નફરત ફેલાવવાથી સત્તા મળે છે અને ટકે છે, આ ‘ગુજરાત મોડેલ’નું રહસ્ય છે !

12 એપ્રિલ 2024ના રોજનો મેસેજ જૂઓ : “મતદાનના દિવસે પિકનિક પર જશો નહીં. ભાજપને મત આપ્યા બાદ જ્યાં જવું હેય ત્યાં જજો. ભાજપને લોકસભામાં 407 બેઠકો શામાટે જોઈએ છે? [1] વક્ફ બોર્ડને નાબૂદ કરવા. આ તો કલમ-370 કરતાં વધુ ખતરનાક છે ! [2] CAA/ NRC કાયદો લાગુ કરીને 10 કરોડ બાંગ્લાદેશી ઘૂસણખોરોને ભગાડવા ! [3] લઘુમતી આયોગને નાબૂદ કરવા ! [4] પૂજાના સ્થળોનો કાયદો નાબૂદ કરવા. હજારો હિંદુ મંદિરો પરત કરવામાં આવશે, જેને મસ્જિદમાં રૂપાંતરિત કર્યા છે. [5] આતંકવાદની ફેક્ટરી, મદ્રેસા પર પ્રતિબંધ મૂકવા. યુનિફોર્મ એજ્યુકેશન એક્ટ લાવવા. [6] કેન્દ્ર સરકાર દ્વારા સંચાલિત 600 લઘુમતી સંસ્થાઓ બંધ કરવા. [7] દરેક માટે 2 બાળકોનો કાયદો બનાવવા. [8] સમગ્ર ભારતમાં UCC-સમાન નાગરિક સંહિતા લાગુ કરવા. 4 નિકાહ અને 3 તલાક પર પ્રતિબંધ મૂકવા. [9] પથ્થરબાજો અને તોફાનીઓની 100% સંપત્તિ જપ્ત કરવા અને તેમને 10 વર્ષની સજા કરાવવા. [10] ભારતને વિશ્વની ત્રીજી સૌથી મોટી આર્થિક-શક્તિ બનાવવા. IT, મેન્યુફેક્ચરિંગ, AI, કૃષિ અને ઈન્ફ્રાસ્ટ્રક્ચરમાં રોકાણ 100% વધારવા.”

થોડાં મુદ્દાઓ : [1] વડાપ્રધાનને વક્ફ બોર્ડને નાબૂદ કરવા/ CAA/ NRC કાયદો લાગુ કરવા/ લઘુમતી આયોગને નાબૂદ કરવા/પૂજાના સ્થળોનો કાયદો નાબૂદ કરવા/ મદ્રેસા પર પ્રતિબંધ મૂકવા/ લઘુમતી સંસ્થાઓ બંધ કરવા/ 2 બાળકોનો કાયદો બનાવવા/ UCC-સમાન નાગરિક સંહિતા લાગુ કરવા/તોફાનીઓની 100% સંપત્તિ જપ્ત કરવા કોણ રોકે છે? જો વડાપ્રધાન કોર્પોરેટ મિત્રોને રાજીરાજી કરવા ‘ત્રણ કૃષિ કાનૂન’ બનાવી શકે તો આ બધું અટકાવી ન શકે? [2] વડાપ્રધાન જો આવા પગલાં ભરે તો ખાડીના દેશો સાથે સંબંધ બગડે કે નહીં? દુનિયામાં ભારતની છાપ અફધાનિસ્તાન જેવી બને કે નહીં? વિદેશ જાય ત્યારે બુદ્ધ/ ગાંધીજીને યાદ કરે છે, તેને બદલે હત્યારા ગોડસેને યાદ કરવો પડે કે નહીં? [3] બંધારણના મૂળભૂત ઢાંચામાં કોઈ સરકાર સુધારો કરે તો સુપ્રિમકોર્ટ તેને ગેરબંધારણીય ઠરાવે કે નહીં? જેમને બંધારણની સમજ નથી, તેવા લોકો જ આવા નફરતી મેસેજ ફોરવર્ડ કરતા હોય છે ! [4] ધાર્મિક નફરત સાથે વિકાસ શક્ય છે? લોકોને ભ્રમિત કરવા ઇરાદાપૂર્વક નફરત સાથે વિકાસનો ડોઝ આપે છે. ભારતને વિશ્વની ત્રીજી સૌથી મોટી આર્થિક-શક્તિ બનાવવાની વાત માત્ર ગાજર નથી? રુપિયાનું ભયંકર અવમૂલ્યન થયું છે અને થતું જાય છે ત્યારે કઈ રીતે ભારત આર્થિક શક્તિ બનશે? દેશનું દેવું વધી રહ્યું છે/ અમીરો-ગરીબો વચ્ચેની ખાઈ પહોળી થઈ રહી છે/ 80 કરોડ લોકોને મફત અનાજ આપવું પડે છે; આ હાલતમાં ભારત વિશ્વની ત્રીજી આર્થિક-શક્તિ બની શકે?

બહુમતી સમુદાયની ધાર્મિક લાગણીઓને પંપાળીને અને લઘુમતી સમુદાય પ્રત્યે નફરત ફેલાવવાથી સત્તા મળે છે અને ટકે છે, આ ‘ગુજરાત મોડેલ’નું રહસ્ય છે ! નફરતના રસાયણનો નશો એવો છે કે બેરોજગારી/ મોંઘવારી/ આર્થિક બિમારી/ રુપિયાનું અવમૂલ્યન વગેરે પ્રશ્નો તુચ્છ લાગે છે ! આ નશો એવો છે કે લિટર પેટ્રોલનો ભાવ 500 રુપિયા થાય તો પણ ચિંતા થતી નથી ! 27 ઓગસ્ટ 2022ના રોજ વડાપ્રધાને અમદાવાદમાં અટલ બ્રિજનું ઉદ્ઘાટન કર્યું, ત્યારે એક વૃધ્ધ વ્યક્તિએ કહ્યું હતું : ‘આ સાહેબ જ કરી શકે, બીજું કોઈ કરી શકે જ નહીં. આની સામે IIT/ IIM કંઈ જ નથી, એ બધું તો કચરો છે !’ આ એવો નશો છે કે કોંગ્રેસે બનાવેલ ઉચ્ચ શિક્ષણ સંસ્થાઓ કચરો લાગે છે !rs [કાર્ટૂન સૌજન્ય : Mir Suhail તથા સતિષ આચાર્ય]