વાત્સલ્યમ્ સમાચાર
પૂજા ઠક્કર મુંદરા કચ્છ
મુંદરાના ધ્રબ આયુષમાન આરોગ્ય મંદિર ખાતે ‘બેગલેસ ડે’ અંતર્ગત વિદ્યાર્થીઓનો શૈક્ષણિક પ્રવાસ યોજાયો
મુંદરા: 1 માર્ચ 2026:
કચ્છ જિલ્લાના મુંદરા તાલુકાના ધ્રબ ગામે આવેલ આયુષમાન આરોગ્ય મંદિર ખાતે ‘બેગલેસ ડે’ ના વિશેષ ઉપલક્ષમાં કમંઢપુર પ્રાથમિક શાળાના વિદ્યાર્થીઓ માટે એક જ્ઞાનવર્ધક મુલાકાતનું આયોજન કરવામાં આવ્યું હતું. પુસ્તકિયા જ્ઞાનની સાથે વ્યવહારુ શિક્ષણ મળે તેવા ઉમદા ઉદ્દેશ્ય સાથે યોજાયેલા આ કાર્યક્રમમાં વિદ્યાર્થીઓને જાહેર આરોગ્ય સેવાઓ અને સરકારી યોજનાઓથી વિગતવાર માહિતગાર કરવામાં આવ્યા હતા.
મુલાકાત દરમિયાન કોમ્યુનિટી હેલ્થ ઓફિસર ડો. હસનઅલી આગરીયા, કિશોર-કિશોરી આરોગ્ય સલાહકાર મહેન્દ્રભાઈ વાઘેલા તથા સ્ત્રી આરોગ્ય કાર્યકર નીતુબેન મકવાણા દ્વારા છાત્રોને આરોગ્ય મંદિરની કાર્યપ્રણાલી સમજાવવામાં આવી હતી. વિદ્યાર્થીઓએ પ્રાથમિક સારવાર, રસીકરણ અને સ્વાસ્થ્ય જાળવણી માટેના પાયાના મુદ્દાઓ વિશે સમજ મેળવી હતી. આ ઉપરાંત આરોગ્ય વિભાગ દ્વારા ચલાવવામાં આવતી વિવિધ લોકકલ્યાણકારી સરકારી યોજનાઓની માહિતી પણ પ્રદાન કરવામાં આવી હતી જે તેમના રોજિંદા જીવનમાં અને પરિવાર માટે અત્યંત ઉપયોગી સાબિત થશે.
શાળાના શિક્ષિકા સોનબાઈ ગઢવી અને પૂજાબેનના માર્ગદર્શન અને સહયોગથી આ મુલાકાત અત્યંત સફળ અને ફળદાયી રહી હતી. હોસ્પિટલના વાતાવરણ અને તબીબી સેવાઓને નજીકથી નિહાળીને વિદ્યાર્થીઓએ ઉત્સાહપૂર્વક નવી બાબતો શીખી હતી અને અંતમાં આ સુંદર આયોજન બદલ સંસ્થાનો આભાર વ્યક્ત કર્યો હતો.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
