ પર 6.3 ની તીવ્રતાનો ભૂકંપ આવ્યો હતો. અધિકારીઓએ સુનામીની ચેતવણી જારી કરી છે. ભૂકંપનું કેન્દ્રબિંદુ અનાઉ શહેરથી લગભગ 40 કિલોમીટર ઉત્તરમાં હતું, જે પ્રખ્યાત પર્યટન સ્થળ ફિઓર્ડલેન્ડનું પ્રવેશદ્વાર માનવામાં આવે છે.
ન્યુઝીલેન્ડની રાષ્ટ્રીય આપત્તિ વ્યવસ્થાપન એજન્સીએ લોકોને દરિયાકિનારા અને દરિયાકાંઠાના વિસ્તારોથી દૂર રહેવા વિનંતી કરી છે. જોકે પ્રારંભિક માહિતી છે કે કોઈ મોટું નુકસાન કે જાનહાનિ નોંધાઈ નથી.
જ્યારે અમેરિકી જીઓલોજિકલ સર્વેક્ષણ (USGS) અને જર્મનીના જીઓસાયન્સ રિસર્ચ સેન્ટર (GFZ) એ ભૂકંપની તીવ્રતા 5.9 હોવાનું નોંધ્યું છે. બંને એજન્સીઓના જણાવ્યા અનુસાર ભૂકંપનું કેન્દ્ર 50 કિલોમીટરથી વધુ ઊંડાઈએ હતું.
દરમિયાન ગુરુવારે ભારતના ગુજરાતના કચ્છ જિલ્લામાં ત્રણ મિનિટના અંતરે બે આંચકા અનુભવાયા હતા. ગાંધીનગર સ્થિત સિસ્મોલોજીકલ રિસર્ચ ઇન્સ્ટિટ્યૂટ (ISR) અનુસાર પ્રથમ આંચકા બપોરે 2:20 વાગ્યે 3.6 ની તીવ્રતાનો હતો, જેનું કેન્દ્ર ખાવડાથી 32 કિલોમીટર ઉત્તરપૂર્વમાં હતું. ત્રણ મિનિટ પછી બપોરે 2:23 વાગ્યે 3.2 ની તીવ્રતાનો બીજો આંચકો આવ્યો, જેનું કેન્દ્ર ધોળાવીરાથી 32 કિલોમીટર ઉત્તરપશ્ચિમમાં હતું.
હાલમાં કચ્છમાં ભૂકંપથી કોઈ નુકસાન કે જાનહાનિની માહિતી આવી નથી. સ્થાનિક વહીવટીતંત્ર પરિસ્થિતિ પર નજર રાખી રહ્યું છે.
