MORBI:મોરબીમાં દિશા કમિટીની બેઠક સાંસદ વિનોદભાઈ ચાવડાના અધ્યક્ષસ્થાને યોજાઈ
MORBI:મોરબીમાં દિશા કમિટીની બેઠક સાંસદ વિનોદભાઈ ચાવડાના અધ્યક્ષસ્થાને યોજાઈ
સરકારની વિવિધ વિકાસલક્ષી – જનકલ્યાણકારી યોજનાઓની પ્રગતિની સમીક્ષા કરાઈ
ભારત સરકારના ગ્રામીણ વિકાસ મંત્રાલયના માર્ગદર્શન હેઠળ ડિસ્ટ્રિક્ટ ડેવલપમેન્ટ કો-ઓર્ડિનેશન એન્ડ મોનિટરિંગ કમિટી (દિશા)ની બેઠક મોરબી કલેક્ટર કચેરી ખાતે સાંસદશ્રી વિનોદભાઈ ચાવડાના અધ્યક્ષસ્થાને યોજાઈ હતી.
આ બેઠકની શરૂઆતમાં અગાઉ યોજાયેલી દિશા કમિટીની બેઠકની કાર્યવાહી નોંધને બહાલી આપવામાં આવી હતી. ત્યારબાદ જૂન-૨૦૨૬ના અંત સુધીમાં વિવિધ વિભાગો દ્વારા કરવામાં આવેલી ભૌતિક તથા નાણાકીય કામગીરીની વિગતવાર સમીક્ષા કરવામાં આવી હતી.
બેઠક દરમિયાન સાંસદશ્રી વિનોદભાઈ ચાવડાએ કેન્દ્ર તથા રાજ્ય સરકારની વિવિધ વિકાસલક્ષી અને જનકલ્યાણકારી યોજનાઓની પ્રગતિની સમીક્ષા કરી હતી. તેમણે યોજનાઓના અમલીકરણમાં ઝડપ લાવવા, પાત્ર લાભાર્થીઓને સમયસર યોજનાકીય લાભ મળી રહે તથા વિકાસકામો ગુણવત્તાયુક્ત રીતે પૂર્ણ થાય તે અંગે સંબંધિત અધિકારીઓને જરૂરી સૂચનો અને માર્ગદર્શન આપ્યું હતું.
વિવિધ વિભાગોના અધિકારીશ્રીઓ દ્વારા તેમના વિભાગ હેઠળ અમલમાં રહેલી વિવિધ યોજનાઓની કામગીરી, ભૌતિક સિદ્ધિ, નાણાકીય પ્રગતિ તથા થયેલી કામગીરીની વિગતો પાવર પોઇન્ટ પ્રેઝન્ટેશનના માધ્યમથી રજૂ કરવામાં આવી હતી. આ દરમિયાન યોજનાઓના અમલીકરણ અંગે જરૂરી ચર્ચા-વિચારણા પણ કરવામાં આવી હતી.
બેઠકનું સંચાલન જિલ્લા ગ્રામ વિકાસ એજન્સીના નિયામકશ્રી નવલદાન ગઢવી દ્વારા કરવામાં આવ્યું હતું.
આ પ્રસંગે સાંસદશ્રી કેશરીદેવસિંહ ઝાલા, મોરબી મહાનગરપાલિકાના મેયરશ્રી ઉત્તમભાઈ સુરાણી, તાલુકા પંચાયત તથા નગરપાલિકાના પ્રમુખશ્રીઓ, કલેક્ટરશ્રી સ્વપ્નિલ ખરે, મ્યુનિસિપલ કમિશનરશ્રી સંગીતા રૈયાણી, જિલ્લા વિકાસ અધિકારીશ્રી વિદ્યાસાગર, પોલીસ અધિક્ષકશ્રી મુકેશ પટેલ, નાયબ વન સંરક્ષકશ્રી ડૉ. સુનિલકુમાર બેરવાલ સહિતના અધિકારીશ્રીઓ અને પદાધિકારીઓ ઉપસ્થિત રહ્યા હતા.
