વાત્સલ્યમ્ સમાચાર,
પૂજા ઠક્કર – મુંદરા કચ્છ.
ગુજરાતના ફ્રોઝન ફૂડ નિકાસ ક્ષેત્રને મળી મોટી ભેટ: અદાણી લોજિસ્ટિક્સ દ્વારા દેશની પ્રથમ સ્પેશિયલ રેલ-ટુ-પોર્ટ કોલ્ડ ચેઈન કોરિડોરનો પ્રારંભ
આઈસીડી વિરોચનનગર (ગુજરાત) અને મુંદ્રા પોર્ટ વચ્ચે દોડશે દેશની પ્રથમ ખાસ રેફ્રિજરેટેડ કન્ટેનર ટ્રેન
અદાણી લોજિસ્ટિક્સ, હાયફન ફૂડ્સ અને એવરગ્રીન મરીન કોર્પોરેશન વચ્ચે ત્રિપક્ષીય વ્યાપારી ભાગીદારી
પિઝા હટ, બર્ગર કિંગ અને કેએફસી જેવી વૈશ્વિક બ્રાન્ડ્સને ગુજરાતથી સપ્લાય થશે ફ્રોઝન ફૂડ
મુંદરા, તા. 25 : ભારતના ફ્રોઝન ફૂડ નિકાસ ક્ષેત્રમાં એક નવો ઈતિહાસ રચતા અદાણી પોર્ટ્સ એન્ડ સ્પેશિયલ ઈકોનોમિક ઝોન લિમિટેડ (APSEZ) ની સંકલિત લોજિસ્ટિક્સ પાંખ ‘અદાણી લોજિસ્ટિક્સ લિમિટેડ’ (ALL) દ્વારા દેશના પ્રથમ ખાસ રીફર (રેફ્રિજરેટેડ) રેલ કોરિડોરની શરૂઆત કરવામાં આવી છે. હાયફન ફૂડ્સની નિકાસ વધારવાના ઉદ્દેશ્ય સાથે ગુજરાતના આઈસીડી (Inland Container Depot) વિરોચનનગરને મુંદરા પોર્ટ સાથે જોડતી દેશની પ્રથમ ખાસ રેફ્રિજરેટેડ કન્ટેનર ટ્રેનને લીલી ઝંડી બતાવી પ્રસ્થાન કરાવવામાં આવ્યું છે. અત્યાધુનિક કોલ્ડ ચેઈન લોજિસ્ટિક્સના નિર્માણમાં આ પહેલ એક મોટું સીમાચિહ્ન સાબિત થશે.
વ્યૂહાત્મક ત્રિપક્ષીય ભાગીદારી
આ નવો પ્રોજેક્ટ હાયફન ફૂડ્સ, અદાણી લોજિસ્ટિક્સ અને વૈશ્વિક શિપિંગ ક્ષેત્રની અગ્રણી કંપની એવરગ્રીન મરીન કોર્પોરેશન વચ્ચેના વ્યૂહાત્મક જોડાણનું પરિણામ છે. આ ભાગીદારીનો મુખ્ય હેતુ રેલ-ટુ-પોર્ટ સપ્લાય ચેઈન દ્વારા ફ્રોઝન અને તાપમાન પ્રત્યે સંવેદનશીલ એવા કાર્ગોના પરિવહનને વધુ સુદૃઢ બનાવવાનો છે. તેનાથી ભારતના તાજા શાકભાજી અને પ્રોસેસ્ડ ફ્રોઝન ફૂડ પ્રોડક્ટ્સને વિશ્વભરમાં સુરક્ષિત અને ઉચ્ચ ગુણવત્તા સાથે પહોંચાડી શકાશે.
