અહેવાલ:- પ્રતિક ભોઈ
*પ્રાંતિજના દલપુર ખાતે ગેસ ગળતર અને આગની ઘટના અંગે યોજાઈ મોક ડ્રિલ: તંત્રની સજ્જતા ચકાસાઈ*
સાબરકાંઠા જિલ્લાના પ્રાંતિજ તાલુકાના દલપુર ગામ પાસે આવેલ હેક્ઝોન ઇન્ટરકેમ પ્રાઇવેટ લિમિટેડ ખાતે મોક ડ્રિલનું આયોજન કરવામાં આવ્યું હતું.
ઉદ્યોગોમાં અકસ્માત કે કટોકટીના સમયે વહીવટી તંત્ર અને કંપનીના સુરક્ષા એકમોની કાર્યક્ષમતા અને સજ્જતા ચકાસવાના હેતુથી આ કવાયત હાથ ધરાઈ હતી.
આ મોકડ્રિલમાં પ્લાન્ટમાં મિથિલિન ઓક્સાઈડ ગેસ ગળતર (Methylene oxide gas leakage) સાથે આગ લાગવાની કાલ્પનિક ઘટના ઊભી કરવામાં આવી હતી. ઘટનાની જાણ થતા જ કંપનીના ઈમરજન્સી એલાર્મ ગુંજી ઉઠ્યા હતા અને તમામ કર્મચારીઓને સુરક્ષિત સ્થળે ખસેડવાની (Evacuation) પ્રક્રિયા હાથ ધરવામાં આવી હતી.
આ ઘટનાની જાણ થતા જ સ્થાનિક પોલીસ તંત્ર, ફાયર બ્રિગેડની ટીમો અને એમ્બ્યુલન્સ તાત્કાલિક ઘટનાસ્થળે પહોંચી ગયા હતા. ફાયર ફાઈટરો દ્વારા ગેસ ગળતર પર કાબૂ મેળવવા અને આગને ઓલવવા માટે અદ્યતન સાધનોનો ઉપયોગ કરી સફળ કામગીરી કરવામાં આવી હતી. આ ડ્રિલ દરમિયાન ઈજાગ્રસ્ત થયેલા (કાલ્પનિક) વ્યક્તિઓને તાત્કાલિક પ્રાથમિક સારવાર આપી હોસ્પિટલ ખસેડવાની પ્રક્રિયાનું પણ નિદર્શન કરવામાં આવ્યું હતું.
આ મોકડ્રિલમાં જિલ્લા વહીવટી તંત્રના અધિકારીઓ, ડિઝાસ્ટર મેનેજમેન્ટની ટીમ અને કંપનીના હોદ્દેદારો ઉપસ્થિત રહ્યા હતા. અધિકારીઓએ મોક ડ્રિલના અંતે કામગીરીનું મૂલ્યાંકન કર્યું હતું અને કટોકટીના સમયે પ્રતિસાદ આપવાનો સમય (Response Time) ઘટાડવા તેમજ સુરક્ષાના પ્રોટોકોલનું ચુસ્તપણે પાલન કરવા જરૂરી સૂચનો આપ્યા હતા.
નેશનલ હાઈવે પર કાટવાડ પાટીયા સામે આવેલ આ ઔદ્યોગિક એકમમાં યોજાયેલી મોકડ્રિલથી આસપાસના વિસ્તારમાં સુરક્ષા પ્રત્યે જાગૃતિ ફેલાઈ હતી.
આ પ્રસંગે DISH ફેક્ટરી ઇન્સ્પેક્ટરશ્રી, ડિઝાસ્ટર મેનેજમેન્ટ શાખાના અધિકારીશ્રી, મામલતદારશ્રી હિંમતનગર, મામલતદારશ્રી પ્રાંતિજ, જીપીસીબીના અધિકારીશ્રી, 108 ઈમર્જન્સી સેવા ટીમ, ફાયર બ્રિગેડ ટીમ, પોલીસ તેમજ સંબંધિત વિભાગોના અમલીકરણ અધિકારીઓ ઉપસ્થિત રહ્યા હતા.
