ખડકી ટોલનાકા પાસે રજવાડી ચાના માલિક સામે પોલીસ કાર્યવાહી: પરપ્રાંતીય શ્રમિકની નોંધણી ન કરાવતા ફરિયાદ.
તારીખ ૧૪/૦૩/૨૦૨૬
સાજીદ વાઘેલા કાલોલ
પંચમહાલ એસ.ઓ.જી. (Special Operations Group) પોલીસ દ્વારા જાહેરનામાના ભંગ બદલ ખડકી ટોલનાકા પાસે આવેલી એક ચાની દુકાનના માલિક વિરુદ્ધ કાયદેસરની કાર્યવાહી કરવામાં આવી છે. પરપ્રાંતીય શ્રમિકને કામે રાખ્યા બાદ તેની જાણ સ્થાનિક પોલીસ સ્ટેશનમાં ન કરવા બદલ આ પગલું ભરવામાં આવ્યું છે.એસ.ઓ.જી. પોલીસનો સ્ટાફ જ્યારે વેજલપુર પોલીસ સ્ટેશન વિસ્તારમાં પેટ્રોલિંગમાં હતો, ત્યારે ખડકી ટોલનાકા પાસે આવેલી ‘રજવાડી ચા’ નામની દુકાન પર તપાસ હાથ ધરવામાં આવી હતી. તપાસ દરમિયાન ત્યાં ગોપાલ તાવિયાડ નામનો પરપ્રાંતીય શ્રમિક કામ કરતો હોવાનું માલૂમ પડ્યું હતું.પોલીસે જ્યારે શ્રમિકની વિગતો અંગે દુકાન માલિક પ્રકાશચંદ્ર આદેન પાટીદારની પૂછપરછ કરી, ત્યારે જાણવા મળ્યું હતું કે આ શ્રમિકને કામે રાખવા અંગેની કોઈ પણ જાણકારી કે નોંધણી સ્થાનિક વેજલપુર પોલીસ સ્ટેશનમાં કરાવવામાં આવી નહોતી. જિલ્લા મેજિસ્ટ્રેટના જાહેરનામા મુજબ, કોઈપણ પરપ્રાંતીય વ્યક્તિને કામે રાખતા પૂર્વે તેની વિગતો પોલીસ મથકે આપવી અનિવાર્ય છે.પોલીસના જાહેરનામાનો ભંગ કરવા બદલ એસ.ઓ.જી. પોલીસે દુકાનદાર પ્રકાશચંદ્ર પાટીદાર વિરુદ્ધ વેજલપુર પોલીસ સ્ટેશનમાં ગુનો નોંધી આગળની કાર્યવાહી હાથ ધરી છે.પોલીસ તંત્ર દ્વારા વારંવાર અપીલ કરવામાં આવે છે કે કોઈપણ વેપારી કે મકાનમાલિકે પરપ્રાંતીય શ્રમિકો કે ભાડુઆતો રાખતી વખતે તેમની ઓળખના પુરાવા સાથે નજીકના પોલીસ સ્ટેશનમાં ફરજિયાત નોંધણી કરાવવી, અન્યથા કાયદેસરની કાર્યવાહી થઈ શકે છે.
