ગુજરાતમાં સ્થાનિક સ્વરાજ્યની સંસ્થાઓની ૧૫ બેઠકો માટે પેટાચૂંટણી જાહેર, ૨૮ સપ્ટેમ્બરે મતદાન

ગાંધીનગર: ગુજરાત રાજ્ય ચૂંટણી આયોગ દ્વારા રાજ્યની સ્થાનિક સ્વરાજ્યની સંસ્થાઓમાં ખાલી પડેલી જુદી જુદી ૧૫ બેઠકો માટેની પેટાચૂંટણીનો સત્તાવાર કાર્યક્રમ જાહેર કરવામાં આવ્યો છે. આ જાહેરનામાની સાથે જ સંબંધિત વિસ્તારોમાં ચૂંટણી આદર્શ આચારસંહિતા અમલમાં આવી ગઈ છે.

રાજ્ય ચૂંટણી આયોગની અખબારી યાદી મુજબ, જુનાગઢ મહાનગરપાલિકાની ૧ બેઠક, દેવગઢ બારીઆ અને વિસનગર નગરપાલિકાઓની કુલ ૭ બેઠકો, આણંદ જિલ્લા પંચાયતની ૧ બેઠક (પાલજ) તેમજ હળવદ, પોશીના, સતલાસણા, હારીજ, નેત્રંગ અને ફાગવેલ તાલુકા પંચાયતોની કુલ ૬ બેઠકો મળીને કુલ ૧૫ ખાલી બેઠકો માટે પેટાચૂંટણી યોજાશે. આ તમામ બેઠકો પર ઇલેક્ટ્રોનિક વોટિંગ મશીન (EVM) દ્વારા મતદાન પ્રક્રિયા હાથ ધરવામાં આવશે.

ચૂંટણી દરમિયાન મતદારો પોતાની ઓળખ પ્રસ્થાપિત કરવા માટે મતદાન મથકે મતદાર ઓળખપત્ર (EPIC) રજૂ કરવાનું રહેશે. જો કોઈ કારણસર મતદાર પાસે ઓળખપત્ર ન હોય, તો આયોગ દ્વારા નિયત કરવામાં આવેલા અન્ય ફોટોગ્રાફ વાળા આધારભૂત દસ્તાવેજો રજૂ કરીને પણ મતદાન કરી શકાશે.

રાજ્ય ચૂંટણી આયોગે મુક્ત, ન્યાયી અને શાંતિપૂર્ણ વાતાવરણમાં ચૂંટણી સંપન્ન થાય તે માટે વહીવટી તંત્ર અને પોલીસ બંદોબસ્તની પૂરતી તૈયારીઓ કરી લીધી છે. આ સાથે જ આયોગ દ્વારા મતદાન અને મતગણતરીના દિવસો માટે કંટ્રોલ રૂમની પણ વ્યવસ્થા કરવામાં આવી છે.