છેલ્લા કેટલાક દિવસોથી યુક્રેને પોતાની રણનીતિ બદલીને સીધા રશિયાના આર્થિક સ્ત્રોતો પર હુમલા કરવાનું શરૂ કર્યું છે. યુક્રેની સેનાના લાંબા અંતરના ડ્રોન હવે રશિયાની સરહદની અંદર ઊંડે સુધી જઈને તેલ રિફાઇનરીઓને નિશાન બનાવી રહ્યા છે. તાજેતરમાં રશિયાના યારોસ્લાવ ક્ષેત્રમાં આવેલી એક મોટી રિફાઇનરી પર ડ્રોન હુમલો કરવામાં આવ્યો હતો, જેના કારણે ત્યાં ભીષણ આગ ફાટી નીકળી હતી. જોકે રશિયાએ 30 થી વધુ ડ્રોન તોડી પાડવાનો દાવો કર્યો છે, પરંતુ નુકસાનની તસવીરો કંઈક અલગ જ વાર્તા કહી રહી છે.
બાલ્ટિક સમુદ્રના કિનારે આવેલા રશિયાના અત્યંત મહત્વના ‘ઉસ્ત-લુગા’ ઓઇલ ટર્મિનલ પર પણ એક અઠવાડિયામાં બે વાર હુમલા થયા છે. આ હુમલામાં ઓઇલ લોડિંગ સ્ટેશન અને સ્ટોરેજ ટેન્કોને ભારે નુકસાન થયું છે, જેના કારણે સેન્ટ પીટર્સબર્ગની આસપાસના વિસ્તારોમાં વાયુ પ્રદૂષણની ચેતવણી જારી કરવી પડી હતી. યુક્રેનનો દાવો છે કે આ હુમલા બાદ આ ટર્મિનલની કાર્યક્ષમતામાં 40% નો ઘટાડો થયો છે. નિષ્ણાતોના મતે, આ હુમલા એવા સમયે થયા છે જ્યારે મધ્ય પૂર્વમાં યુદ્ધના કારણે તેલના ભાવ વધી રહ્યા હતા અને રશિયા તેનો લાભ લેવાની તૈયારીમાં હતું.
રશિયાના કુલ મહેસૂલનો લગભગ 33% હિસ્સો તેલ અને ગેસની નિકાસમાંથી આવે છે. યુક્રેનના આ સતત હુમલાઓને કારણે રશિયા હવે પોતાની ઘરેલું જરૂરિયાતો પૂરી કરવા માટે પેટ્રોલની નિકાસ પર ફરીથી પ્રતિબંધ મૂકવા વિચારી રહ્યું છે. રાષ્ટ્રપતિ ઝેલેન્સ્કીએ સ્પષ્ટ શબ્દોમાં કહ્યું છે કે, “અમારા ડ્રોન હવે રશિયાની ઉર્જા વ્યવસ્થાને તોડવા માટે સક્ષમ છે. જો રશિયા યુક્રેનના પાવર ગ્રીડ પર હુમલા કરવાનું બંધ નહીં કરે, તો આ જવાબી કાર્યવાહી હજુ વધુ ઉગ્ર બનશે.”
યુક્રેનની આ ‘ઇકોનોમિક વોરફેર’ (આર્થિક યુદ્ધ) નીતિ પુતિન સરકાર માટે માથાનો દુખાવો બની ગઈ છે. એક તરફ રશિયા યુક્રેનની અંદર આગળ વધવાનો પ્રયાસ કરી રહ્યું છે, તો બીજી તરફ યુક્રેન રશિયાના આર્થિક પાયા પર ઘા કરી રહ્યું છે. જો આ હુમલાઓ ચાલુ રહેશે, તો આંતરરાષ્ટ્રીય બજારમાં તેલના ભાવમાં વધુ ઉછાળો જોવા મળી શકે છે, જેની અસર સમગ્ર વિશ્વ પર પડશે.
