MORBI:મોરબી પ્રોહિબિશનના ગુનામાં ૩ મહિનાથી નાસતો ફરતો ‘ટકો મુંધવાર’ ત્રાજપર ચોકડી પાસેથી ઝડપાયો
MORBI:મોરબી: પ્રોહિબિશનના ગુનામાં ૩ મહિનાથી નાસતો ફરતો ‘ટકો મુંધવાર’ ત્રાજપર ચોકડી પાસેથી ઝડપાયો
મોરબી પોલીસની એલ.સી.બી. (LCB) અને પેરોલ ફર્લો સ્ક્વોડની ટીમે સંયુક્ત ઓપરેશન હાથ ધરીને છેલ્લા ત્રણેક મહિનાથી પોલીસને હાથતાળી આપી નાસતા ફરતા એક રીઢા આરોપીને ઝડપી પાડવામાં મોટી સફળતા મેળવી છે. પ્રોહિબિશનના ગુનામાં સંડોવાયેલા આ આરોપીને ત્રાજપર ચોકડી નજીકથી દબોચી લેવામાં આવ્યો છે.
પોલીસ સૂત્રો પાસેથી મળતી માહિતી મુજબ, મોરબી સીટી બી ડિવિઝન પોલીસ સ્ટેશનમાં નોંધાયેલા પ્રોહિબિશન (દારૂના) ગુનામાં કુબેર ટોકીઝની પાછળ, ધાર ઉપર રહેતો હિતેષભાઇ ઉર્ફે વિપુલ ઉર્ફે ટકો રાજુભાઇ મુંધવાર નામનો આરોપી છેલ્લા ત્રણ માસથી નાસતો ફરતો હતો.
દરમિયાન મોરબી એલ.સી.બી. અને પેરોલ ફર્લો સ્ક્વોડના સ્ટાફને એક સંયુક્ત ખાનગી બાતમી મળી હતી કે આ આરોપી હાલ ત્રાજપર ચોકડી નજીક આંટાફેરા મારી રહ્યો છે. બાતમી અત્યંત ચોક્કસ હોવાથી પોલીસની ટીમે તાત્કાલિક વિસ્તારમાં વોચ ગોઠવી દીધી હતી.
વોચ દરમિયાન બાતમી વાળો શખ્સ ત્યાં આવી ચડતાં પોલીસે તેને કોર્ડન કરીને ઝડપી લીધો હતો. પકડાયેલા આરોપી હિતેષ ઉર્ફે ટકાને મોરબીની જુની એલ.સી.બી. કચેરી ખાતે લાવવામાં આવ્યો હતો, જ્યાં પ્રોહિબિશનના ગુના હેઠળ તેની વિધિવત અટકાયત (ધરપકડ) કરવામાં આવી છે. હાલ પોલીસ દ્વારા તેની સઘન પૂછપરછ અને આગળની ધોરણસરની કાયદેસરની કાર્યવાહી હાથ ધરવામાં આવી છે.
