વાત્સલ્યમ સમાચાર
મદન વૈષ્ણવ
નવસારી અને આસપાસના વિસ્તારના નાગરિકોની વહીવટી સગવડતામાં વધારો કરતા એક મહત્વપૂર્ણ લોકાર્પણ અંતર્ગત આજરોજ નવનિર્મિત ‘આધાર સેવા કેન્દ્ર’ (ASK)નું કેન્દ્રીય જળશક્તિ મંત્રી શ્રી સી.આર. પાટીલના વરદહસ્તે ગરિમાપૂર્ણ ઉદ્ઘાટન કરવામાં આવ્યું છે. ડાબુ હોસ્પિટલ પાસે શરૂ કરાયેલા આ અત્યાધુનિક કેન્દ્રના પ્રસંગે મુખ્ય અતિથિ તરીકે ઉપસ્થિત કેન્દ્રીય મંત્રીશ્રીની સાથે નવસારી મહાનગરપાલિકાના મેયર શ્રી અશોકભાઈ ધોરાજીયા, નવસારીના ધારાસભ્ય શ્રી રાકેશભાઈ દેસાઈ, જિલ્લા કલેકટર શ્રી મનીષ ગુરુવાની તેમજ પોલીસ અધિક્ષક શ્રી રાહુલ પટેલ સહિતના ઉચ્ચ પદાધિકારીઓ અને અધિકારીઓ ગૌરવભેર ઉપસ્થિત રહ્યા હતા.
આ પ્રસંગે ઉપસ્થિત મેદનીને સંબોધતા કેન્દ્રીય મંત્રી શ્રી સી.આર. પાટીલે જણાવ્યું હતું કે, સંપૂર્ણ એર-કન્ડિશન્ડ અને ટોકન આધારિત આધુનિક સિસ્ટમ ધરાવતું આ કેન્દ્ર શરૂ થવાથી નાગરિકોને ઓનલાઇન એપોઇન્ટમેન્ટ દ્વારા લાંબી લાઈનો વિના જ ખૂબ જ ઝડપી સુવિધા મળશે. આ કેન્દ્ર ખાતે એક જ સ્થળેથી નવીન નોંધણી તેમજ નામ, સરનામું સુધારવા અને બાયોમેટ્રિક્સ અપડેટ કરવા જેવી તમામ સેવાઓ ખૂબ જ સરળતાથી અને પારદર્શક સરકારી ચાર્જ સાથે ઉપલબ્ધ કરાવાશે. ગુજરાતમાં કાર્યરત અગ્રણી આધાર સેવા કેન્દ્રોના આ ડિજિટલ નેટવર્કના વિસ્તરણથી પ્રજાલક્ષી વહીવટી પ્રક્રિયા વધુ સુદ્રઢ અને લોકાભિમુખ બનશે.
યુનિક આઇડેન્ટિફિકેશન ઓથોરિટી ઓફ ઇન્ડિયા (UIDAI) પ્રાદેશિક કચેરી મુંબઈ અંતર્ગત આયોજિત આ લોકાર્પણ કાર્યક્રમમાં સ્થાનિક પ્રશાસનના અધિકારીઓ, સામાજિક અગ્રણીઓ અને મીડિયાના પ્રતિનિધિઓ મોટી સંખ્યામાં ઉપસ્થિત રહ્યા હતા અને સમગ્ર વહીવટી વ્યવસ્થાને બિરદાવી હતી.
