વાત્સલ્યમ સમાચાર
મદન વૈષ્ણવ-ડાંગ
ડાંગ જિલ્લાનાં બરડીપાડા (કાલીબેલ ) તથા સુબીર તાલુકાના ઢોંગીઆંબા ગામ ખાતે વન વિભાગનાં કર્મચારીઓ દ્વારા ગેરકાયદેસર રીતે વૃક્ષ કાપનાર ઇસમો વિરુદ્ધ કાર્યવાહી કરવામાં આવી રહી હતી.ત્યારે બંને સ્થળો પર કેટલાક અસામાજીક તત્વોએ વન વિભાગના કર્મચારીઓ પર હુમલો કર્યો હતો.અને આ અસામાજિક તત્વો દ્વારા વન વિભાગના કર્મચારીઓને દંડાથી માર મારવામાં આવ્યા હતા.
ડાંગ જિલ્લાનાં બરડીપાડા ફોરેસ્ટ રેન્જ ઓફિસમાં બીટગાર્ડ તરીકે ફરજ બજાવતા મેઘજીભાઈ પેથાભાઈ ટોયટા એ બાતમીના આધારે આર.એફ.સી. નંબર-૬૫ માં ગેરકાયદેસર રીતે ખૈરના ઝાડ કાપનાર સુરેશભાઈ શંકરભાઈ ડબકીયા (રહે.ભાલખેત તા.વઘઈ જી.ડાંગ ) ને રંગે હાથ ઝડપી પાડ્યો હતો.જે બાદ બરડીપાડા રેન્જ ઓફિસ ખાતે વન વિભાગના કર્મચારીઓ દ્વારા આરોપી વિરૂદ્ધ કાર્યવાહી કરવામાં આવી રહી હતી.તે દરમિયાન શંકરભાઈ લક્ષ્યાભાઈ ડબકીયા (રહે.ભાલખેત તા.વઘઈ જી.ડાંગ ) તથા અન્ય 13 જેટલા અજાણ્યા ઈસમો ટોળું બનાવીને ઓફિસમાં ઘૂસી ગયા હતા.આ ટોળાનો હેતુ સુરેશ શંકરભાઈ ડબકીયા ને છોડાવવાનો હતો.ત્યારે આ ટોળાએ સાથે મળી બીટગાર્ડ તથા અન્ય કર્મચારીઓને દંડા વડે તથા ઈંટો વડે છુટા ઘા કર્યા હતા. તેમજ આ ટોળા દ્વારા વન વિભાગના કર્મચારીઓને મૂઢમાર મારવામાં આવ્યો હતો.અને રેન્જ ઓફિસમાં સરકારી ફાઈલો તથા અન્ય ચીજ વસ્તુઓ વેરવિખેર કરી નુકસાન પહોંચાડ્યુ હતુ. તેમજ આ ટોળા દ્વારા સુરેશ શંકરભાઈ ડબકીયાને ગેરકાયદેસર રીતે છોડાવી લઈ ગયા હતા.આ જ પ્રકારની ઘટના સુબીર તાલુકાના ઢોંગીઆંબા ગામ ખાતે પણ જોવા મળી હતી.જેમાં ૧. વિશાલભાઈ સુરેશભાઈ ભુર કુંડ,૨.આશીષભાઈ ગમુભાઇ લોતીયા,૩. કમલેશભાઈ સતરુભાઈ પવાર,૪. હરેશભાઈ સતરુભાઈ પવાર (ચારેય રહે . ઢોંગીઆંબા તા.સુબીર જી.ડાંગ) આર. એફ.સી.નં-૧૬૨ માથી સાગના લાકડા કાપીને બે અલગ અલગ બળદગાડામા લઇ જઇ રહ્યા હતા. તે દરમ્યાન વન વિભાગના કર્મચારીઓએ પોતાના સહ કર્મચારીઓ સાથે મળીને આ ચાર આરોપીઓની અટકાયત કરી હતી.જે બાદ ફોરેસ્ટ ખાતાના કર્મચારીઓએ ચારેય આરોપીઓને આર.એફ.સી. નંબર ૧૬૨ મા લઇ જઈ કાર્યવાહી કરતા હતા.તે વખતે ઢોંગીઆંબા ગામના રૂઈપાડા ફળીયાના ૧૦૦ થી ૧૨૫ જેટલા માણસોના ટોળાએ બળદ ગાડા તથા સરકારી વાહન પાસે મુકેલ ત્રણ કર્મચારીઓને બંધક બનાવ્યા હતા.તેમજ ટોળાના ઇસમો પૈકી એક ઈસમે બીટગાર્ડ શિવરામભાઈના મોબાઇલ ઉપર ફોન કરેલ અને જણાવેલ કે,”તમે જે જંગલમાં અમારા ગામના માણસોને લાકડા ચોરીમાં પકડેલ છે તેઓને અમોને સોપી દો અને તમારા જંગલખાતાના માણસો ને લઈ જાવ.” જે બાદ કાલીબેલ રેંજનાં ચીખલા રાઉન્ડમાં ફોરેસ્ટર તરીકે ફરજ બજાવતા રમેશ ચિમન ગાવિત તથા ફોરેસ્ટ કર્મચારીઓ પ્રાઈવેટ જીપગાડી લઈ ઢોંગીઆંબા ગામના રૂઇપાડા ફળીયામાં ગયા હતા.ત્યારે અહી ટોળા સાથે એક સંપ થઈ જીપગાડીમાં બેસેલ ફોરેસ્ટ ખાતાના કર્મચારીઓને લાકડાના દંડાથી તથા પથ્થરોથી તથા ધારદાર હથીયાર (કોપતા) થી મારી નાખવાના ઇરાદાથી માર માર્યો હતો.આ બંને ઘટનાને લઈને વન વિભાગના કર્મચારીઓએ આરોપીઓ તથા બંને ટોળાં વિરુદ્ધ પોલીસ ફરિયાદ નોંધાવી હતી.હાલમાં સુબીર પોલીસે બન્ને ઘટનાઓને લઈને ફરિયાદ નોંધી આગળની કાર્યવાહી હાથ ધરી હોવાનું જાણવા મળેલ છે..
