WAKANER:વાંકાનેરની એલ. કે. સંઘવી કન્યા વિદ્યાલય ખાતે પોષણ જાગૃતિ અને હિમોગ્લોબિન વિષયક માર્ગદર્શન કાર્યક્રમ યોજાયો
WAKANER:વાંકાનેરની એલ. કે. સંઘવી કન્યા વિદ્યાલય ખાતે પોષણ જાગૃતિ અને હિમોગ્લોબિન વિષયક માર્ગદર્શન કાર્યક્રમ યોજાયો
શ્રીમતી એલ. કે. સંઘવી કન્યા વિદ્યાલય, વાંકાનેર ખાતે વિદ્યાર્થિનીઓમાં સ્વાસ્થ્ય પ્રત્યે જાગૃતિ આવે તે હેતુથી ‘પોષણ જાગૃતિ અને હિમોગ્લોબિનનું મહત્વ’ વિષય પર વિશેષ માર્ગદર્શન કાર્યક્રમનું આયોજન કરવામાં આવ્યું હતું. આ કાર્યક્રમ Nutrition International અને Project Concern India (PCI India) ના સંયુક્ત ઉપક્રમે યોજાયો હતો, જે સંસ્થાઓ ભારતમાં આરોગ્ય સુધારણા અને કુપોષણ નિવારણ ક્ષેત્રે સક્રિયપણે કાર્યરત છે.
કાર્યક્રમને સફળ બનાવવા માટે રાજ્ય સરકાર દ્વારા નિયુક્ત રાજ્ય પ્રોગ્રામ ઓફિસર ડૉ. આદિશકુમાર, પ્રોજેક્ટ કો-ઓર્ડિનેટર શ્રી ભરત ગોઠી, ડિવિઝનલ કો-ઓર્ડિનેટર (ફૂડ ફોર્ટિફિકેશન) શ્રી વિપુલ ઠાકર તેમજ ડિવિઝનલ કો-ઓર્ડિનેટર (ન્યુટ્રિશન) શ્રીમતી સ્મિતા ચાવડા ખાસ ઉપસ્થિત રહ્યા હતા.
ઉપસ્થિત અધિકારીઓ અને તજજ્ઞોએ વિદ્યાર્થિનીઓને પોષણનું મહત્વ, એનિમિયા (લોહીની ઉણપ) નિવારણ અને શરીરમાં હિમોગ્લોબિનનું પ્રમાણ વધારવાના અસરકારક ઉપાયો વિશે ઊંડાણપૂર્વક સમજ આપી હતી. ઉપરાંત, હિમોગ્લોબિનની ઉણપથી થતી શારીરિક અને માનસિક સમસ્યાઓ અંગે વિગતવાર માહિતગાર કર્યા હતા.
કાર્યક્રમ દરમિયાન સરકારશ્રીની WIFS (Weekly Iron and Folic Acid Supplementation) યોજના વિશે વિસ્તૃત માહિતી આપવામાં આવી હતી. આયર્ન અને ફોલિક એસિડની ગોળીઓનું નિયમિત સેવન કરવાથી થતા સ્વાસ્થ્ય લાભો વિશે વિદ્યાર્થિનીઓને સમજાવવામાં આવ્યું હતું. સાથોસાથ, વ્યક્તિગત સ્વચ્છતા, સંતુલિત આહાર અને નિયમિત કસરત દ્વારા તંદુરસ્ત જીવનશૈલી અપનાવવા માટે પ્રેરણા આપવામાં આવી હતી.
આ આયોજનનું મુખ્ય આકર્ષણ વિદ્યાર્થિનીઓ દ્વારા કરવામાં આવેલો પ્રાયોગિક પ્રદર્શન હતું. વિદ્યાર્થિનીઓએ સ્વહસ્તે પ્રયોગ કરીને સરકારી રાશનમાં મળતા મીઠા (મીઠું) અને ચોખામાં આયર્ન અને વિટામિન B12 ની હાજરી જાતે જ તપાસી હતી. આ પ્રયોગથી પ્રેરાઈને વિદ્યાર્થિનીઓએ પૌષ્ટિક અને ફોર્ટિફાઈડ રાશનનો દૈનિક આહારમાં ઉપયોગ કરવાનો સંકલ્પ કર્યો હતો.
કાર્યક્રમના અંતે શાળાના આચાર્યશ્રી દર્શનાબેન દ્વારા ઉપસ્થિત તમામ મહાનુભાવો અને નિષ્ણાતોનો આભાર વ્યક્ત કરવામાં આવ્યો હતો. તેમણે જણાવ્યું હતું કે, “સરકારશ્રી દ્વારા આપવામાં આવતા વિશેષ પૌષ્ટિક આહાર અને આયર્ન ગોળીઓનો નિયમિત ઉપયોગ કરીને જ આપણે આ જાગૃતિ કાર્યક્રમને સાચા અર્થમાં સફળ બનાવી શકીશું.”આ કાર્યક્રમથી શાળાની વિદ્યાર્થિનીઓમાં પોષણ, એનિમિયા મુક્તિ અને સ્વાસ્થ્યપ્રદ જીવનશૈલી અંગે અભૂતપૂર્વ જાગૃતિ જોવા મળી હતી.
