વાત્સલ્યમ સમાચાર
મદન વૈષ્ણવ
રાજ્યનાં છેવાડે આવેલ ડાંગ જિલ્લામાં છેલ્લા બે દિવસથી ઋતુચક્રનો મિજાજ બદલાયો છે.હવામાન વિભાગની આગાહીનાં પગલે ડાંગ જિલ્લાનાં ગામડાઓમાં છેલ્લા બે દિવસથી ક્યાંક ઝરમરીયો તો ક્યાંક અમીછાટણા સ્વરૂપેનો કમોસમી વરસાદ પડતા સમગ્ર પંથકોનું વાતાવરણ બેવડાયુ હતુ. ડાંગ જિલ્લાનાં ગિરિમથક સાપુતારા, આહવા, બોરખલ,ગલકુંડ, સુબિર, વઘઇ, ભેંસકાતરી, સાકરપાતળ,પીપલાઈદેવી,ચિંચલી, સહીત પૂર્વપટ્ટી અને સરહદીય પંથકોમાં સતત બીજા દિવસે વાદળછાયુ વાતાવરણ છવાઈ રહેવાની સાથે સમયાંતરે ક્યાંક ઝરમરીયો તો ક્યાંક અમીછાટણા સ્વરૂપેનો વરસાદ પડતા ખેડૂતોમાં દોડધામ મચી જવા પામી હતી.
ડાંગ જિલ્લામાં છેલ્લા બે દિવસથી વાતાવરણમાં પલટાની સાથે કમોસમી વરસાદનાં છાટણા પડતા ખેડૂતોનાં શાકભાજી, કઠોળ,સહીત ફળફળાદી પાકોને જંગી નુકસાનની ભીતિ વર્તાઈ હતી.ગિરિમથક સાપુતારા ખાતે દિવસભર વાદળછાયા વાતાવરણની વચ્ચે સમયાંતરે કમોસમી વરસાદનાં અમીછાટણા પડતા જોવાલાયક સ્થળોનું વાતાવરણ આહલાદક બની જવા પામ્યુ હતુ.સાથે સાપુતારાનું વાતાવરણ ઠંડુગાર બની જતા ફરવા આવેલ પ્રવાસીઓનો ઉન્માદ બેવડાયો હતો.ડાંગ જિલ્લામાં છેલ્લા બે દીવસથી વાતાવરણમાં પલટો રહેતા ડાંગી જનજીવને ગરમીમાંથી આંશિક રાહત મેળવી હતી..
