રાષ્ટ્રીય બાળ સ્વાસ્થ્ય કાર્યક્રમ અંતર્ગત દેવાંશુને મળ્યું નવું જીવન
માત્ર ૧ મહિનાની ઉંમરે દેવાંશુના હ્રદયમાં કાણું હોવાનું નિદાન થતાં અમદાવાદની હોસ્પિટલમાં થયું વિનામૂલ્યે ઓપરેશન
સરકારશ્રીના સહયોગથી વિનામૂલ્યે હદયનું ઓપરેશન સફળ બન્યુ અને મારા દેવાંશને નવુ જીવન મળ્યું છે- લાભાર્થી – સતીશભાઈ વસાવા
ભરૂચ જિલ્લામાં રાષ્ટ્રીય બાળ સ્વાસ્થ્ય કાર્યક્રમ અંતર્ગત ૨૬ ટીમો કાર્યરત
આ યોજનાનો લાભ લેવા માટે પરિવારની કોઈ પણ આર્થિક મર્યાદા નક્કી કરવામાં આવી નથી. ઓછામાં ઓછા ૧૦ વર્ષથી ગુજરાત રાજ્યમાં રહેતો કોઈ પણ પરિવાર પોતાના બાળક માટે સરકારની આ યોજનાનો લાભ મેળવી શકે
રાષ્ટ્રીય બાળ સ્વાસ્થ્ય કાર્યક્રમ આંગણવાડી, પ્રાથમિક-માધ્યમિક અને ઉચ્ચતર માધ્યમિક શાળાઓમાં તથા ઘરે-ઘરે જઈને ટીમ દ્વારા બાળકોની પ્રાથમિક આરોગ્ય તપાસ અને સારવાર માટે મદદરૂપ
ભરૂચ – બુધવાર – ગુજરાત સરકારનો રાષ્ટ્રીય બાળ સ્વાસ્થ્ય કાર્યક્રમ આંગણવાડી, પ્રાથમિક-માધ્યમિક અને ઉચ્ચતર માધ્યમિક શાળાઓમાં તથા ઘરે-ઘરે જઈને ટીમ દ્વારા બાળકોની પ્રાથમિક આરોગ્ય તપાસ અને સારવાર કરવામાં આવે છે. RBSK થકી ૦ થી ૧૮ વર્ષના બાળકોની (જેનામાં જન્મજાત ખામી, ઉણપ, ગંભીર રોગો તેમજ વિલંબિત વિકાસ વગેરેની) તપાસ, નિદાન તેમજ રીફર કરીને સરકારશ્રી દ્વારા વિનામૂલ્યે સારવાર આપવામાં આવે છે.
ઈશ્વરે સૌ મનુષ્યોને જીવન આપ્યું છે. પરંતુ કયારેક ઈશ્વર દ્વારા અપાયેલા આ શરીરમાં ખોડ-ખાપણ પણ રહી જતી હોય છે. ત્યારે ગુજરાત સરકાર આ ખોડ-ખાપણને દૂર કરવા હંમેશ પ્રયત્નશીલ છે. ગુજરાત સરકારના આરોગ્ય અને પરિવાર કલ્યાણ વિભાગના સહયોગ થકી શાળા આરોગ્ય-રાષ્ટ્રીય બાળ સ્વાસ્થ્ય કાર્યક્રમ અંતર્ગત ભરૂચ જિલ્લામાં કુલ ૨૬ ટીમો કાર્યરત છે.
રાષ્ટ્રીય બાળ સ્વાસ્થ્ય કાર્યક્રમ અંતર્ગત ભરૂચ જિલ્લાના ઝઘડીયા તાલુકાના ઉમલ્લા ગામના દેવાંશુને આર.બી.એસ.કે.ટીમનીમદદથી હૃદયનું ઓપરેશન સફળ થયું છે. ત્યારે લાભાર્થીના પિતાશ્રી સતીશભાઈ વસાવાએ જણાવ્યુ કે, આંગણવાડીમાં રેગ્યુલર ચેક-અપ કરવા આવતા ડૉકટરને દેવાંશુની ઉંમર પ્રમાણે ઉંચાઈ અને વજન પણ ઘણું ઓછું લાગતા તેથી વધુ રીપોર્ટસ માટે ચેક-અપ કર્યુ. હદયના ધબકારા અસામાન્ય લાગતા રેફરન્સ કાર્ડ આપીને અંકલેશ્વરની સરદાર પટેલ હોસ્પિટલ ખાતે કાર્ડિયોગ્રાફીના રિપોર્ટ માટે કહ્યું, ત્યારબાદ ડોક્ટરની સલાહ મુજબ ઑપરેશનની જરૂરિયાત જણાઈ હતી. અમદાવાદમાં આવેલી યુ. એન. મહેતા હોસ્પિટલમાં સારવાર અર્થે મોકલવામાં આવ્યા. ત્યાંના ડૉકટરના રિપોર્ટમાં પણ આવું જ નિદાન થતાં એક વર્ષના બાળક દેવાંશનું સફળતાપૂર્વક ઓપરેશન કરવામાં આવ્યું.
