MORBI:મોરબીના જેતપરમાં ખેડૂત આંદોલન ઉગ્ર: અણીયાળી ટોલનાકા નજીક હાઇવે બ્લોક, મહિલાઓ પણ રસ્તા પર ઉતરી
MORBI:મોરબીના જેતપરમાં ખેડૂત આંદોલન ઉગ્ર: અણીયાળી ટોલનાકા નજીક હાઇવે બ્લોક, મહિલાઓ પણ રસ્તા પર ઉતરી
જમીનના યોગ્ય વળતરની માંગ સાથે જેતપર પંથકમાં ખેડૂતોનો આક્રોશ ચરમસીમાએ પહોંચ્યો છે. પોલીસ દ્વારા ખેડૂતોની કરવામાં આવેલી અટકાયતના વિરોધમાં આજે સમગ્ર ગ્રામજનો અને મોટી સંખ્યામાં મહિલાઓ રોષે ભરાઈને રસ્તા પર ઉતરી આવ્યા હતા. ઉશ્કેરાયેલા ટોળાએ અણીયાળી ટોલનાકા નજીક હળવદ-માળીયા (જેતપર) હાઇવે પર કટોકટીભર્યો ચક્કાજામ કરી દીધો હતો, જેને પગલે હાઇવેની બંને તરફ વાહનોના થપ્પા લાગી ગયા હતા.
મહિલાઓ શક્તિસ્વરૂપે રસ્તા પર: હાઇવે પર વાહનોની કિલોમીટરો લાંબી કતારો
ખેડૂતોની ધરપકડથી મામલો વધુ બિચક્યો છે. પુરુષોની સાથે-સાથે મોટી સંખ્યામાં ગ્રામીણ મહિલાઓએ પણ મોરચો સંભાળી લીધો છે. “આને કહેવાય ચક્કાજામ” એવો ઘાટ સર્જીને જેતપરના ગ્રામજનોએ પોતાની તાકાતનો પરચો બતાવ્યો છે. અણીયાળી ટોલનાકા નજીક ચક્કાજામના કારણે ટ્રક, બસ અને ખાનગી વાહનો સહિત હજારો મુસાફરો અધવચ્ચે અટવાઈ પડ્યા છે અને કિલોમીટરો સુધી ટ્રાફિક જામના દ્રશ્યો સર્જાયા છે.
ગ્રામજનોની ઉગ્ર ચીમકી: “ખેડૂતોને મુક્ત કરો, વળતર આપો”
આક્રમક મૂડમાં રહેલા ગ્રામજનો અને ખેડૂત નેતાઓએ સ્પષ્ટ શબ્દોમાં ચીમકી આપતા જણાવ્યું છે કે:
“જ્યાં સુધી ખેડૂતોને તેમની જમીનનું યોગ્ય અને ન્યાયી વળતર નહીં મળે, અને ડિટેન (અટકાયત) કરાયેલા તમામ ખેડૂતોને સત્વરે અને સન્માનપૂર્વક મુક્ત કરવામાં નહીં આવે, ત્યાં સુધી જેતપર ખાતે પ્રતીક ધરણા અને હાઇવે પર ચક્કાજામ યથાવત રહેશે. અમે પાછા હટવાના નથી.”
ચક્કાજામ અને ઉગ્ર વિરોધ પ્રદર્શનને પગલે હાલમાં જેતપર અને તેની આસપાસના સમગ્ર વિસ્તારમાં પોલીસનો ચુસ્ત કાફલો અને બંદોબસ્ત ગોઠવી દેવામાં આવ્યો છે. ઉચ્ચ અધિકારીઓ પણ ઘટનાસ્થળે દોડી આવ્યા છે. જો કે, પ્રશાસનની સમજાવટ સામે ખેડૂતો પણ પોતાની માંગ પર મક્કમ અને અડગ હોવાથી આગામી સમયમાં મામલો વધુ ઉગ્ર બને તેવી પૂરેપૂરી સંભાવના દેખાઈ રહી છે.
