MORBI:મોરબીના માધાપર જાપા પાસેથી જાહેરમાં જુગાર રમતા ૫ ઝડપાયા
મોરબી શહેરમાં શ્રાવણ માસ પૂર્વે જ જુગારની પ્રવૃત્તિઓ પર અંકુશ લાવવા માટે પોલીસ એક્શન મોડમાં જોવા મળી રહી છે. મોરબી સિટી એ ડિવિઝન પોલીસની ટીમે પેટ્રોલિંગ દરમિયાન બાતમીના આધારે માધાપર જાપા પાસે દરોડો પાડી જાહેરમાં તીનપત્તીનો જુગાર રમતા પાંચ શખ્સોને રંગેહાથ ઝડપી પાડ્યા છે. પોલીસે આરોપીઓ પાસેથી કુલ રૂપિયા ૧૧,૨૦૦ની રોકડ રકમ જપ્ત કરી કાયદેસરની કાર્યવાહી હાથ ધરી છે.
મળતી માહિતી મુજબ, મોરબી સિટી એ ડિવિઝન પોલીસની ટીમ વિસ્તારમાં કાયદો અને વ્યવસ્થાની સ્થિતિ જાળવવા માટે પેટ્રોલિંગમાં હતી. આ દરમિયાન માધાપર જાપા પાસે કેટલાક ઇસમો એકઠા થઈને હાર-જીતનો જુગાર રમી રહ્યા હોવાની ચોક્કસ હકીકત મળી હતી. જેના આધારે પોલીસે ત્વરિત દરોડો પાડતા જુગારીઓમાં નાસભાગ મચી ગઈ હતી. જોકે, પોલીસે કોર્ડન કરીને પાંચેય ઇસમોને ઝડપી લીધા હતા.
ઝડપાયેલા આરોપીઓ – ૧. ફિરોઝભાઈ ગફુરભાઇ મોવર (રહે. જીવન પાર્ક, વાવડી રોડ, મોરબી) ૨. વિનુભાઈ ડુંગરભાઈ વિડજા (રહે. વાવડી ગામ, મોરબી) ૩. અખતરભાઈ ગુલમામદભાઈ જુસા (રહે. વિશીપરા, મોરબી) ૪. અજયભાઈ નવલભાઈ દેવ (રહે. કાલિકા પ્લોટ, શેરી નંબર-૦૩, મોરબી) ૫. ભીખાભાઈ શંકરભાઈ રસાણીયા (રહે. મોરબી) પોલીસે ઘટનાસ્થળેથી જુગારના સાહિત્ય સહિત કુલ રૂપિયા ૧૧,૨૦૦ની રોકડ રકમનો મુદ્દામાલ કબજે કર્યો છે. આ પાંચેય આરોપીઓ વિરુદ્ધ જુગારધારાની કલમ હેઠળ ગુનો નોંધીને આગળની કાયદેસરની તપાસ શરૂ કરવામાં આવી છે.