વૈશ્વિક બજારો અને પ્રખ્યાત બ્રાન્ડ્સને સપ્લાય
આ ખાસ રીફર ટ્રેન દ્વારા સપ્લાય કરાતો ફ્રોઝન કાર્ગો મલેશિયા, સિંગાપોર, દક્ષિણ કોરિયા, જાપાન, તાઇવાન અને ઇન્ડોનેશિયા જેવા અગ્રણી આંતરરાષ્ટ્રીય બજારોમાં મોકલવામાં આવશે. આ માલ વિશ્વની સૌથી પ્રખ્યાત ફૂડ બ્રાન્ડ્સ જેવી કે પીઝા હટ (Pizza Hut), બર્ગર કિંગ (Burger King), ટેકો બેલ (Taco Bell), સબવે (Subway), આઈકિયા (IKEA) અને કેએફસી (KFC) ને સપ્લાય કરવામાં આવશે.
પર્યાવરણ પૂરક અને ગુણવત્તાસભર સફર
રોડ ટ્રાન્સપોર્ટના બદલે આ નવીન રેલ સેવાના ઉપયોગથી પ્રદૂષણમાં મોટો ઘટાડો થશે અને કાર્બન ઉત્સર્જન ઘટશે જે પર્યાવરણ માટે સાનુકૂળ છે. આ ટ્રેન મુસાફરી દરમિયાન ચોક્કસ તાપમાન જાળવી રાખવાની ક્ષમતા ધરાવે છે, જેથી ફ્રોઝન ફૂડની ગુણવત્તા બગડશે નહીં અને સમયસર ડીલીવરી સુનિશ્ચિત કરી શકાશે.
અદાણી લોજિસ્ટિક્સનું મજબૂત ઈન્ફ્રાસ્ટ્રક્ચર
અદાણી લોજિસ્ટિક્સ લિમિટેડ (ALL) નિકાસકારો અને ઉત્પાદકોને એન્ડ-ટુ-એન્ડ સપ્લાય ચેઈન સોલ્યુશન્સ પૂરા પાડવા માટે બંદરો, ઈનલેન્ડ કન્ટેનર ડેપો, રેલ કનેક્ટિવિટી અને વેરહાઉસિંગ ક્ષેત્રે કાર્યરત છે. સાણંદ, વિરમગામ અને કડી જેવા મુખ્ય ઔદ્યોગિક હબની નજીક આવેલું અદાણી આઈસીડી વિરોચનનગર વાર્ષિક ૯૨,૪૦૦ કન્ટેનર (TEUs) હેન્ડલ કરવાની ક્ષમતા ધરાવે છે.
ઉલ્લેખનીય છે કે આ ટર્મિનલ દેશનું પ્રથમ ‘ઝીરો ટચ કસ્ટમર એક્સપિરિયન્સ’પ્રોગ્રામ ધરાવતું કેન્દ્ર છે જે મુંદરા અને પીપાવાવ બંદરો માટે ઉત્કૃષ્ટ આયાત-નિકાસ કનેક્ટિવિટી પૂરી પાડે છે. આ ઉપરાંત તે ડોમેસ્ટિક કાર્ગો રૂટને દેશના પૂર્વ અને ઉત્તર-પૂર્વના ભાગો જેવા કે ડંકુની, કોલકાતા, જીરાનિયા (ત્રિપુરા), હલ્દિયા અને બાયહાટા સાથે પણ જોડે છે.
જ્યારે ભારત પોતાની વેપાર સ્પર્ધાત્મકતા વધારવા માટે સજ્જ થઈ રહ્યું છે ત્યારે અદાણી લોજિસ્ટિક્સ દ્વારા શરૂ કરાયેલો આ સ્પેશિયલ કોરિડોર ભવિષ્યના આધુનિક મલ્ટિમોડલ ઈન્ફ્રાસ્ટ્રક્ચરના નિર્માણમાં કંપનીની ભૂમિકાને વધુ મજબૂત કરે છે.
વાત્સલ્યમ્ સમાચારમાં મુંદરા-કચ્છના સમાચાર/જાહેરાત આપવા માટે સંપર્ક કરો :
-પુજા ઠક્કર,
9426244508,
ptindia112@gmail.com
