MORBI:મોરબીમાં પ્રેમસંબંધની અદાવતમાં ફાયરિંગ કેસ:પોલીસે ગણતરીની કલાકોમાં ૪ આરોપીઓને દબોચી લીધા
MORBI:મોરબીમાં પ્રેમસંબંધની અદાવતમાં ફાયરિંગ કેસ:પોલીસે ગણતરીની કલાકોમાં ૪ આરોપીઓને દબોચી લીધા
મોરબીના ત્રાજપર વિસ્તારમાં પ્રેમસંબંધની ખાર રાખીને એક યુવક પર રિવોલ્વર જેવા ઘાતક હથિયાર વડે ફાયરિંગ કરી જાનથી મારી નાખવાનો પ્રયાસ કરાયો હોવાની ચકચારી ઘટના સામે આવી છે. જો કે, ઘટનાની ગંભીરતાને જોઈને એક્શનમાં આવેલી મોરબી પોલીસે ગણતરીની કલાકોમાં જ તમામ ચારેય આરોપીઓને ઝડપી પાડી જેલભેગા કરી દીધા છે.
મળતી માહિતી મુજબ, મોરબીના ત્રાજપર ઓરીએન્ટલ બેંકવાળી શેરીમાં પ્રેમસંબંધની અદાવત રાખીને એક યુવક પર હુમલો કરવામાં આવ્યો હતો. આ હુમલા દરમિયાન આરોપીઓએ રિવોલ્વર જેવા હથિયારમાંથી ફાયરિંગ કરી યુવકની હત્યા કરવાનો પ્રયાસ કર્યો હતો. આ ઘટનાને પગલે સમગ્ર વિસ્તારમાં ભારે સનસનાટી મચી ગઈ હતી. ઘટના અંગે મોરબી સીટી બી ડીવીઝન પોલીસ મથકે ગુનો નોંધાતા જ પોલીસ તંત્ર તાત્કાલિક હરકતમાં આવ્યું હતું.
ઉચ્ચ પોલીસ અધિકારીઓની સૂચના અને માર્ગદર્શન હેઠળ ઘટનાની તપાસ માટે અલગ-અલગ ટીમો બનાવવામાં આવી હતી. આ દરમિયાન મોરબી એલ.સી.બી. (Local Crime Branch) અને સર્વેલન્સ ટીમને સંયુક્ત રીતે એક ચોક્કસ બાતમી મળી હતી કે, ફાયરિંગની ઘટનાને અંજામ આપનારા આરોપીઓ લઘધીરપુર રોડ પર આવેલા એક ભંગારના ડેલામાં છુપાયેલા છે.
બાતમીના આધારે પોલીસે કોઈ પણ પ્રકારનો સમય બગાડ્યા વિના લઘધીરપુર રોડ પર દરોડો પાડ્યો હતો અને ગણતરીની કલાકોમાં જ ચારેય આરોપીઓને રાઉન્ડઅપ કરી લીધા હતા.
પોલીસના સકંજામાં આવેલા તમામ ચારેય આરોપીઓ મૂળ બિહારના વતની છે અને હાલ મોરબીમાં રહે છે:નિરંજનભાઈ તિલકપ્રસાદ બિંદ (રહે. પાવનપાર્ક સોસાયટી, મોરબી-૨, મૂળ બિહાર) હિમાંશુભાઈ નિરંજનભાઈ બિંદ (રહે. પાવનપાર્ક સોસાયટી, મોરબી-૨, મૂળ બિહાર) ચંદનભાઈ મહેશભાઈ જમાદાર (રહે. બેલા-રંગપર, મૂળ બિહાર) મોહનભાઈ અનુજભાઈ બિંદ (રહે. લઘધીરપુર રોડ, મૂળ બિહાર) પ્રાથમિક પૂછપરછમાં સામે આવ્યું છે કે પ્રેમસંબંધની ખાર રાખીને જ આ શખ્સોએ યુવક પર હુમલો અને ફાયરિંગ કર્યું હતું. હાલ પોલીસે ચારેય આરોપીઓની અટકાયત કરી તેમની સામે આગળની કાયદેસરની કાર્યવાહી હાથ ધરી છે.
