વિશ્વ સિંહ દિવસ નિમિત્તે જૂનાગઢ જિલ્લામાં ભવ્ય મહારેલીનું આયોજન
વિશ્વ સિંહ દિવસ નિમિત્તે જૂનાગઢમાં ભવ્ય મહારેલીનું આયોજન
વાત્સલ્યમ્ સમાચાર
ભરત બોરીચા – જૂનાગઢ
જૂનાગઢ : તારીખ ૧૦ ઓગસ્ટ ૨૦૨૫: વિશ્વ સિંહ દિવસની ઉજવણીના ભાગરૂપે જૂનાગઢ જિલ્લા શિક્ષણ અધિકારી કચેરી દ્વારા એક ભવ્ય મહારેલીનું આયોજન કરવામાં આવ્યું હતું. આ કાર્યક્રમમાં જિલ્લાની પ્રાથમિક, ઉચ્ચ પ્રાથમિક, માધ્યમિક અને ઉચ્ચ માધ્યમિક શાળાઓ સહિત કુલ ૧૩૧૫ શૈક્ષણિક સંસ્થાઓના વિદ્યાર્થીઓ, શિક્ષકો તેમજ ગ્રામજનોએ ઉત્સાહપૂર્વક ભાગ લીધો હતો.
આ મહારેલીનો મુખ્ય ઉદ્દેશ એશિયાઈ સિંહોના સંરક્ષણ અને સંવર્ધન અંગે જનજાગૃતિ ફેલાવવાનો હતો. રેલી દરમિયાન વિદ્યાર્થીઓ અને નાગરિકોએ સિંહોના રક્ષણ માટે સામૂહિક શપથ ગ્રહણ કર્યા હતા, જેમાં તેઓએ સિંહોના નિવાસસ્થાનની જાળવણી અને તેમની સુરક્ષા માટે પ્રતિબદ્ધતા દર્શાવી હતી.
આ કાર્યક્રમ ગીરના ગૌરવરૂપ એશિયાઈ સિંહોના મહત્વને ઉજાગર કરવા અને આવનારી પેઢીઓમાં પર્યાવરણ પ્રત્યેની જવાબદારીનું મૂલ્ય સ્થાપિત કરવા માટે એક સફળ પગલું સાબિત થયો છે. જૂનાગઢ જિલ્લા શિક્ષણ અધિકારી કચેરીએ આ ઉમદા પહેલ બદલ સૌનો આભાર વ્યક્ત કર્યો છે.
