નવસારી મહાનગરપાલિકાના પ્રથમ મેયર અશોકભાઈ ધોરાજીયાનું વાંસદાના શ્રી જલારામબાપા મંદિરે ભવ્ય સ્વાગત
વાત્સલ્યમ સમાચાર
મદન વૈષ્ણવ
નવસારી મહાનગરપાલિકાના પ્રથમ મેયર તરીકે નિયુક્ત થયેલા અશોકભાઈ ધોરાજીયાની વાંસદા ખાતેની મુલાકાત દરમિયાન શ્રી જલારામબાપા મંદિરે તેમનું ઉષ્માભર્યું અને ભવ્ય સ્વાગત કરવામાં આવ્યું હતું. વાંસદા સાથે વર્ષોથી આત્મીય સંબંધ ધરાવતા અને સંગઠનના પાયાના કાર્યકર તરીકે ઓળખાતા અશોકભાઈ ધોરાજીયાના આગમનથી સ્થાનિક કાર્યકરો, સમાજના આગેવાનો અને ભક્તોમાં આનંદની લાગણી જોવા મળી હતી.
વાંસદા પહોંચતા જ અશોકભાઈ ધોરાજીયાએ સૌપ્રથમ શ્રી જલારામબાપાના ચરણોમાં વંદન કરી વિશેષ પૂજા-અર્ચના કરી હતી. તેમણે સમાજની સુખાકારી, પ્રદેશના વિકાસ અને જનકલ્યાણ માટે પ્રાર્થના અર્પણ કરી હતી. મંદિર પરિસરમાં ભક્તિમય વાતાવરણ વચ્ચે તેમનું ફૂલહાર અને શાલ ઓઢાડી સ્વાગત કરવામાં આવ્યું હતું.
આ પ્રસંગે શ્રી જલારામબાપા મંદિર ટ્રસ્ટના સભ્યો દ્વારા અશોકભાઈ ધોરાજીયાને સ્મૃતિચિહ્ન અર્પણ કરી સન્માનિત કરવામાં આવ્યા હતા. ઉપરાંત સમસ્ત પાટીદાર સમાજના અગ્રણી આગેવાનો દ્વારા પણ તેમનું ભાવભર્યું સન્માન કરવામાં આવ્યું હતું. કાર્યક્રમ દરમિયાન ઉપસ્થિત આગેવાનોએ અશોકભાઈના લાંબા સમયથી ચાલતા સામાજિક અને સંગઠનાત્મક યોગદાનની પ્રશંસા કરી હતી.
સન્માન સ્વીકાર્યા બાદ અશોકભાઈ ધોરાજીયાએ પોતાના સંબોધનમાં જણાવ્યું હતું કે, “વાંસદા મારી માટે માત્ર એક વિસ્તાર નથી, પરંતુ લાગણીઓ અને સંબંધો સાથે જોડાયેલું પરિવાર સમાન સ્થળ છે. અહીંના લોકોનો પ્રેમ અને સ્નેહ હંમેશા મને નવી ઊર્જા આપે છે. મારા લાયક કોઈપણ સમાજહિત કે જનહિતનું કાર્ય હોય તો નિઃસંકોચ મને જાણ કરશો, હું હંમેશા આપ સૌની સાથે ઉભો રહીશ.”
કાર્યક્રમ દરમિયાન મંદિર ટ્રસ્ટીઓ, સમસ્ત પાટીદાર સમાજના હોદ્દેદારો, સામાજિક આગેવાનો, કાર્યકરો તેમજ મોટી સંખ્યામાં ભક્તજનો ઉપસ્થિત રહ્યા હતા. સમગ્ર કાર્યક્રમ સૌહાર્દ, સન્માન અને સમાજ એકતાના માહોલમાં સંપન્ન થયો હતો.
