પંચમહાલ ગોધરા
નિલેશભાઈ દરજી શહેરા 
મોરવા હડફ: નારી વંદન ઉત્સવના ભાગરૂપે અભયમ ૧૮૧ મહિલા હેલ્પલાઇન પંચમહાલ દ્વારા મોરવા હડફની ધી કૃષિકાર સેકન્ડરી એન્ડ હાયર સેકન્ડરી હાઇસ્કૂલમાં મહિલા નેતૃત્વ દિવસની ઉજવણી કરવામાં આવી હતી. આ કાર્યક્રમમાં શાળાની વિદ્યાર્થીનીઓ અને સ્ટાફે ખૂબ જ ઉત્સાહભેર ભાગ લીધો હતો.
કાર્યક્રમનો મુખ્ય ઉદ્દેશ્ય વિદ્યાર્થીનીઓમાં નેતૃત્વ શક્તિનો વિકાસ થાય અને તેમની સુષુપ્ત શક્તિઓને બહાર લાવવાનો હતો. આ અંગે અભયમ ૧૮૧ મહિલા હેલ્પલાઇનના કાઉન્સેલર દીપલ પટેલે વિદ્યાર્થીનીઓને માર્ગદર્શન આપ્યું હતું. તેમણે અભયમ હેલ્પલાઇનની કામગીરી વિશે વિસ્તૃત માહિતી આપતા જણાવ્યું કે, કોઈપણ મહિલા, યુવતી કે વિદ્યાર્થીની મુશ્કેલીના સમયે ૧૮૧ મહિલા હેલ્પલાઇન પર કોલ કરીને મદદ મેળવી શકે છે.
દીપલ પટેલે વધુમાં જણાવ્યું કે, આ હેલ્પલાઇન ચોવીસ કલાક વિનામૂલ્યે મદદ, માર્ગદર્શન અને બચાવની સેવાઓ પૂરી પાડે છે. શારીરિક, માનસિક, જાતીય હિંસા, ઘરેલુ હિંસા, લગ્નજીવનના વિખવાદો અને લગ્નેતર સંબંધો જેવા અનેક કિસ્સાઓમાં અભયમની ટીમ સફળતાપૂર્વક કામ કરી રહી છે. તાત્કાલિક પ્રતિસાદ આપીને પીડિત મહિલાને મદદ પહોંચાડવા બદલ દિવસ-પ્રતિદિવસ અભયમની કામગીરી વધુ વિશ્વસનીય બની રહી છે. ઝડપી સેવાઓ મેળવવા માટે સ્માર્ટફોનમાં ‘અભયમ એપ્લિકેશન’ ડાઉનલોડ કરવા પણ અનુરોધ કરવામાં આવ્યો હતો.
આ કાર્યક્રમમાં સ્વ-બચાવની કેટલીક તકનીકો અને સેફ્ટી પ્લાન વિશે પણ માર્ગદર્શન આપવામાં આવ્યું હતું. આ કાર્યક્રમને સફળ બનાવવા માટે શાળાના પ્રિન્સિપાલ અને સ્ટાફનો સહયોગ મળ્યો હતો.
