નવસારી મનપાના ફાયર વિભાગે અમરદીપ એપાર્ટમેન્ટમાં દિવાલોમાં તિરાડો પડતાં 24 પરિવારોને સુરક્ષિત સ્થળે ખસેડ્યા
વાત્સલ્યમ સમાચાર
મદન વૈષ્ણવ
નવસારી મહાનગરપાલિકાના ફાયર વિભાગ અને ક્રાઈસિસ મેનેજમેન્ટ ટીમે પોતાની ઝડપી કામગીરી, સતર્કતા અને સુઆયોજિત બચાવ અભિયાનથી એક સંભવિત મોટી દુર્ઘટનાને ટાળી નાગરિક સુરક્ષાનું ઉત્તમ ઉદાહરણ પૂરું પાડ્યું છે. વિજલપોર રોડ પર સુશ્રુષા હોસ્પિટલની બાજુમાં આવેલા અમરદીપ એપાર્ટમેન્ટમાં દિવાલો નમી જવાની અને બિલ્ડિંગમાં ગંભીર તિરાડો દેખાવાની જાણ થતાં જ ફાયર વિભાગે ગણતરીની મિનિટોમાં ઘટનાસ્થળે પહોંચી સમગ્ર વિસ્તારને કોર્ડન કરીને તાત્કાલિક બચાવ કામગીરી શરૂ કરી હતી.
તપાસ દરમિયાન બિલ્ડિંગનો એક ભાગ નીચે બેસી જતાં અને અનેક દિવાલોમાં મોટી તિરાડો જોવા મળતાં કોઈ પણ ક્ષણે ગંભીર અકસ્માત સર્જાઈ શકે તેવી સ્થિતિ ઉભી થઈ હતી. પરંતુ ફાયર વિભાગે સમય ગુમાવ્યા વિના બિલ્ડિંગમાં રહેતા તમામ પરિવારોને સલામત રીતે બહાર કાઢી સમગ્ર બિલ્ડિંગ ખાલી કરાવ્યું હતું.
ફાયર વિભાગની ત્વરિત અને આયોજનબદ્ધ કામગીરીના પરિણામે કુલ 24 ફ્લેટમાં રહેતા પરિવારોને સુરક્ષિત સ્થળે સ્થળાંતર કરવામાં આવ્યા હતા. સમયસર લેવામાં આવેલા આ નિર્ણયના કારણે કોઈ જાનહાનિ કે ઈજાની ઘટના બની નહોતી, જે સમગ્ર કામગીરીની સૌથી મોટી સફળતા ગણાઈ રહી છે.
સ્થળાંતર કરાયેલા પરિવારો માટે વહીવટીતંત્ર દ્વારા તાત્કાલિક વૈકલ્પિક રહેઠાણ, ભોજન તેમજ અન્ય જરૂરી પ્રાથમિક સુવિધાઓની પણ યોગ્ય વ્યવસ્થા કરવામાં આવી હતી. આ સમગ્ર કામગીરી દરમિયાન નવસારી મહાનગરપાલિકાના સ્ટેન્ડિંગ કમિટીના ચેરમેન મુકેશભાઈ અગ્રવાલ તથા શાસક પક્ષના નેતા નરેશ પુરોહિત સતત ઘટનાસ્થળે હાજર રહી સમગ્ર બચાવ કામગીરી પર નજર રાખી અધિકારીઓને જરૂરી માર્ગદર્શન આપતા રહ્યા હતા.
નવસારી મહાનગરપાલિકાના ફાયર વિભાગની સમયસૂચકતા, તકેદારી અને ટીમવર્કના કારણે એક મોટી જાનહાનિ ટળી હોવાનું સ્થાનિક નાગરિકોમાં ચર્ચાનો વિષય બન્યું છે. શહેરવાસીઓએ ફાયર વિભાગ, ક્રાઈસિસ મેનેજમેન્ટ ટીમ અને સમગ્ર વહીવટી તંત્રની પ્રશંસા કરતાં જણાવ્યું કે આવી ત્વરિત કામગીરી જ આપત્તિના સમયમાં લોકો માટે સાચી જીવનરેખા સાબિત થાય છે.
ફાયર વિભાગની આ શ્રેષ્ઠ કામગીરીએ ફરી એકવાર સાબિત કર્યું છે કે નવસારી મહાનગરપાલિકા નાગરિકોની સુરક્ષા અને સુખાકારી માટે સંપૂર્ણપણે પ્રતિબદ્ધ છે. હાલમાં પણ ફાયર વિભાગની ટીમ સાવચેતીના ભાગરૂપે ઘટનાસ્થળે સતત નજર રાખી રહી છે.