તેમણે સરકારશ્રીનો આભાર માનતા કહ્યું હતું કે, અમારી પાસે એટલા પૈસાની સગવડ નહોતી કે અમે ઓપરેશન કરાવી શકીએ. પણ સરકારશ્રીના સહયોગથી વિનામૂલ્યે હદયનું ઓપરેશન સફળ બન્યુ અને મારા દેવાંશને નવુ જીવન મળ્યું છે. ઓપરેશન પછી એમનામાં ઘરમૂળથી જ બદલાવ આવ્યો છે. ઉંચાઈ અને વજનમાં ઉત્તોરઉત્તર વધારો જોવા મળ્યો છે. અન્ય બાળકોની જેમ સ્ફૂર્તિથી રમે છે.
દેવાંશુના માતા રીતુબેન જણાવે છે કે, જ્યારથી દેવાંશુને હૃદયની બિમારીનું નિદાન થયું ત્યારથી આર.બી.એસ.કેની ટીમ દ્વારા નિયમિત ચેકઅપ કરવામાં આવે છે. તે બદલ જિલ્લા આરોગ્ય વિભાગ અને સરકારશ્રીનો આભાર માનતા ખુશીની લાગણી અનુભવું છું કે, એમના થકી આજે મારૂં બાળક તંદુરસ્ત છે અને મારી સાથે પરિવારમાં જીવે છે.
આર.બી.એસ.કે. અંતર્ગત કામ કરતા મેડિકલ ઓફિસર ડૉ. રીંકલ બાબરીયા જણાવે છે કે, અમારી ટીમ દરેક શાળામાં વર્ષમાં એક વાર અને દરેક આંગણવાડીમાં વર્ષમાં બે વાર બાળકોની તપાસ માટે જાય છે અને પ્રયત્ન કરે છે કે જન્મજાત ખામી ધરાવતા ૧૦૦% બાળકોને આવરી લઈએ અને તેમની સારવાર કરાવામાં આવે છે. આ યોજનાનો લાભ લેવા માટે પરિવારની કોઈ પણ આર્થિક મર્યાદા નક્કી કરવામાં આવી નથી. ઓછામાં ઓછા ૧૦ વર્ષથી ગુજરાત રાજ્યમાં રહેતો કોઈ પણ પરિવાર પોતાના બાળક માટે સરકારની આ યોજનાનો લાભ મેળવી શકે છે.
વધુમાં તેમણે જણાવ્યુ કે, દેવાંશુને જિલ્લા પંચાયત આરોગ્ય વિભાગના મુખ્ય જિલ્લા આરોગ્ય અધિકારીશ્રીની મંજુરી પ્રાપ્ત સંદર્ભ કાર્ડ સાથે અમદાવાદની યુ. એન. મહેતા હોસ્પિટલ ખાતે વધુ સારવાર અને ઓપરેશન માટે રિફર કરવામાં આવ્યો હતો. જ્યાં સફળતા પૂર્વક વિનામૂલ્ય હૃદયનું ઓપરેશન થયુ છે.કેન્દ્ર સરકારના રાષ્ટ્રીય બાળ સ્વાસ્થ્ય કાર્યક્રમ હેઠળ રાજ્ય સહિત ભરૂચ જિલ્લામાં રાષ્ટ્રીય બાળ સ્વાસ્થ્ય કાર્યક્રમ ટીમ દ્વારા નવજાત શીશુથી લઈને ૧૮ વર્ષ સુધીના બાળકોના સ્વાસ્થ્યની તપાસ કરી તેમને જરૂરી સારવાર આપવામાં આવે છે. આર.બી.એસ.કે. ટીમના સહકાર અને દરકાર દ્વારા બાળક લાભાર્થી સરકારશ્રીની મહત્વની યોજનાનો લાભ લઈ મુશ્કેલીના અંધકારમાંથી બહાર નીકળી એક ઉજ્જ્વળ ભવિષ્ય તરફ આગેકૂચ કરે છે. તે માટે જ કહી શકાય કે રાષ્ટ્રીય બાળ સ્વાસ્થ્ય કાર્યક્રમ આ બાળક માટે ખરેખર આશીર્વાદરૂપ નીવડ્યો છે.
ઈરફાન ખત્રી
રાજપારડી
