ગુજરાતમાં ફરી માવઠાની આગાહી, પવનની ગતિ 40 થી 60 કિમી પ્રતિ કલાક સુધી પહોંચી શકે છે : હવામાન વિભાગ
રાજ્યમાં અંગ દઝાડતી ગરમી વચ્ચે એક મોટી અપડેટ સામે આવી છે. ગુજરાતમાં ફરી એકવાર માવઠાની સંભાવનાઓ વ્યક્ત થતાં ખેડૂતો અને સામાન્ય નાગરિકોમાં ચિંતા સાથે તૈયારીઓનો માહોલ જોવા મળી રહ્યો છે. હવામાન વિભાગ દ્વારા 19 અને 20 એપ્રિલ દરમિયાન રાજ્યના અનેક વિસ્તારોમાં વરસાદની આગાહી કરવામાં આવી છે, જેના કારણે ઉનાળાની ગરમી વચ્ચે હવામાનમાં અચાનક ફેરફાર જોવા મળી શકે છે.
આગાહી અનુસાર સૌરાષ્ટ્ર અને ઉત્તર ગુજરાતના વિસ્તારોમાં ખાસ અસર જોવા મળી શકે છે. અમરેલી, ભાવનગર અને સાબરકાંઠા જિલ્લામાં વરસાદ પડવાની શક્યતા દર્શાવવામાં આવી છે. સાથે જ અરવલ્લી, દાહોદ અને મહીસાગર જેવા વિસ્તારોમાં પણ છૂટાછવાયા ઝાપટાં પડી શકે છે. આ બદલાતા હવામાનને કારણે કૃષિ ક્ષેત્ર પર અસર થવાની સંભાવના છે, ખાસ કરીને પાક કાપણીના સમયમાં વરસાદ ખેડૂતો માટે પડકારરૂપ બની શકે છે.
હવામાન વિભાગે વધુમાં ચેતવણી આપી છે કે પવનની ગતિ 40 થી 60 કિમી પ્રતિ કલાક સુધી પહોંચી શકે છે, જેના કારણે વૃક્ષો, વીજળીના થાંભલા અથવા નબળી માળખાકીય વસ્તુઓને નુકસાન થવાની શક્યતા રહે છે. તેથી નાગરિકોને સાવચેતી રાખવા અને અનાવશ્યક બહાર ન નીકળવા સલાહ આપવામાં આવી છે. ખાસ કરીને દરિયાકાંઠાના વિસ્તારોમાં રહેતા માછીમારોને દરિયો ન ખેડવા માટે સૂચના આપવામાં આવી છે, કારણ કે તોફાની પવન અને ઉંચી લહેરો જોખમકારક સાબિત થઈ શકે છે. સુરક્ષા માટેના પગલાં તરીકે આ સૂચનાઓનું પાલન કરવું અત્યંત જરૂરી છે.
