MORBI:‘બેટી બચાવો બેટી પઢાઓ’ અંતર્ગત મોરબીમાં યોજાયો ‘કોફી વિથ કલેક્ટર’ કાર્યક્રમ: ૧૦૦ જેટલી દીકરીઓએ જિલ્લા કલેક્ટર સાથે કર્યો સીધો સંવાદ
MORBI:‘બેટી બચાવો બેટી પઢાઓ’ અંતર્ગત મોરબીમાં યોજાયો ‘કોફી વિથ કલેક્ટર’ કાર્યક્રમ: ૧૦૦ જેટલી દીકરીઓએ જિલ્લા કલેક્ટરશ્રી સાથે કર્યો સીધો સંવાદ
કલેક્ટરશ્રી સ્વપ્નિલ ખરે એ દીકરીઓને લક્ષ્ય નિર્ધારિત કરી શિક્ષણ, કૌશલ્ય વિકાસ અને સર્વાંગી પ્રગતિ માટે આપ્યું પ્રેરણાદાયી માર્ગદર્શન
સ્કૂલ-કોલેજની દીકરીઓએ જિલ્લા સેવા સદનની વિવિધ કચેરીઓની પ્રત્યક્ષ મુલાકાત લઈ વહીવટી તંત્રની કામગીરી અને યોજનાઓના અમલીકરણ વિશે માહિતી મેળવી
‘બેટી બચાવો બેટી પઢાઓ’ અભિયાન અન્વયે મોરબી જિલ્લા મહિલા અને બાળ અધિકારીની કચેરી દ્વારા ‘કોફી વિથ કલેક્ટર’ના એક વિશેષ કાર્યક્રમનું આયોજન કરવામાં આવ્યું હતું. જિલ્લા સેવા સદનના સભાખંડ ખાતે યોજાયેલા આ કાર્યક્રમમાં મોરબીની વિવિધ સ્કૂલ-કોલેજની ૧૦૦ જેટલી દીકરીઓએ ભાગ લઈ જિલ્લા કલેક્ટરશ્રી સ્વપ્નિલ ખરે સાથે સીધો સંવાદ સાધ્યો હતો.
સંવાદ દરમિયાન જિલ્લા કલેક્ટરશ્રીએ દીકરીઓને વહીવટી તંત્રની કાર્યપદ્ધતિ, શિક્ષણ તથા કૌશલ્યલક્ષી અભ્યાસનું મહત્વ અને બાળ સુરક્ષા તથા કલ્યાણકારી યોજનાઓ અંગે વિસ્તૃત માર્ગદર્શન પૂરું પાડ્યું હતું. તેમણે દીકરીઓને જીવનમાં સ્પષ્ટ લક્ષ્ય નિર્ધારિત કરી આગળ વધવા પ્રોત્સાહિત કરી હતી.
સંવાદ બાદ દીકરીઓએ જિલ્લા સેવા સદનના વિવિધ સરકારી વિભાગોની રૂબરૂ મુલાકાત લઈ પ્રજાલક્ષી કામગીરી અને યોજનાઓનું આયોજન અને અમલીકરણ કઈ રીતે થાય છે તેનો પ્રત્યક્ષ અનુભવ મેળવ્યો હતો. મુલાકાત પૂર્ણ થયે કલેક્ટરશ્રીએ પોતાની ચેમ્બરમાં ૧૦ દીકરીઓ સાથે રૂબરૂ ચર્ચા કરી તેમના પ્રતિભાવો અને સૂચનો મેળવ્યા હતા.
આ ઉપરાંત નિવાસી અધિક કલેક્ટરશ્રી એસ.જે. ખાચરે પણ દીકરીઓ સાથે સંવાદ કરી તેમના ઉત્સાહને બિરદાવ્યો હતો.
આ કાર્યક્રમમાં નાયબ જિલ્લા ચૂંટણી અધિકારીશ્રી રશ્મિબેન રાજાવઢા, જિલ્લા પુરવઠા અધિકારીશ્રી હંસરાજસિંહ ગોહિલ, જિલ્લા મહિલા અને બાળ અધિકારીશ્રી જલ્પાબેન ત્રિવેદી, માર્ગ અને મકાન વિભાગ (સ્ટેટ)ના કાર્યપાલક ઈજનેરશ્રી દિગ્વિજય સોલંકી સહિત વહીવટી તંત્રના અધિકારીશ્રીઓ/કર્મચારીશ્રીઓ અને વિદ્યાર્થીનીઓ મોટી સંખ્યામાં ઉપસ્થિત રહ્યા હતા.
