ડિજિટલ ગુરુ પારિતોષિકથી વિજાપુરના ગોવિંદપુરા પ્રાથમિક શાળાના શિક્ષકનું ગૌરવભર્યું સન્માન કરાયું 
વાત્સલ્યમ સમાચાર
સૈયદજી બુખારી વિજાપુર
ગુજરાત રાજ્ય એવોર્ડી ટીચર્સ ફેડરેશન દ્વારા આયોજિત ગૌરવ અભિવાદન કાર્યક્રમ અમદાવાદ સ્થિત આનંદ નિકેતન સ્કૂલ ખાતે ભવ્ય રીતે યોજાયો હતો. આ કાર્યક્રમમાં વિજાપુર તાલુકાની ગોવિંદપુરા અનુપમ પ્રાથમિક શાળાના પ્રતિભાશાળી શિક્ષક મેહુલકુમાર મોહનભાઈ પ્રજાપતિને શિક્ષણ ક્ષેત્રે ટેકનોલોજીના અસરકારક અને નવીન ઉપયોગ બદલ “ડિજિટલ ગુરુ પારિતોષિક”થી ગૌરવભેર સન્માનિત કરવામાં આવ્યા હતા.
કાર્યક્રમ દરમિયાન રાજ્યના માનનીય શિક્ષણમંત્રી રિવાબા જાડેજા સાહેબ તેમજ ભૂતપૂર્વ શિક્ષણમંત્રી કુબેરભાઈ ડીંડોર સાહેબના હસ્તે શ્રી મેહુલભાઈને પારિતોષિક અર્પણ કરવામાં આવ્યું હતું. આ ગૌરવપૂર્ણ ક્ષણે શાળા પરિવાર, વિજાપુર તાલુકાના શિક્ષકસમુદાય તેમજ સમગ્ર શિક્ષણ જગતમાં આનંદ અને ગૌરવની લાગણી પ્રસરી ગઈ હતી.
ઉલ્લેખનીય છે કે મેહુલકુમાર પ્રજાપતિ છેલ્લા અનેક વર્ષોથી શિક્ષણમાં ICT આધારિત અભ્યાસક્રમ અમલમાં મૂકીને વિદ્યાર્થીઓને આધુનિક અને ગુણવત્તાયુક્ત શિક્ષણ આપવા સતત પ્રયત્નશીલ રહ્યા છે. સ્માર્ટ ક્લાસરૂમ, ડિજિટલ ટૂલ્સ, ઇ-કન્ટેન્ટ નિર્માણ, ઓનલાઇન લર્નિંગ પ્લેટફોર્મ તથા ઇન્ટરએક્ટિવ શૈક્ષણિક પ્રવૃત્તિઓ દ્વારા તેમણે શાળાનું શૈક્ષણિક વાતાવરણ વધુ સજીવ અને રસપ્રદ બનાવ્યું છે. ટેકનોલોજી આધારિત અધ્યાપન પદ્ધતિઓથી વિદ્યાર્થીઓમાં સર્જનાત્મકતા, તર્કશક્તિ અને ડિજિટલ કૌશલ્ય વિકસે તે દિશામાં તેમણે નોંધપાત્ર કામગીરી કરી છે.
શિક્ષણને સમયસાપેક્ષ બનાવવા માટે તેમણે જાતે ડિજિટલ સામગ્રી તૈયાર કરી, વિવિધ ઓનલાઇન તાલીમોમાં ભાગ લઈ પોતાની કુશળતા વિકસાવી અને તે જ્ઞાન વિદ્યાર્થીઓ સુધી પહોંચાડ્યું છે. ટેકનોલોજી દ્વારા દરેક બાળક સુધી ગુણવત્તાયુક્ત શિક્ષણ પહોંચે અને શાળાનું શૈક્ષણિક પરિણામ વધુ સુધરે તે માટેના તેમના સતત પ્રયાસોને ધ્યાનમાં રાખીને આ પારિતોષિક એનાયત કરવામાં આવ્યું છે.
આ અગાઉ પણ તેમને રાજ્ય તથા રાષ્ટ્રીય સ્તરે અનેક સન્માનો પ્રાપ્ત થયા છે. ગુજરાત રાજ્ય સરકાર તરફથી ગુજરાત રાજ્ય શ્રેષ્ઠ શિક્ષક પારિતોષિક તેમજ નવી દિલ્હી ખાતે ભારત સરકારના શિક્ષણ મંત્રાલય દ્વારા આપવામાં આવતું પ્રતિષ્ઠિત નેશનલ ICT એવોર્ડ પ્રાપ્ત કરી તેઓ તાલુકાનું નામ રોશન કરી ચૂક્યા છે. તેમનું આ સન્માન માત્ર વ્યક્તિગત સિદ્ધિ નહીં પરંતુ સરકારી પ્રાથમિક શાળાઓમાં ટેકનોલોજી આધારિત શિક્ષણની સકારાત્મક દિશાનું પ્રેરણાદાયક ઉદાહરણ બની રહ્યું છે.
