ગુજરાત સહિત દેશના 12 રાજ્યોમાં SIRના બીજા તબક્કાનો પ્રારંભ
મુખ્ય ચૂંટણી કમિશનર જ્ઞાનેશ કુમારે આજે એક પત્રકાર પરિષદમાં રાષ્ટ્ર વ્યાપી SIR ની જાહેરાત કરી
બિહારની સફળતા બાદ હવે મુખ્ય ચૂંટણી કમિશનર જ્ઞાનેશ કુમારે પત્રકાર પરિષદ યોજીને રાષ્ટ્રવ્યાપી SIRની જાહેરાત કરી છે. પ્રેસ કોન્ફરન્સમાં મુખ્ય ચૂંટણી કમિશનર જ્ઞાનેશ કુમારે જણાવ્યું હતું કે મતદાર યાદીઓના ખાસ સઘન સુધારા (SIR) નો બીજો તબક્કો 12 રાજ્યોમાં શરૂ કરવામાં આવી રહ્યો છે. આ તબક્કામાં મતદાર યાદી અપડેટ કરવી, નવા મતદારો ઉમેરવા અને ભૂલો સુધારવાનો સમાવેશ થશે.
ચૂંટણી કમિશન બીજા તબક્કામાં 12 રાજ્યો અને કેન્દ્રશાસિત પ્રદેશોમાં SIR હાથ ધરી રહ્યું છે. આ 12 રાજ્યોમાં આંદામાન અને નિકોબાર ટાપુઓ, ગોવા, પુડુચેરી, છત્તીસગઢ, ગુજરાત, કેરળ, મધ્યપ્રદેશ, ઉત્તર પ્રદેશ, રાજસ્થાન, પશ્ચિમ બંગાળ, તમિલનાડુ અને લક્ષદ્વીપનો સમાવેશ થાય છે.
મુખ્ય ચૂંટણી કમિશનર જ્ઞાનેશ કુમારે જણાવ્યું હતું કે, આ કવાયત દરમિયાન, બૂથ લેવલ ઓફિસર્સ (BLOs) દરેક મતદારના ઘરે ઓછામાં ઓછા ત્રણ વખત મુલાકાત લેશે. જેથી નવા મતદારો યાદીમાં ઉમેરાય અને કોઈપણ ભૂલો સુધારી શકાય. જ્ઞાનેશ કુમારે જણાવ્યું હતું કે, “BLOs ઘરે ઘરે જઈને ફોર્મ-6 અને ઘોષણાપત્રો એકત્રિત કરશે, નવા મતદારોને ફોર્મ ભરવામાં મદદ કરશે અને તેમને ERO (ચૂંટણી નોંધણી અધિકારી) અથવા AERO (સહાયક ERO) ને સોંપશે.”
મુખ્ય ચૂંટણી કમિશનરે જણાવ્યું કે, તાલીમનો બીજો તબક્કો મંગળવારથી શરૂ થશે. તેમણે તમામ મુખ્ય ચૂંટણી અધિકારીઓ (CEOs) અને જિલ્લા ચૂંટણી અધિકારીઓ (DEOs) ને આગામી બે દિવસમાં રાજકીય પક્ષો સાથે મુલાકાત કરીને SIR પ્રક્રિયા સમજાવવાનો નિર્દેશ પણ આપ્યો હતો.
કમિશને એવો પણ નિર્દેશ આપ્યો છે કે મતદારો, ખાસ કરીને વૃદ્ધો, બીમાર, અપંગ (PwD), ગરીબો અને સંવેદનશીલ લોકોને કોઈ અસુવિધા ન થાય અને તેમને મહત્તમ સહાય પૂરી પાડવામાં આવે તે સુનિશ્ચિત કરવા માટે લોકોને તૈનાત કરવામાં આવશે. જ્ઞાનેશ કુમારે એ પણ સ્પષ્ટતા કરી હતી કે કોઈપણ મતદાન મથક પર 1,200 થી વધુ મતદારો નહીં હોય.
મુખ્ય ચૂંટણી કમિશનર જ્ઞાનેશ કુમારે જણાવ્યું કે SIR જેવી પ્રક્રિયા જરૂરી હોવાના ઘણા કારણો છે. આમાં વારંવાર સ્થળાંતર, જેના પરિણામે મતદારોની નોંધણી અનેક સ્થળોએ થવી, મૃત મતદારોના નામ દૂર કરવામાં નિષ્ફળતા અને યાદીમાં વિદેશીઓનો ખોટો સમાવેશ શામેલ છે.
SIR પ્રક્રિયા માટે જરૂરી દસ્તાવેજ
- કેન્દ્ર અથવા રાજ્ય સરકાર દ્વારા જાહેર પેન્શન પેમેન્ટ ઓર્ડર
- સરકારી અથવા સ્થાનિક નિગમ, બેન્ક,પોસ્ટ ઓફિસ, LIC દ્વારા જાહેર સર્ટિફિકેટ
- બર્થ સર્ટિફિકેટ
- પાસપોર્ટ
- એજ્યુકેશન સર્ટિફિકેટ
- પરમેનેન્ટ રેસિડન્ટ સર્ટિફિકેટ
- ફોરેસ્ટ રાઇડ સર્ટિફિકેટ
- જાતિ પ્રમાણપત્ર
- NRC
- રાજ્ય અથવા લોકલ બોડી દ્વારા તૈયાર ફેમિલી રજિસ્ટર
- જમીન અથવા હાઉસ એલોટમેન્ટ સર્ટિફિકેટ
